Sulat kanu Manga Taw a Hibru
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na di 'gkasigulu u entain i sinemulat lun. Nia antapan nu ped a manga alim na nia 'gkatumpan nu nia a sulat na su manga taw a Yahudi a 'bpamaginugut kanu Isa al-Masih. Su ped kanu 'bpamaginugut sia na mana pegkiugan nilan pembalingan su danden a ukit'u manga taw a Yahudi sia luyud kanu danden a kapasadan. Tembu pegkiugan a benal papedtuntay nu sinemulat sa nia u ngin i kabalapantag'u bagu a kapasadan nu Kadenan (kumin kanu danden a kapasadan nu Kadenan). Na ipebpagilay kanu nia a sulat i su danden a kapasadan na inenggay nu Kadenan su entu sia nakanggulalan kanu manga malaikat sa ukit'a kinapasampay nilan lun kanu manga nabi. Ugaid'a su bagu a kapasadan nu Kadenan na inenggay nin demun sia nakanggulalan kanu Tunggal'in a su Isa al-Masih. Na su danden a kapasadan na gagalu bu su entu enggu nia nin katagan na kapagadil kanu manga taw sa kasangul'ilan kanu bagu a kapasadan nu Kadenan a su talutup a ukit'a kalipuasan sia makanggulalan kanu Isa al-Masih. Papedtuntayan nu sinemulat kanu nia su kabalapantag'u Isa al-Masih enggu labi lawan pan sekanin kumin kanu manga malaikat, kanu Nabi Musa enggu kanu mapulu sa langun nu 'bpamangurban. Su pinggula nin na labi lawan pan kumin kanu manga pinggula a kurban nu manga mapulu sa langun nu 'bpamangurban sa ukit a kaampun kanu kabaladusan nu manga Yahudi. Kagina su Isa al-Masih man i talutup a kurban a ebpun kanu Kadenan a makaaun sa kanarakan kanu apia entain a semalig sa lekanin. Su Isa al-Masih i mapulu sa langun nu 'bpamangurban enggu dala kapegkapupus'u kabpangurban nin.
Nia pan kahanda sa kinasulat sa nia na asal'a masekat su 'bpamaginugut sa kagkabagel'u salig'ilan kanu Isa al-Masih enggu di nilan embalinganan su danden a ukit'ilan sa apia nia nin kaaden i temala pan silan sa kapamungkaid. Ka papanalusen nilan su salig'ilan kanu Isa al-Masih ka enggu silan malipuas kanu nanget a kasiksan enggu matalima nilan su tidtu-tidtu a kapangintelenen sia kanu Kadenan. Su Isa al-Masih man su kadtalu nu Kadenan enggu sekanin su tidtu-tidtu a inam tanu. Sekanin su talanged a 'bpamagelet sa lekitanu kanu Kadenan enggu sekanin i talutup a kurban kanu Kadenan sa kaampun kanu manga kabaladusan tanu. Sekanin su tidtu-tidtu a inipayag'u Kadenan a kalipuasan tanu sia kanu bagu a kapasadan nin.