Su Minalut kanu Labi a Mapia a Kapasadan
8
Na nia ku pegkiugan papedtuntay sa lekanu kanu langun nu pedtalun ku a nia na saguna na aden den mapulu sa langun nu 'bpamangurban sa lekitanu a 'bpagagayan kanu kawanan nu kulesi nu Kadenan a Barakat a lu sa sulega. 2 Na 'bpangurban sekanin lu kanu suti sa langun a dalepa a tidtu a 'Bpangadapan kanu Kadenan a Mapulu a lu sa sulega a dikena su manusia i minumbal lun ka su Mapulu demun i minumbal lun. 3 Na su langun nu nabaluy a mapulu sa langun nu 'bpamangurban na sinanganan sa kagkurban nin kanu manga ipegkurban nu taw enggu kanu manga inenggay nu taw, tembu su Isa al-Masih a mapulu sa langun nu 'bpamangurban sa lekitanu na nasisita bun i aden makagkurban nin. 4 Ugaid'a amaika sia pamun sekanin sa dunia na di sekanin mabaluy a mangurban kagina aden den nasanganan sa kapangurban sa kanu manga inenggay nu taw sia luyud kanu kasuguan. 5 Na su pegkurbanan nilan sia sa dunia na tuladan atawa ka alung-alung su entu nu ngin i lu sa sulega tembu ba kanu kinaumbal'u Musa kanu Balung-balung a Tuleda a 'Bpangadapan kanu Kadenan a Mapulu na nia inidsasana lun nu Kadenan sa kaumbal lun na “Sigulu ka i makapaumbal'engka i nia sia luyud kanu ipebpapata ku sa leka sia kanu nia a palaw.”a 6 Ugaid'a su galebekan nu Isa al-Masih sa kinabaluy lun sa mapulu sa langun nu 'bpamangurban na labi i kabalapantag'in kumin kanu manga galebekan nu entu a 'bpamangurban kagina sekanin i minalut kanu labi a mapia a kapasadan a inenggay sia luyud kanu labi bun i kapia nin a manga pasad. 7 Na u mana bu man ka dala kulang'u nauna a kapasadan na di den man dait a sambian pan su entu.8 Ugaid'a nailay nu Kadenan a Mapulu i aden kulang'in su manga taw nin sa entu, tembu pidtalu nin su nia a katigan nin sa
“Mauma i timpu
a mangaden aku sa bagu a kapasadan kanu manga taw a Israil
enggu kanu manga taw a Yahuda.b
9 Na dikena pagidsan su entu kanu kapasadan a pinangaden ku kanu manga kaapuan nilan
kanu timpu a kinaagak ku kanilan mapaliu kanu dalepa a Egypt.
Kagina dala nilan man italus inggulalan su kapasadan a inenggay ku kanilan,
tembu ba pinadtaday ku den mambu silan.”
10 Na nia pan kadtalu nu Kadenan a Mapulu na
“Nia ba i kapasadan a pangadenen ku kanu manga taw a Israil
kanu mangauma a timpu:
Idalem ku kanu itungan nilan su manga kasuguan ku.
Isulat ku su entu kanu pamusungan nilan.
Saki i kilalan nilan a Kadenan
enggu silan menem i mabaluy a manga taw ku.
11 Di den nasisita a ipamandu pan atawa ka edtalun pan nu uman i isa kanu ped'in
atawa ka kanu suled'in i ‘Kilala nu su Mapulu.’
Kagina 'gkakilala aku nilan den langun
iganat sa mababa sa langun a manga taw taman den kanu mapulu sa langun a manga taw
12 ka ampunen ku den su manga kabaladusan nilan
taman sa lipatanan ku den su manga kadupangan nilan.”c
13 Na sia kanu kinadtalu nu Kadenan sa “aden bagu a kapasadan,” na nia nin maena na inawan nin den sa bisa su nauna a kapasadan. Na u ngin i da den bisa nin enggu labing den na di mauget na madadag den.