Su Kapegkagaga nu Dila
3
Manga lusud ku sa tian, nia dait na paidu bu sa lekanu i 'gkahanda sa mabaluy a mamamandu kagina katawan nu na sekami ba a nia a nasanganan sa kapamandu na nia maugat i kukuman lun nu Kadenan kumin kanu manga taw a dikena 'bpamandu. 2 Ka langun tanu na tatap a 'gkalimban, na u aden menem taw a di malimban sa kangadtalu nin na su entu ba a taw na matua i kapagitung'in enggu talutup i kapegkagaga nin pegkumpen kanu ginawa nin. 3 Na mana bun su kuda, na amaika betadan tanu sa kakang su ngali nin na magaga tanu sa apia endaw tanu kiugan mapabpawang. 4 Na ilay nu bun su manga kapal, apia ngin den i kasela nin na 'gkagaga nu manaut bu gaid a swil'in sa apia endaw nin kiugan mapabpawang apia 'gkasugat pan na mabagel a sambel. 5-6 Na maya bun ba su dila nu taw, manaut bu i nia kanu edsiap-siapan na lawas ugaid'a masela i 'gkagaga nin pembitiala. Mana bun i nia su manaut a apuy a 'gkagaga nin pedtutung su maulad a damakayu. Su dila ba a nia i nabaluy a salag'u kamustakilan kanu badan tanu a pakagkaledsik kanu ginawa tanu. Mana bun i nia apuy sa naraka a pakatutung kanu taw.7 Na su langun na embias-biasan na binatang na 'gkagaga pegkumpen nu taw iganat pan sa ganatan magidsan pan i talaw atawa ka dikena, apeg den nu manga papanuk, manga malanap-lanap taman den kanu sia sa lagat. 8 Ugaid'a su dila nu taw na dala pakagaga lun pegkumpen. Di pedtelen sa kapedtalu nin sa mawag, mana bun i nia napenu na pakapatay a duti. 9 Na su dila tanu a nia a 'bpagusalen sa kapebpugi kanu Ama tanu a su Kadenan a Mapulu na nia bun ba i 'bpagusalen tanu sa kapedsinta kanu manga taw a binaluy nu Kadenan sia luyud kanu alung-alung'in. 10 Isa bu a ngali i 'bpagusalen tanu sa kapebpugi kanu Kadenan enggu kapedsinta kanu taw. Manga lusud ku sa tian, dait a dikena tanu maitu ba. 11 Ngintu besen, mapakay a isa bu a bualan i kabpunan nu ig a tabang enggu ig a matimus? 12 Manga lusud ku sa tian, mapakay ba a munga su kayu a igus sa ulibus? Atawa ka su ubas na munga sa igus? Di man mapakay a liuwan na ig a tabang su bualan nu ig a matimus.
Su Tidtu a Ilemu na ebpun kanu Kadenan
13 Apia entain sa lekanu i aden kataw nin enggu katuntay nin na dait a ipailay nin su entu sia makanggulalan kanu kabpaguyag-uyag'in sa matidtu enggu mananaw a kambitiala a unga nu kataw nin. 14 Ugaid'a amaika nia pendatu kanu atay nu i kalait'a palangay enggu kapagitung'u bu kanu ginawa nu na di nu ipedsandag i aden ilemu nu ka pakapambudtud'u su bantang. 15 Dikena ebpun kanu Kadenan i maitu ba a ilemu ka ebpun kanu kamamanusiay ka kaduduniay i entu a ebpun kanu saitan. 16 Kagina apia endaw i kalait'a palangay enggu kapagitung bu kanu ginawa na lu bun ba su di kapamagayun enggu manga kawagan. 17 Ugaid'a amaika su ilemu ka ebpun kanu Kadenan na nia muna-muna a mailay nengka lun na su kasuti, kalilini sa kalilintad, kataw sa kapaminda enggu kapakikineg sa ped'in. Aden bun sa lekanin su lat a nanam kanu ped'in, mapia i manga galebek'in, dala sa lekanin su kapambidaya enggu kapamagigiling. 18 Na su kalilintad a inipamula nu taw a mangilay sa kapamagayun na nia nin unga na kaikelasan.