Su Ula-ula a Kapambidaya
2
Manga lusud ku sa tian, di nu semimbuli sa ula-ula a kapambidaya su salig'u kanu Mapulu a su Isa al-Masih a sangat a pebpugin. 2 Na upama ka aden taw a nakauma kanu walay a pendidilimudan nu sa kasimba kanu Kadenan a nakadsising sa bulawan enggu nakambalegkas sa mapia enggu aden bun mambu nakauma a taw a miskinan a nakambalegkas sa labing, 3 na amaika nia nengka edtalun kanu nakambalegkas a entu sa mapia i “Sia ka ayan sa mapia a nia a 'bpagagayanan,” enggu nia nengka menem edtalun kanu taw a entu a dala 'gkagaga nin i “Edtindeg ka demun san ba,” atawa ka “San ka ayan sa lundang'a” 4 na amaika maitu na pakapambidaya kanu den. Winagiban nu su taw sia luyud kanu dikena mapia a 'gkapagitung'u.5 Manga lusud ku sa tian a papedtayan, pakikineg'u i nia. Dikena ba su taw a miskinan i pinamili nu Kadenan a mabaluy a kawasa sa salig enggu pebpusakan kanu kapendatu nin a inibpasad'in kanu manga taw a malimu lun? 6 Ugaid'a sekanu na da pinatagan nu kanu manga taw a miskinan. Dikena ba su manga kawasa bun ba a nan i papegkapasang sa lekanu enggu 'bpananggit sa lekanu kanu walay na kukuman? 7 Dikena ba silan bun i pedtalu-talu sa dikena mapia kanu 'bpagadatan a ngala nu Isa al-Masih a lu tanu ba nalusud?
8 Na mapia amaika ipenggulalan nu su nakadalem kanu kitab a balapantag a benal a kasuguan a “Ikalimu nengka su ped'engka sa mana bun kanu ginawa nengka.”a 9 Ugaid'a amaika mapambidaya ka na pakandusa ka bun. Masugat ka na kawagib ka nasungkang'engka pamun su kasuguan. 10 Kagina apia entain i penggulalan kanu langun na kasuguan ugaid'a aden satiman a di nin pakanggulalan na masugat bun sekanin na kawagib a mana bun su taw a nasungkang'in su langun na kasuguan. 11 Ka nia kadtalu nu Kadenan na “Da ka pegkiuga,b da ka mangimatay.”c Na amaika da ka mambu 'gkiuga ugaid'a minimatay ka na nasungkang'engka bun su kasuguan.
12 Kagina ka maitu na pangingati nu su kangadtalu nu enggu su manga galebekan nu. Ka kukumen kanu nu Kadenan sia luyud kanu kasuguan a pakaenggay sa baya-baya kanu taw. 13 Ka su taw man a dala lat a nanam'in kanu ped'in na di bun latan sa nanam'u Kadenan sa kasugat'in lun sa kawagib. Ugaid'a su taw a aden lat a nanam'in kanu kaped'in na latan bun sa nanam'u Kadenan.
Su Tidtu a Salig
14 Manga lusud ku sa tian, ngin besen i katagan nin amaika matag den pedtalun nu taw i aden salig'in inunta di nin pakanggulalan? Ngintu, makapalipuas kanu taw su maitu ba a salig? 15 Upama ka su suled'engka sa paginugut ka pakanasisita sekanin sa makan enggu di gaid pakambalegkas, 16 ugaid'a nia nengka lun pidtalu na “San sa leka su kalilintad, lu ka den ka pakausug ka keman enggu embalegkas ka” inunta na da nengka inggay sa lekanin su ngin i nasisita nin, na aden ba katagan nu entu sa lekanin? 17 Na maitu bun ba su salig amaika di inggulalan na da bun katagan nin.
18 Na aden manga taw a maya ba i kadtalu nin, “Seka na aden salig'in. Saki menem na penggalebek sa mapia.” Na nia ku madtalu sa maitu ba a taw na “Panun ba i kapailay nengka sa laki kanu salig'engka a dikena ipenggulalan? Saki na ipailay ku sa leka su salig ku sa ukit a kanggulalan ku lun.” 19 Na benal man a mapia amaika 'bpaginugutan nengka i kaisa-isa nin bu su Kadenan ugaid'a apia man su manga saitan na 'bpaginugutan nilan bun su entu taman sa pegkegkel pan silan na gilek.
20 Sekanu den i manga taw a da akal'in, ngintu, pegkiugan nu 'bpagamad i dala katagan nu salig a dikena ipenggulalan? 21 Dikena ba su kalukesan tanu a su Ibrahim na initimbang sa ikelas sabap kanu kinagkurban nin kanu wata nin a su Iskak? 22 Na entu ba i ilay nu, nagunuta su salig'in enggu su kapenggulalan nin lun, na su salig'in na natalutup sia kanu kinanggulalan nin lun. 23 Na natuman lu ba su nakadalem kanu kitab a “Initimbang'u Kadenan sa ikelas su Ibrahim sabap kanu kapedsalig'in”d taman sa pedtawagen sekanin a pakat'u Kadenan. 24 Na entu ba i ilay nu, na nia bu ipedtimbang sa ikelas na su taw a ipenggulalan nin i salig'in.
25 Na maitu bun ba su babay a sundale a si Rahab, initimbang bun sekanin sa ikelasf sabap kanu kinatabang'in kanu nangasugu sa kabpanininting ka pinatalus'in silan kanu walay nin enggu lu nin silan pinaukit kanu ped a lalan.
26 Na mana bun su badan na amaika dala ngiawa nin na minatay, na maitu bun ba su salig amaika di ipenggulalan na da bun katagan nin.