Su Manggula nu manga Kawasa
5
Sekanu a manga kawasa na pamakikineg kanu! Paguguliang kanu sa matanug ka pakatingguma den sa lekanu su tidtu-tidtu a kapasang. 2 Su manga kakawasan nu na 'gkangaledak den enggu su manga balegkas'u na pegken den na pila. 3 Su manga bulawan nu enggu pilak'u na pedtangisan den. Na su tangis'u manga bulawan nu enggu pilak'u na entu bun ba i mabaluy a edsaksi sa lekanu a mana apuy a pedtutung kanu badan nu. Na namba su kakawasan a linimud'u kanu manga mauli den a gay. 4 Ilay nu! Su manga namagagani kanu sabpet'u a pidsalimbut'u enggu su sukay nilan a dala nu inggay na 'bpelalis sa matanug sungkang sa lekanu. Na su buku nilan na nakasampay kanu Kadenan a Mapulu a Barakat sa Langun. 5 Na naguyag-uyag kanu sa mapia sia sa dunia taman sa 'gkakua nu su langun na kiug'a ginawa nu. Pinagkasebud'u su badan nu a mana manga pangangayamen a pedsumbalin. 6 Sinugat'u sa kawagib su ikelas a taw taman sa inimatayan nu sa apia nia nin kaaden i dikena kanu nin 'bpagatuan.Su Katigkel enggu su Kasabal
7 Tembu sekanu a manga lusud ku sa tian, na pakatigkel kanu taman kanu kambalingan nu Mapulu.a Nia nu ilay na su 'bpangangawid a pedtigkel kanu inawidan nilan. 'Bpangapan nilan i kapegkauma nu ulan kanu inawidan nilan iganat sa kabpamula nilan lun taman sa kasabpet'ilan kanu entu. 8 Na entu ba i ilingi nu na su katigkel'ilan taman sa pakabagel'u i manggiginawa nu ka mangagan den a benal su kambalingan nu Mapulu.
9 Manga lusud ku sa tian, di nu ipembuku su ped'u ka enggu di kanu masugat'a kawagib. Ilay nu, ka masupeg den a benal su 'bpangukum ka mana nan den sa bengawan na. 10 Nia nu ilingi na su kinatigkel enggu kinadsabal'u manga nabi kanu kabpangusiat'ilan sia kanu ingala nu Kadenan a Mapulu. 11 Ilay nu, ngin den man i kapia nin kanu taw a masabal. Na nakineg'u bun su pantag kanu kinadsabal'u Nabi Ayub enggu katawan nu bun i mapia i naulianan nu entu a kasabal'in. Ka saben-sabenal man a su Kadenan a Mapulu na sangat a malat i nanam'in kanu taw enggu sangat a ikalimu nin.
12 Manga lusud ku sa tian, nia balapantag na da kanu a benal edsapa magidsan pan i makalalagit'u su sulega atawa ka su dunia. Edtalu nu den i “Uway” amaika uway enggu “Dili” amaika dili, ka enggu kanu di kukumen nu Kadenan.b
Su Pangeni-ngeni nu Taw a Senep sa Atay i Salig'in
13 Na apia entain sa lekanu i mukit sa kamalasayan na mangeni-ngeni kanu Kadenan. Apia entain i 'gkagalaw na edsengal sekanin sa kapugi kanu Kadenan. 14 Na u aden sa lekanu i pedsakit na semupeg kanu 'gkangaunutan nu lumpukan nu 'bpamaginugut ka enggu kanu nilan makapangeni-ngeni enggu kadapenetan sa lana sia kanu ingala nu Mapulu. 15 Ka su pangeni-ngeni nu taw a senep sa atay i salig'in na makapagkapia kanu taw a pedsakit taman sa pambalinganen nu Mapulu su bagel'u entu a pedsakit enggu ampunen nin pan su kabaladusan nin amaika mindusa sekanin. 16 Tembu ba ipangumpaya nu su dusa nu kanu uman i isa sa lekanu entu pan ka ipangeni-ngeni nu ka enggu kaulian su sakit'u, ka barakat su pangeni-ngeni nu ikelas a taw. 17 Mana bun su Nabi Ilias a pagidsan tanu bun a manusia, na guna pangeni-ngeni sa di mulan na nakatelu lagun enggu tenga na da ulan. 18 Na guna menem pangeni-ngeni sa mulan na minulan taman sa namakaunga su manga pamumulanen.c
19 Manga lusud ku sa tian, amaika aden sa lekanu i nakasibay den kanu bantang enggu aden nakapatidtu lun, 20 na nia dait na katuntayan nu taw a napatidtu kanu taw a baladusa i nakapalipuas'in su entu a taw kanu nanget a kapegkapitas'in kanu Kadenan taman sa mapunas pan su kabaladusan nin.
Wassalam