Su Isa al-Masih i 'Bpangulu kanu manga Taw sia kanu Kalipuasan
2
Kagina ka maitu na nia dait na itagu tanu a benal sa ginawa su natuntayan tanu a entu a tidtu a panduan ka enggu di tanu makatangka lun. 2 Ka apia su katigan nu Kadenan a inisampay nin sia nakanggulalan kanu manga malaikat na inibpaliugat i kanggulalan lun enggu apia entain i semungkang lun na makatalima sa kasiksan a makawagib sa lekanin, 3 na labi lawan den i matalima tanu a kasiksan amaika di tanu itagu sa ginawa su balapantag a benal a nia a kalipuasan a nia lun muna-muna a minayag na su Mapulu a su Isa al-Masih enggu inipaamad sa lekitanu su entu nu manga taw a nakakineg lun. 4 Inipaamad bun sa lekitanu su entu nu Kadenan sia nakanggulalan kanu embalang-balang a kangagaipan a nanganggula enggu kanu manga kapegkagaga a inenggay nu Suti a Ruh sia luyud kanu kahanda nin.5 Ka dikena man su manga malaikat i inenggan nu Kadenan sa kapangulu kanu pedtalun nami a makatingguma a bagu a dunia ka su manusia. 6 Ka nia nakadalem kanu kitab na
“Entain su manusia a 'bpagitungen nengka pan?
Entain ba silan a pedtiakapan nengka pan?
7 Binaluy nengka silan a mababa kanu manga malaikat sa nangagan bu a kutika
ugaid'a binadtug'engka silan enggu inipulu nengka a mana su datu.
8 Pinandatuan nengka kanilan su langun-langun.”a
Na amaika nadtalu a pinandatuan kanilan su langun-langun na nia nin maena na dala inisama nu Kadenan a dala kandatui nu manusia. Ugaid'a di tanu pamun 'gkailay saguna su kapendatu nu manusia kanu langun-langun. 9 Ugaid'a sia kanu Isa al-Masih na nailay tanu i inibaba sekanin nu Kadenan sa nangagan bu a kutika kumin kanu manga malaikat ka enggu sekanin matay sa kapianan nu manusia sia luyud kanu dala idsan nin a limu nu Kadenan. Ugaid'a saguna na binadtug sekanin enggu inipulu sekanin nu Kadenan sabap kanu kinatala nin a entu sa kapatay. 10 Na su Kadenan a nangaden kanu langun-langun enggu pinangaden nin su entu sabap sa lekanin na sia kanu kaagak'in kanu manga nabaluy a wata nu Kadenan sa kaampit kanu kabadtugan nin na dait man a benal su pinggula nin a entu a kinasugut'in sa kalasay nu Isa al-Masih asal'a maadil sekanin sa tidtu-tidtu sa kapangulu nin kanu manga taw sia kanu kalipuasan. 11 Na su Isa al-Masih a minikelas sa lekitanu na nabaluy den a Ama tanu su Ama nin. Tembu di nin ipegkaya i kapedtimbang'in sa lekitanu sa manga lusud'in sa tian. 12 Ka nia nin kadtalu kanu Ama nin na
“Ipayag ku kanu manga lusud ku sa tian su makapantag kanu ingala nengka.
Sia kanu umpungan nu 'bpamaginugut na edsengal aku sa kapugi sa leka.”b
13 Nia nin pan pidtalu na
“Semalig aku sa lekanin.”c
Pidtalu nin bun i
“Nia aku a kaped ku su manga taw a nabaluy a wata nin a inisalig'in sa laki.”d
14 Na kagina ka su langun nu nabaluy a manga wata nu Kadenan na manusia, na nabaluy bun sekanin a manusia ka enggu sia makanggulalan kanu kapatay nin na matalaw nin su Saitan a nadsabapan nu kapatay nu manusia. 15 Na amaika maitu na makapambaya-baya nin su manusia a nangaulipen na gilek sa kapatay kanu dalem'u kabpaguyag-uyag'ilan sa dunia. 16 Nia nin maena na mapayag a benal i dikena nia nin kinasia i su manga malaikat i pedtabangan nin ka nia nin pedtabangan na su manga tupu nu Ibrahim. 17 Tembu namba i sabap'in i dait a nabaluy sekanin a manusia a mana bun kanu manga initimbang'in sa lusud'in sa tian ka enggu sekanin mabaluy a malimu enggu matidtu a mapulu sa langun nu 'bpamangurban kanilan sia kanu Kadenan. 'Gkurban sekanin asal'a maampun su kabaladusan nu manga taw. 18 Na sabap sa sekanin mismu na natala nin su kamalasayan enggu sasat na magaga nin a benal edtabang su manga taw a pedtala bun sa sasat.