Yakub 1

Sulat'i Yakub

Su Salam

Salam sa lekanu, saki si Yakub a ulipen nu Kadenan enggu ulipen nu Isa al-Masih a Mapulu tanu. Su nia a sulat na san pakatumpa sa lekanu a sapulu enggu dua a tupu nu Israil a namakapayapat kanu manga dalepa.

Su Tidtu-tidtu a Salig enggu su Ilemu a ebpun kanu Kadenan

2 Manga lusud ku sa tian, uman kanu temala sa apia ngin a bataluan na itimbang'u su entu sa tidtu-tidtu a kapia na ginawa. 3 Kagina katawan nu na uman pembatalun su salig'u na 'bpangiseg bun su katigkel'u. 4 Palalayun nu su katigkel'u ka enggu 'gkatua su itungan nu enggu di kanu katilan taman sa da den kulang'u uyag-uyag'u.

5 Na amaika aden sa lekanu i kulang i katuntay nin sa panun i kapaguyag-uyag a makasuat kanu Kadenan na ipangeni-ngeni nin su entu ka inggay man nu Kadenan i entu sa lekanu kagina malimu su Kadenan. 'Bpangenggay sekanin kanu langun nu manga taw, di nin 'bpalawan su apia entain a mangeni lun. 6 Na sia kanu kapangeni-ngeni nu na salig kanu enggu da kanu endua-dua. Ka su taw a aden kandua-dua nin na nia nin kalagidan na mana bun su bagel a apia endaw 'gkasugat'u sambel na lu ba pakadedsa. 7-8 Na su maitu ba a taw a 'gkabad i itungan nin enggu di kasaligan i langun na ukit'in na di nin pangingalapen i aden matalima nin kanu Kadenan a Mapulu.

Su Miskinan enggu su Kawasa

9 Manga lusud ku sa tian a da 'gkagaga nin, imamasela nu kanu ginawa nu su kapulu nu Kadenan sa lekanu. 10 Maitu kanu bun ba a manga kawasa na edsukul-sukul kanu amaika ibaba kanu nu Kadenan ka mamakadalung kanu bun a mana su ulak'u pamumulanen 11 a masugat bu nu sangat i kayaw nin a senang na mangalanes den taman sa mangalubpug den enggu madala den su kapia nu palas'in. Na maitu kanu bun ba a manga kawasa, gagalu na kabpangilay nu kanu kakawasan na mamamatay kanu bun.

Su Katigkel kanu Sasat

12 Na ngin den i kapia nin kanu taw amaika kadsabalan nin su manga bataluan ka nia nin kalipus kanu entu na matalima nin su balas a su uyag-uyag a da taman nin a inibpasad'u Kadenan kanu taw a malimu lun. 13 Na di madtalu nu uman i isa i su Kadenan i pedsasat lun sia kanu kapedtala nin sa bataluan kagina su Kadenan na di manasat enggu di sekanin masasat. 14 Na 'gkasasat bu man su taw amaika 'gkaakat'u kiug'u ginawa nin taman sa unutan nin su entu. 15 Na su kiug'u ginawa a entu a 'gkapangaden kanu atay na munga sa kabaladusan, na amaika endalid su kabaladusan na makapitas den su entu a taw kanu Kadenan.

16 Manga lusud ku sa tian a papedtayan, da kanu man mapapagakal. 17 Ka su langun man a mapia enggu talutup na su Kadenan i 'bpangenggay lun a nangaden kanu pamakatayaw sa kawang-kawangan. Na apia pedsalin-salin su pamakatayaw a entu ugaid'a mana i su Kadenan na di edsalin. 18 Na mana su kahanda nin na binaluy tanu nin a manga wata nin sia nakanggulalan kanu kapaginugut kanu kadtalu nin a bantang ka enggu sia kanu langun nu pinangaden nin na sekitanu i makamana-mana paganayan a unga a su ipegkurban kanu Kadenan.

Su Kanggulalan kanu Kadtalu nu Kadenan

19 Manga lusud ku sa tian, itagu nu i nia sa ginawa, nia dait sa lekanu na pakikineg kanu sa mapia, da kanu babaya edtalu enggu da kanu malemu malipunget. 20 Kagina su kakalipunget na di makadtabang sa kabpaguyag-uyag sa ikelas a kasuatan nu Kadenan. 21 Tembu ba dait a iawa nu su langun nu galebekan a makagkaledsik kanu uyag-uyag'u enggu su mawag a palangay ka makin nia nu enggula na itagu nu sa ginawa su kadtalu nu Kadenan a inipamula kanu atay nu sa aden kababa na ginawa. Na nia man makapalipuas sa lekanu na su kadtalu nu Kadenan.

22 Na inggulalan nu su kadtalu nu Kadenan, ka 'gkadsalimbut'u su ginawa nu amaika matag'u bu 'bpamakikinegen su entu. 23 Kagina su taw a matag'in 'bpamakikinegen su kadtalu nu Kadenan ugaid'a di nin ipenggulalan na nia nin kalagidan na mana su 'bpagalung 24 a nia nin kinaganat kanu pagalungan na nalipatanan nin su palas'in. 25 Ugaid'a su taw menem a pedtuntayan nin sa mapia su kasuguan a talutup a pakaenggay sa baya-baya kanu taw enggu di nin 'bpelipatanan su entu taman sa ipenggulalan nin na palihalan sekanin kanu entu a galebekan nin.

26 Na apia entain i nia nin kapegkailay kanu ginawa nin na balaagama ugaid'a di nin 'gkakumpen su dila nin na 'gkadsalimbut'in su ginawa nin. Dala bun katagan nu kabpagagama nin. 27 Ugaid'a nia man tidtu-tidtu a kabpagagama a ikelas sia kanu na su katuludu kanu manga wata a ilu enggu su katabang kanu manga babay a balu kanu kapegkapasang kanilan enggu su kakumpen kanu ginawa sa di makaluyud kanu galebekan a kaduduniay.