Sulat kanu Manga Taw a Hibru
Su Kadtalu nu Kadenan na sia Nakanggulalan kanu Tunggal'in
1
Kanu paganay na inisampay nu Kadenan su manga katigan nin kanu manga kalukesan tanu sa madakel a ukit enggu madakel a timpu sia nakanggulalan kanu manga nabi nin. 2 Ugaid'a kanu nangauli den a nia a manga timpu na inisampay nin sa lekitanu su katigan nin sia nakanggulalan kanu Tunggal'in. Su Tunggal'in ba a nia i pinamili nin a pebpusakan kanu langun-langun enggu sia nakanggulalan kanu Tunggal'in i kinapangaden nin kanu langun-langun. 3 Su sigay nu Kadenan na 'gkailay kanu Isa al-Masih enggu sia nakanggulalan sa lekanin na 'gkailay sa talutup u entain su Kadenan. Pebpapanalusen nin su langun-langun sia makanggulalan kanu kabarakat'u kadtalu nin. Na ulian nu kinalimpiu nin kanu taw sia kanu manga kabaladusan nilan na nagagayan sekanin kanu tampal sa kawanan nu Kadenan a Barakat a lu sa sulega. 4 Tembu sekanin na labi lawan i kapulu nin kumin kanu manga malaikat enggu su ingala a inenggay lun na labi i kabalapantag'in kumin kanilan.Su Tunggal na Mapulu pan kumin kanu manga Malaikat
5 Ka apia sakataw kanu manga malaikat na dala pidtaluan nu Kadenan sa
“Seka su Tunggal a wata ku,
saguna na ipebpayag ku i saki su Ama nengka.”a
Na dala bun edtalua nu Kadenan kanilan i
“Saki i mabaluy a ama nengka enggu seka menem i mabaluy a wata ku.”b
6 Na su kinapasia nu Kadenan sa dunia kanu Tunggal'in na nia nin pidtalu na
“Dait a simban sekanin nu langun nu malaikat ku.”c
7 Na nia menem pidtalu nu Kadenan pantag kanu manga malaikat'in na
“Su manga malaikat na mabaluy ku silan a sambel
enggu su silan ba a entu a panunugun ku na mabaluy ku silan a apuy.”d
8 Ugaid'a nia nin kadtalu pantag kanu Tunggal na
“Su Kakadenan ku na san sa leka, su kulesi nu kadatu nengka na taman sa taman
enggu matidtu su ukit'u kapendatu nengka.
9 'Gkasuatan nengka su ngin i mapia enggu 'gkabensian nengka su ngin i mawag.
Tembu su Kadenan a Kadenan nengka na pinamilie ka nin.
Binadtug ka nin enggu inenggan ka nin sa kapia na ginawa a labi lawan pan kumin kanu langun nu kaped'engka.”f
10 Na pidtalu bun kanu Tunggal'u Kadenan i
“Hu Mapulu, sia kanu punan-punan
na seka demun i nangaden kanu langit enggu lupa.
11 Na su entu na mapupus bun ugaid'a seka na dala kapegkapupus'in taman sa taman.
'Gkalabing bun su entu a mana balegkas.
12 Lulunen nengka su entu
ka sambian nengka sa mana bun su kapedsambi kanu balegkas a da den katagan nin.
Ugaid'a seka na dili embagu,
su uyag-uyag'engka na dala kapegkapupus'in.”g
13 Na apia entain kanu manga malaikat na dala pidtaluan nu Kadenan sa
“Ayan ka sia tampal kanu kawanan ku
enggu pasugiuden ku su manga kuntela nengka kanu palad'u ay nengka.”h
14 Nia nin maena na su manga malaikat'u Kadenan na panunugun nin bu silan a di 'gkangailay, sinugu silan sa katiakap kanu manga taw a makatalima sa kalipuasan.