6
1-2 Kagina ka maitu na nia dait na di tanu den 'bpapalumanan mangagi su manga nauna a napangagian tanu den pantag kanu Isa al-Masih. Di tanu den 'bpapalumanan mangagi su nakapamandu den sa lekitanu a mana su kataligkud kanu manga galebekan a dala katagan nin, su pantag kanu kasalig kanu Kadenan a natawan nu den, su atulan pantag kanu kapedsalawat,a su kapendapenet kanu taw, su pantag kanu kambibiag 'bpaluman nu namamatay atawa ka su pantag kanu kakukum kanu taw taman sa taman. Ka makin tanu temalus mangagi kanu mangadalem a 'bpangagian pantag kanu Isa al-Masih.b 3 Na entu ba i enggulan tanu amaika miug su Kadenan.4-6 Kagina su manga taw man a nakatuntay den kanu bantang taman sa natekawan nilan den su palihala a ebpun sa sulega enggu natalima nilan den su Suti a Ruh enggu natekawan nilan den su kapianan nu kadtalu nu Kadenan taman sa nagedam'ilan bun su manga kabarakatan a ebpun kanu Kadenan a ipayag sa talutup sia kanu mangauli den a gay ugaid'a ulian nu entu ka taligkudanan nilan bun su Kadenan na malegen den silan pambalinganen sa kadtaubat'ilan kanu Kadenan kagina su entu a manga taw na timbang a initutuk'ilan 'bpaluman su Tunggal'u Kadenan kanu kayu a pinambalawaga enggu pinagkaya nilan kanu madakel a taw.
7 Na mana tanu bun man su lupa a pinambalilidseki nu Kadenan a tatap 'bpagulanan a nia mamangetu lun na su manga pamumulan a makadtabang kanu manga gumagalebek lun. 8 Ugaid'a amaika nia lupa i nia mamangetu lun na utan a sudangen, na su entu a lupa na dala katagan nin. Di den mauget na idsinta nu Kadenan su entu a lupa taman sa binasan nin sa apuy.
9 Ugaid'a apia ka maitu i kangadtalu nami na natalatantu nami sa lekanu a manga lusud'ami sa tian a papedtayan i dikena kanu maitu kagina katawan nami i nia nu den penggulan na su ngin i dait kanu taw a nalipuas den. 10 Ka matidtu man su Kadenan, di nin kalipatanan su manga pinggula nu enggu su kakalimu nu sa lekanin a sampay saguna na ipebpagilay nu bun sia pakanggulalan kanu kapedtabang'u kanu manga pagidsan nu a sinuti nu Kadenan. 11 Na nia nami kalilinian na uman i isa sa lekanu na magapas sa kapapanalus'in kanu entu taman sa kapupusan ka enggu nu matalanged i matalima nu su 'gkainam'a ginawa nu. 12 Tembu da kanu 'bpauk-pauk ka makin nia nu ilingi na su manga taw a natalima nilan su manga inibpasad'u Kadenan sia nakanggulalan kanu kinasalig'ilan enggu kinatigkel'ilan.
Su Pasad'u Kadenan na Natatalanged
13 Na nia nu ilay na su kinabpasad'u Kadenan kanu Ibrahim, na su ingala nin mismu i inusal'in sa kinabpasad'in kagina da den lemawan pan sa entu 14 sa nia nin inibpasad na “Natalatantu a palihalan ku seka enggu pagkadakelen ku su tupu nengka.”c 15 Na ulian nu kinatigkel magingapa nu Ibrahim na natalima nin su entu a pasad'u Kadenan.
16 Na su taw na amaika pedsapa na sia nin i entu penggulan kanu adapan nu mapulu pan sa lekanin ka amadan i entu sa tumanen nin su ngin i inibpasad'in ka enggu su ngin i di 'bpagayunan na matebped den su entu. 17 Na maitu bun ba su Kadenan, sabap sa kapegkiug'in sa makapailay nin kanu manga taw a makatalima kanu pasad'in i saben-sabenal a di madsalin-salin su kahanda nin na tinalanged'in su entu sa ukit a kinabpasad'in, 18 ka enggu sia makanggulalan kanu pasad'in enggu su kadtalu nin a di madsalin-salin sabap sa dala sa lekanin su kambudtud na su sekitanu a sinemupeg mangeni sa lekanin sa tabang na 'gkabagel su salig tanu sa matalima tanu su entu a 'gkainam tanu. 19 Na su entu a inam na kasaligan enggu mabagel a mana bun palibatu kanu uyag-uyag tanu.d Na entu ba i makaagak sa lekitanu sa kaludep tanu lu kanu bala nu kurtinae a su adapan nu Kadenan. 20 Na minuna den lu su Isa al-Masih ka enggu makapamagelet sa lekitanu lu kanu Kadenan ka sekanin man i mapulu sa langun nu 'bpamangurban sa lekitanu taman sa taman a mana bun su kinabaluy kanu Milkisidik sa kabpangurban.