Sulat'i Bulus kani Pilimun
Su Salam
1
Saki si Bulus a nabilanggu sabap kanu Isa al-Masih. Su nia a sulat na ebpun sa laki enggu kanu suled tanu sa paginugut a si Timuti.San pakatumpa sa leka Pilimuna a pinadtaya nami a tagapeda nami sa galebekan, 2 apeg den ni Appia a suled tanu sa paginugut a babay enggu kani Arkipu a tagapeda tanu sa kabpaninindeg kanu Mapia a Tutuma taman den kanu lumpukan nu 'bpamaginugut a pendidilimudan san kanu walay nengka. 3 San sa lekanu su da idsan nin a limu enggu kalilintad a ebpun kanu Ama tanu a su Kadenan enggu kanu Mapulu a su Isa al-Masih.
Su Kinadsukul-sukul'i Bulus pantag kanu Salig'i Pilimun
4 Uman ku seka ibpangeni-ngeni na tatap aku 'bpanginsukul kanu Kadenan a pedsimban ku 5 kagina nakineg ku su makapantag kanu kapedsalig'engka kanu Mapulu a su Isa al-Masih enggu su kapegkalimu nengka kanu langun nu 'bpamaginugut.b 6 Na nia ku ibpangeni-ngeni na sia kanu ukit a kasabut'engka kanu langun na mapia a inenggay sa lekitanu a lusud kanu Isa al-Masih na kadsisinggumanan nengka su kapangalimuan nengka a unga nu kapedsalig'engka. 7 Manga dua na suled, su limu nengka na sangat a nakagalaw sa laki taman sa migkabagel su atay ku kagina pinagkapia nengka su manggiginawa nu 'bpamaginugut.c
Su 'Bpangenin ni Bulus makapantag kani Unisimu
8 Kagina ka maitu na sabap kanu bagel a nakasangan sa laki nu Isa al-Masih na mapakay a benal a sugun ku seka sa u ngin i dait a enggulan nengka 9 ugaid'a sabap sa ipegkalimu ku seka na 'bpangeni aku den sa leka. Na saki si Bulus a sinuguc nu Isa al-Masih a sia sa bilangguan saguna sabap kanu Isa al-Masih, 10 na pakapangeni aku sa leka makapantag kani Unisimu a nabaluy a wata ku sa paginugut sa kanu kinabilanggu ku a nia. 11 Kanu paganay na dala pakangguna ni Unisimud sa leka ugaid'a saguna na aden den makangguna nin sa lekita dua. 12 Papembalinganen ku sekanin san sa leka, na sangat a pinadtaya ku sekanin. 13 Na apia ka maitu na nia ku 'gkalilinian na sia demun sekanin sa laki ka asal'a su kapedtabang'in sa laki na timbang a seka bun i pedtabang sa laki sa gagalu na sia aku pan sa bilangguan sabap kanu kabpangusiat ku kanu Mapia a Tutuma. 14 Ugaid'a di ku enggulan i entu amaika di ka makaayun kagina di ku 'gkalilinian i mapanegel ku seka sa kadtabang'engka sa laki ka nia ku 'gkalilinian na senep sa atay su kanggula nengka sa entu.
15 Na aden a entu na nia sabapan a kinapitas'in sa leka gagalu na asal'a kanu kambalingan nin na madtagapeda nengka sekanin taman sa taman 16 sa dikena matag ulipen bu ugaid'a suled'engka a papedtayan. Pinadtaya ku sekanin ugaid'a labi i kapadtaya nengka lun sa dikena matag ulipen bu ka suled ta sia kanu Mapulu a su Isa al-Masih. 17 Na kagina ka ipedtimbang aku nengka sa tagapeda nengka sa galebekan na talima ka sekanin sa mana bun saki i pedtaliman nengka. 18 Amaika aden nganin-nganin a manga kalugian nengka sabap sa lekanin atawa ka manga utang'in sa leka na sia ka den pangetuk sa laki. 19 Saki si Bulus a sinemulat demun kanu nia a “Saki mismu i mayad lun.” Di den dait a labiten ku pan i sabap sa laki na natawan nengka su tidtu a lalan. 20 Manga dua na suled, benal man a mapia amaika aden makangguna nengka sa laki sia kanu Mapulu a su Isa al-Masih. Pagkapia ka pan su manggiginawa ku a lusud'engka sa tian sia kanu Isa al-Masih.
21 'Gkatalanged ku a benal i inggulalan nengka su nakadalem kanu sulat ku a nia enggu katawan ku bun i subela pan su kanggulalan nengka lun. 22 Nia pan liu sa entu, na pagadili aku nengka sa bilik a katumpan ku ka 'gkainam ku i pambalinganen aku nu Kadenan san sa lekanu sia makanggulalan kanu kabpangeni-ngeni nu sa laki.
23 Pedsalamen ka ni Ipapras a nia a tagapeda ku bun a bilanggu sabap kanu Isa al-Masih. 24 Pedsalamen ka bun nu manga tagapeda ku sia sa galebekan a mana si Markus, si Aristarkus, si Dimas enggu si Luk.
25 San sa lekanu su dala idsan nin a limu nu Mapulu a su Isa al-Masih.
Wassalam