Su Isa al-Masih a Tunggal'u Kadenan enggu su Musa a Panunugun
3
Kagina ka maitu manga lusud ku sa tian a sinuti nu Kadenan enggu su pagidsan ku a inenggat'u Kadenan sa kapaginugut sa lekanin na itagu nu sa ginawa su Isa al-Masih. Sekanin su sinugu nu Kadenan sia sa lekitanu enggu sekanin su mapulu sa langun nu 'bpamangurban a 'bpaginugutan tanu. 2 Matidtu sekanin kanu sinemugu lun a mana su Musa a matidtu a panunugun sia kanu langun nu taw nu Kadenan. 3 Ugaid'a su Isa al-Masih i labi a badtugen kumin kanu Musa ka mana bun su pembalayn a nia labi a 'bpamedtan na su mimbalay lun kumin kanu pimbalay. 4 Na su langun man na walay na aden mimbalay lun ugaid'a nia nangaden kanu langun-langun na su Kadenan. 5 Na su Musa na matidtu a panunugun nu Kadenana kanu langun nu taw nin enggu su manga galebekan nin na pakapayag'in su katigan nu Kadenan sa kanu mangauma pan a timpu. 6 Ugaid'a su Masih na dikena panunugun ka Tunggal'u Kadenan sekanin a matidtu a 'bpangulu kanu langun nu taw nu Kadenan. Na sekitanu su manga taw nu Kadenan amaika ka papanalusen tanu sa dala gilek'in su kabpagangapa tanu kanu 'gkainam tanu a unut su kabpemamasela tanu lun.Su Kapaingat kanu manga Taw a di 'Bpamaginugut kanu Kadenan
7 Na mana bun su katigan nu Suti a Ruh a
“Amaika makineg'u saguna su suala nu Kadenan
8 na di nu mapadtegas su pamusungan nu, dikena mana su pinggula nu manga kalukesan nu a sinemungkang silan
ka binatalub nilan su Kadenan kanu timpu a lu silan kanu tawan-tawan a dalepa
9 sa nia kadtalu nu Kadenan na
‘Binatalu aku nu manga kalukesan nu
apia nailay nilan demun su kangagaipan a pinggula ku kanu dalem'u patpulu lagun.
10 Tembu nalipungetan ku su nan a manga taw
enggu nia ku nadtalu na “Lalayun man pedtangka su pamusungan nilan sa laki
enggu di nilan pedtuntayan su manga ukit ku.”
11 Tembu sabap kanu lipunget ku na inibpasad ku i
“Di nilan matalima su kapangintelenen a ebpun sa laki.” ’ ”c
12 Kagina ka maitu manga lusud ku sa tian na pangingati nu i aden sa lekanu i kaadenan na pamusungan a dikena mapia enggu di maginugut a punan a katangka kanu kaisa-isa nin a Kadenan. 13 Ugaid'a makin nia nu enggula na pagkabagelen na uman i isa i manggiginawa nu ped'in kanu uman-uman gay taman sa aden pan kutika ka enggu dala sa lekanu i kapagakalan sabap kanu kabaladusan a makapadtegas kanu pamusungan nu. 14 Ka nakaampit tanu den man kanu Isa al-Masih amaika papanalusen tanu sa tidtu-tidtu su salig tanu sa lekanin iganat sa ganatan taman sa kapupusan. 15 Ka mana bun su nakadalem kanu kitab a
“Amaika makineg'u saguna su suala nu Kadenan
na di nu mapadtegas su pamusungan nu, dikena mana su pinggula nu manga kalukesan nu a sinemungkang.”d
16 Na entain ba man su manga taw a nakakineg kanu suala nu Kadenan ugaid'a sinemungkang bun silan? Dikena ba su manga taw a pinangunanan nu Musa sa kinaliu sa dalepa a Egypt? 17 Entain ba su nalipungetan nu Kadenan kanu dalem'u patpulu lagun? Dikena ba su manga taw a mimbaladusa sa lekanin a namamatay lu kanu tawan-tawan a dalepa? 18 Entain ba i pidtaluan nu Kadenan sa ibpasad'in i di nilan matalima su kapangintelenen a ebpun sa lekanin? Dikena ba su manga taw a sinemungkang sa lekanin? 19 Kagina ka maitu, na mapayag a benal i da nilan matalima su kapangintelenene a ebpun kanu Kadenan sabap sa da nilan kasalig kanu Kadenan.