Su Milkisidik na Mapulu pan kanu 'Bpamangurban nu manga Taw a Israil
7
Na su Milkisidik na datu sekanin nu siudad a Salim enggu 'bpangurban sekanin kanu Kadenan a Mapulu sa Langun. Na kanu kinauli nu Ibrahim ebpun kanu kinapanaban nin embunua kanu manga datu na inalaw sekanin nu Milkisidik enggu pinalihalan nin su Ibrahim. 2 Na inenggay sa lekanin nu Ibrahim su ikasapulu bad kanu langun nu nataban nin.a Na nia maena nu ngala nin a Milkisidik na “Datu na Kaikelasan.” Na datu sekanin kanu siudad a Salimb tembu “Datu nu Kalilintad.” 3 Dala nalabit a ama nin enggu ina nin, dala bun tarsilan pantag kanu katupuan nin, dala bun nakasulat pantag kanu kinambata lun enggu kinapatay nin. Na su kinabaluy lun a mangurban na dala kapegkapupus'in tembu makapagidsan nin su Tunggal'u Kadenan.4 Na ilay nu, sangat a badtug su Milkisidik ka apia su Ibrahim a kalukesan nu katupuan tanu na minenggay lun sa ikasapulu bad kanu langun nu nataban nin sa kinambunua. 5 Na sia luyud kanu kasuguan na su manga tupu bu nu Libi a nasanganan sa kapangurban i mapakay a temalima kanu ikasapulu bad a pantiali nu manga pagidsan nilan a taw a Israil apia nia nin kaaden i tupu bun silan nu Ibrahim. 6 Ugaid'a su Milkisidik na dikena tupu nu Libi a inenggan nu Ibrahim kanu ikasapulu bad kanu nataban nin. Sekanin i minenggay sa palihala kanu Ibrahim a nakatalima kanu manga pasad'u Kadenan. 7 Na mapayag sa lekitanu i su 'bpagenggay sa palihala na mapulu kumin kanu 'bpagenggan sa palihala. 8 Na su 'bpamangurban a entu a tupu nu Libi a 'bpagenggan kanu ikasapulu bad kanu manga 'gkapantiali nu taw na manga manusia bu silan a aden papatayan nin ugaid'a su Milkisidik na nalabit kanu kitab i bibiag pamun sekanin. 9 Na timbang a apia su Libi a 'bpagenggan kanu ikasapulu bad kanu 'gkapantiali nu taw na nakaenggay bun sa ikasapulu bad kanu Milkisidik sia nakanggulalan kanu Ibrahim 10 kagina kanu timpu a kinaenggay nu Ibrahim kanu Milkisidik kanu ikasapulu bad kanu nataban nin na lu pamun su Libi kanu katupuan nin a su Ibrahim ka da pamun sekanin makagemaw sa dunia.
Su Ped a 'Bpangurban a Pagidsan nu Milkisidik
11 Na u mana bu man ka matalutup su manga taw sia makanggulalan kanu ukit'u kabpangurban a inisangan kanu manga tupu nu Libi (a kinandut su entu kanu kasuguan a tinalima nu taw), na di den nasisita su ped pan a 'bpangurban a pagidsan nu Milkisidik a dikena pagidsan nu kinabaluy mangurban kanu tupu nu Libi a si Harun. 12 Na amaika kasambian su kabaluy mangurban kanu 'bpangurban na dait a kasambian bun su kasuguan. 13 Na su pedtalun sia a ipedsambi a mangurban na ebpun kanu ped a tupu enggu apia sakataw kanu tupu nin na dala nakapangurban lun. 14 Na katawan tanu a benal i su Isa al-Masih a Mapulu tanu a ipedsambi a mangurban na ebpun kanu ped a tupu ka tupu sekanin nu Yahuda. Na apia sakataw kanu nia a tupu na dala nalabit'u Musa a nakapangurban lun.
15 Na labi a migkapayag i nasambian den su 'bpamangurban a ebpun kanu tupu nu Libi sia kanu kinambuat'u ped a 'bpangurban a pagidsan nu Milkisidik. 16 Na nabaluy sekanin a mangurban dikena sia nakanggulalan kanu tupu a nasanganan sa kapangurban sia luyud kanu kasuguan ka sabap sa kabarakat'u uyag-uyag'in a da taman nin. 17 Ka nia kadtalu sia kanu kitab pantag sa lekanin na
“Seka su mangurban taman sa taman
a mana su kinabaluy kanu Milkisidik sa kabpangurban.”c
18 Na sinambian man su danden a kasuguan sa kabaluy mangurban kanu 'bpangurban kagina malubay su entu enggu da gaid katagan nin, 19 kagina dala man natalutup sia kanu Kadenan sia kanu kapenggulalan kanu kasuguan tembu nia ba i sabap'in i inenggan tanu sa labi pan i kapia nin a inam. Na sia makanggulalan kanu entu na makasupeg tanu den kanu Kadenan.
20-21 Na su kinabaluy nu Kadenan kanu Isa al-Masih sa kapangurban na mibpasad sekanin. Dikena pagidsan nu kinabaluy nin kanu manga tupu nu Libi sa kapangurban ka da sekanin 'bpasad sa entu. Ka nia man nakadalem kanu kitab kanu kinabaluy nu Isa al-Masih sa kabpangurban na
“Inibpasad'u Mapulu
i ‘Seka su mangurban taman sa taman.’
Na di nin den bagun su entu.”
22 Na sabap sa entu na sia kanu Isa al-Masih na makatalanged tanu sa labi i kapia nin a kapasadan nu Kadenan. 23 Na liu pan sa entu, na su danden a 'bpamangurban na madakel kagina pedsambi-sambi ka uman pebpatay su sakataw na 'gkasambian menem'u sakataw. 24 Ugaid'a su Isa al-Masih na su kabpangurban nin na dala kapegkapupus'in kagina 'bpaguyag-uyag sekanin taman sa taman. 25 Tembu ba magaga nin a benal lemipuas sa talutup su apia entain a taw a pedsupeg kanu Kadenan sia makanggulalan sa lekanin kagina 'bpaguyag-uyag sekanin taman sa taman ka enggu makapamagelet sa lekitanu sia kanu Kadenan.
26 Na maya ba kanu Isa al-Masih i nasisita tanu a mapulu sa langun nu 'bpamangurban. Ka suti sekanin, dala tila nin, dala kabaladusan nin, inipitas sekanin kanu manga baladusa enggu inipulu sekanin sa lawan pan kanu kapulu nu langit. 27 Dikena sekanin pagidsan nu ped a mapulu sa langun nu 'bpamangurban a nasisita nin pan a 'gkurban kanu uman-uman gay sabap kanu kabaladusan nin unan nu kagkurban nin kanu kabaladusan nu manga taw ka su Isa al-Masih na nakaisa bu i kinagkurban nin ka su kinagkurban nin bu kanu ginawa nin sabap kanu kabaladusan nu taw. 28 Na su manga taw a binaluy a mapulu sa langun nu 'bpamangurban sia luyud kanu kasuguan na aden kalubayan nin. Ugaid'a ulian nu kinaenggay nu Kadenan kanu kasuguan na inibpasad'in i baluyn nin sa mapulu sa langun nu 'bpamangurban su Tunggal'in a binaluy a talutup taman sa taman.