5
Na uman i mapulu sa langun nu 'bpamangurban na pinamili sekanin ebpun kanu pagidsan nin bun a manusia asal'a makagkurban nin kanu Kadenan su manga inenggay nu manga taw enggu su ipegkurban kanu manga kabaladusan nilan. 2 Na katawan nin pembitiala sa mananaw su manga taw a kulang i kasabut'in enggu pamakasibay sa dikena pedtibaban kagina manusia bun sekanin a aden kalubayan nin. 3 Na kagina ka aden bun kalubayan nin na nasisita nin bun a 'gkurban kanu manga kabaladusan nin a mana bun su kapegkurban nin kanu manga kabaladusan nu manga taw. 4 Na liu pan sa entu, na dala man taw a sekanin demun i mamili sa ginawa nin asal'a mabaluy a mapulu sa langun nu 'bpamangurban ka su Kadenan bu i mapakay a mamili sa entu a mana bun su kinapamili nin kanu Harun.a5 Na maitu bun ba su Isa al-Masih na dikena nin inipulu i ginawa nin asal'a mabaluy sekanin a mapulu sa langun nu 'bpamangurban ka su Kadenan i namili sa lekanin. Ka nia man pidtalu nu Kadenan sa lekanin na
“Seka su Tunggal a wata ku,
saguna na ipebpayag ku i saki su Ama nengka.”b
6 Na pidtalu bun nu Kadenan sia kanu kitab i
“Seka su mangurban taman sa taman
a mana su kinabaluy kanu Milkisidik sa kabpangurban.”c
7 Na kanu timpu a 'bpaguyag-uyag pan su Isa al-Masih sia sa dunia na nangeni-ngeni sekanin kanu Kadenan a 'bpaguguliang sa matanug ka 'gkatawan nin man i su Kadenan i makapalipuas sa lekanin kanu kapatay. Na sabap sa inibaba nin i ginawa nin sa ukit a kinabpatiunut'in kanu kiug'u Kadenan na pinakikineg sekanin nu Kadenan. 8 Ka apia sekanin man su Tunggal'u Kadenan na migkataw sekanin sa kabpatiunut kanu Kadenan sia nakanggulalan kanu kamalasayan a natala nin. 9 Na sabap sa entu na natalutup sekanin kanu kahanda nu Kadenan tembu nabaluy sekanin a 'gkabpunan nu da taman nin a kalipuasan nu apia entain a maginugut sa lekanin, 10 ka binaluy man sekanin nu Kadenan a mapulu sa langun nu 'bpamangurban a mana bun su kinabaluy kanu Milkisidik sa kabpangurban.
Su Kapaingat pantag kanu Kataligkud kanu Kadenan
11 Na madakel pan i madtalu nami pantag sa nia ugaid'a malegen pedsinantalen sa lekanu kagina mana migkalubay su katuntay nu saguna. 12 Ka saguna na nia man dait sa lekanu na 'bpamamandu den kanu ped ugaid'a mana su nasisita nu pamun i mapamandu kanu 'bpaluman kanu manga nauna a napangagian nu den pantag kanu kadtalu nu Kadenan. Mana kanu pamun bagu ginememaw a nia nin pamun kauyagan na gatas ka di kanu pamun mapakay a pakanen sa mangategas a pegken. 13 Na su maitu ba a taw a gatas pamun i dait a ibpaguyag lun na mana pamun sekanin bagu ginememaw a wata a di mataw mapadsenggaya u ngin i mapia enggu mawag. 14 Ugaid'a su taw a mangategas den i makan nin na mana bun su taw a matua den i kapagitung'in a nabibit'in den i ginawa nin sa kapadsenggaya sa mawag enggu mapia.