4
Na apia ka maitu na mapakay pamun a matalima su kapangintelenen a inibpasad'u Kadenan. Tembu pangingatan tanu i aden sa lekitanu i di makatalima sa entu. 2 Ka napangusiatan tanu bun man sa mapia a tutuma a mana bun su inipangusiat kanilan ugaid'a naawan na katagan su entu kagina dala salig'ilan, dikena mana su manga taw a sinemalig. 3 Na su sekitanu a namedsalig na 'gkatalima tanu su entu a kapangintelenen a ebpun kanu Kadenan ugaid'a su di 'bpamaginugut na dili nilan matalima su entu. Ka mana bun su kadtalu nu Kadenan a“Sabap kanu lipunget ku na inibpasad ku
i di nilan matalima su kapangintelenen a ebpun sa laki,”a
apia nia nin kaaden i aden den su entu iganat pan kanu timpu a kinapasad mangaden kanu dunia. 4 Kagina nalabit bun sia kanu kitab su pantag kanu ikapitu gay sa nangintelenen su Kadenan kanu ikapitu nin gay ulian nu kinapasad'in mangaden kanu langun nu pinangaden nin.b 5 Ugaid'a nadtalu bun kanu kitab i “Saben-sabenal a di nilan matalima su kapangintelenen a ebpun sa laki.”c 6 Su manga taw a entu a napangusiatan paganay kanu mapia a tutuma na dala nilan matalima su kapangintelenen a entu sabap sa dala nilan kapaginugut. Ugaid'a aden pamun ped a taw a mapakay a makatalima kanu entu a kapangintelenen. 7 Tembu su Kadenan na sinemenggay pamun sekanin sa ped a timpu a mana su saguna a timpu. Kagina nia kadtalu nu Kadenan sia nakanggulalan kanu Daud guna maipus su manga timpu a mana su nalabit ku a entu a
“Amaika makineg'u saguna su suala nu Kadenan
na di nu mapadtegas i pamusungan nu.”d
8 Ka amaika nagaga bu man nu Yusuae paganay sa matalima nu manga taw su entu a kapangintelenen, na di den guna edtalun nu Kadenan i aden pan ped a gay. 9 Na nia nin maena na aden pamun naadil a kapangintelenen kanu manga taw nin a mana bun su kapangintelenen kanu ikapitu nin gay. 10 Kagina apia entain i makatalima kanu kapangintelenen a ebpun kanu Kadenan na makapangintelenen bun sekanin kanu manga galebekan nin a mana bun su kinapangintelenen nu Kadenan kanu kinapasad'in mangaden kanu langun. 11 Na kagina ka maitu na paginapasen tanu i katalima tanu kanu entu a kapangintelenen. Ugaid'a amaika semungkang tanu a mana su manga taw paganay a dala paginugut kanu Kadenan na di tanu bun matalima su entu a kapangintelenen.
12 Ka su kadtalu man nu Kadenan na bibiag, barakat enggu magalang pan sa sundang a dua embala i galangan nin. Na 'bpelambas su entu kanu atay nu taw a mana galangan nu sundang a papebpitas kanu embuku-bukuan nu badan taman den kanu didalem'u tulan. 'Bpelambas kanu itungan enggu pamusungan nu taw ka ipayag'in su dalem'u entu magidsan i mawag enggu mapia. 13 Dala man makapagena kanu Kadenan ka talus-lambas i kapegkailay nin lun. Na mauma tanu man lu sa lekanin su langun na pinggalebek tanu.
Su Isa al-Masih su Mapulu tanu sa Langun a 'Bpangurban a Labi a Mabagel
14 Kagina ka maitu sa aden mapulu sa langun nu 'bpamangurban sa lekitanu a nakaludep lu sa sulega a labi a mabagel a mana su Tunggal'u Kadenan a su Isa al-Masih, na di tanu pitasen su salig tanu sa lekanin. 15 Ka sekanin a mapulu sa langun nu 'bpamangurban sa lekitanu na 'gkatawan nin u ngin i 'gkagedam tanu kanu langun na 'gkatala tanu a kalubayan kagina napagukit-ukitan nin bun su langun na bataluan a 'gkatala tanu apia nia nin kaaden i dala sekanin endusa. 16 Tembu di tanu magalang-alang semupeg kanu Kadenan a sangat i kakalimu nin a lu kanu kulesi nin ka enggu tanu matalima su lat a nanam'in enggu magedam tanu su da idsan nin a limu nin a makadtabang sa lekitanu sa uman tanu pakanasisita.