Su Katapenay kanu Ginawa sia kanu Kadenan
4
Ngin ba i sabapan na kapamagukag'u enggu di nu kapamagayun? Dikena ba sabap kanu manga mawag a 'gkapaginagkay nu atay nu a pedsusungkanga sia kanu ginawa nu? 2 Na aden 'gkapaginagkay nu, ugaid'a di nu 'gkakua tembu ba pakapangimatay kanu. Aden 'gkadsekelan na ginawa nu a di nu 'gkakua tembu ba pakapamagukag kanu. Na di nu 'gkakua su entu sabap sa di nu 'bpangenin kanu Kadenan. 3 Na apia man mangeni kanu sa lekanin, na dala matalima nu ka dikena mapia su 'bpangenin nu ka nia nu bu kabpangeni sa entu na asal'a makua nu bu su kiug'u ginawa nu.4 Sekanu a manga tinemaligkud kanu Kadenan, ngintu, 'gkatawan nu bun i amaika malilini kanu sa kaduduniay na 'gkasungkang'u su Kadenan? Tembu apia entain i nia nin tinemu na su kaduduniay na 'gkabaluy sekanin a kuntela nu Kadenan. 5 Ngintu, nia nu kataw na da katagan nu panduan a nakadalem kanu kitab sa sangat a kalinian nu Kadenan i lu bu sa lekanin su uyag-uyag a pinalangkap'in sa lekitanu? 6 Ugaid'a su Kadenan na labi a temabang sa lekitanu ka nia nakadalem kanu kitab na
“Tabangan nu Kadenan su taw a ibaba nin i ginawa nin,
ugaid'a sungkang sekanin kanu taw a ipulu nin i ginawa nin.”a
7 Tembu ba itapenay nu su ginawa nu kanu Kadenan. Sungkang'u su Saitan ka enggu kanu nin tangkan. 8 Isupeg'u i ginawa nu kanu Kadenan ka supegan kanu nin bun. Sekanu a manga baladusa a 'gkabad i itungan nin na edtaubat kanu enggu limpiu nu su ginawa nu! 9 Lidui nu sa ginawa enggu uliangi nu su kabaladusan nu. Su kapedtatawa nu na nia nu lun isambi na kapaguguliang enggu su kagalaw nu na nia nu lun menem isambi na kalidu na ginawa. 10 Ipangalimbaba nu su ginawa nu sia kanu adapan nu Kadenan a Mapulu ka ipulu kanu nin.
Di Dait a Sugaten sa Kawagib su Ped'engka
11 Manga lusud ku sa tian, di nu pedtalui sa mawag su manga ped'u, ka su edtalu sa mawag kanu ped'in atawa ka semugat sa kawagib kanu ped'in na mana nia nin bun sinungkang atawa ka sinugat sa kawagib na su kasuguan nu Kadenan. Na amaika sinugat'engka sa kawagib su kasuguan nu Kadenan na dikena ka den maitu penggulalan kanu kasuguan ka isa ka den a 'bpangukum. 12 Ugaid'a su Kadenan a minenggay kanu kasuguan na sekanin bu i 'bpangukum. Sekanin bu i makagaga mamelipuas enggu maminasa. Na amaika maitu na entain ka a pedsugat sa kawagib kanu ped'engka?
Su Kamamasela
13 Pakikineg kanu, su sekanu a pedtalu sa “Saguna bun ba a entu atawa ka namag na endadalakaw kami lu kanu entu a dalepa atawa ka siudad, na manga salagun i kadtangen nami lu ka enggu kami makapantiali sa masela.” 14 Nia nin kabantang na di nu pamun katawan u ngin i manggula namag. Ka su umul tanu na mana bun su lenus a pakakayang bu su senang na 'gkadadag den. 15 Tembu nia dait a edtalun nu na “U miug su Kadenan enggu malendu su umul'ami na enggulan nami i nia atawa ka entu.” 16 Ugaid'a sekanu na makin nu pan pakamamasela i kabpanigulu nu kanu manga kahanda nu. Na su namba a manga palangay na mawag a benal.
17 Kagina ka maitu na su taw a katawan nin den i ngin i mapia a dait a enggalebeken nin ugaid'a di nin bun penggalebeken na pakandusa sekanin.