Su Pasad a Kambalingan nu Mapulu a su Isa al-Masih
3
Manga lusud ku sa tian a papedtayan, nia den ba i ikadua a kapedsulat ku sa lekanu. Na kanu manga sulat ku a nia sa lekanu na 'bpaginapasen ku a benal i masekat ku sekanu sa kapagitung'u sa mapia ka enggu sia makanggulalan kanu nia a manga patadem ku 2 na di nu kalipatanan su manga kadtalu nu suti a manga nabi kanu paganay enggu su manga kasuguan a inenggay nu Mapulu a 'bpamelipuas sia nakanggulalan kanu manga sinugu nin san sa lekanu. 3 Na nia masela sa entu, na dait a kasabutan nu i sia kanu manga mangauli den a gay na mamembuat su manga taw a mategel edsudi a nia nilan bu unutan na su kamustakilan a kiug'a ginawa nilan. Na edsudian kanu nilan 4 sa nia nilan edtalun na “Endaw den su inibpasad'in a kambalingan nin?a Namamatay den su manga kalukesan tanu na da bun sekanin makambalingan. Na maya bun ba su dunia iganat sa kinapangaden lun, da bun nasalin lun!” 5 Na pedtibaban nilan bun i di nilan kapegkalendem sa naaden su langit sia nakanggulalan kanu kadtalu nu Kadenan. Maitu bun su lupa sa ukit a kinapambuat'in lun kanu ig. 6 Na sia bun nakanggulalan kanu ig na bininasa nin su dunia sa ukit a kinadegan. 7 Na maitu bun ba, sia bun makanggulalan kanu kadtalu nin na pakapananalus su sagugunay a langit enggu lupa taman sa kanu kauma nu gay a initandu nin a kabinasa nin lun sa apuy. Na manggula su entu kanu timpu a kakukum'in sa kasiksa nin kanu manga taw a pedsungkang sa lekanin a Kadenan.8 Ugaid'a nia nu 'gkakalendem manga lusud ku sa tian a papedtayan, na sia kanu Kadenan a Mapulu na su sangibu lagun na pagidsan nu salagun bu enggu maitu bun ba su salagun na pagidsan bun nu sangibu lagun. 9 Na su Kadenan man a Mapulu na dikena nin ipedtalipenda su katuman nin kanu manga inibpasad'in, dikena mana su 'gkapagitung'u ped a ipedtalipenda nin kun ugaid'a nia nin kabantang na pedtigkelan kanu nin kagina nia nin kalilinian na dala isa bu a masiksa ka makadtaubat langun. 10 Ugaid'a su kambalingan nu Mapulu a su Isa al-Masih na mana bun su tanegkawn a di 'gkatekawan u kanu i kauma nin. Na kanu entu ba na malangiap su langit a salenganen na sangat i katanug'in a uni. Na su langun nu sia sa kawang-kawangan na maibped-ibped matutung. Entu pan ka su langun nu galebek sia sa liwawaw na dunia na makapayag den.
11 Na amaika maitu sa maitu ba i manggula-ula nu langun-langun, na dait a benal a maguyag-uyag kanu sa matidtu a makasuat kanu Kadenan 12 gagalu na kabpagingapa nu kanu kambalingan nu Masih kanu gay a inadil'u Kadenan enggu enggula nu u endaw i taman a magaga nu sa kagkalengkas'u kauma nu Masih. Na kanu entu ba a gay na binasan den sa apuy su langit enggu matunag'u kayaw nu apuy su langun nu nakadalem lun. 13 Ugaid'a sekitanu, na 'bpagangatan tanu su bagu a langit enggu lupa a nia lun den endatu na su kaikelasan a mana bun su inibpasad'in.
Su Mauli a Papata
14 Kagina ka maitu manga lusud ku sa tian a papedtayan, na gagalu nu kabpagingapa nu kanu entu na paginapas'u a benal i makapaguyag-uyag kanu sa ikelas enggu dala tila nin ka enggu malilintad su uyag-uyag'u sa lekanin. 15 Na nia nu 'gkakalendem na su di babaya kapembalingan nu Mapulu na asal'a makadtaubat pan su taw ka enggu malipuas a mana bun su inisulat sa lekanu nu papedtayan tanu a lusud tanu sa tian sa paginugut a si Bulus sia nakanggulalan kanu ilemu a inenggay lun nu Kadenan. 16 Na nalabit'in bun su entu kanu langun nu sulat'in. Ugaid'a aden ped kanu dalem'u manga sulat'in i malegen pedtuntayan, na nia penggulan lun nu manga taw a dala sabut'in enggu malubay i paginugut'in na papedsibayn nilan i maena nin a mana bun su penggulan nilan kanu ped pan a kadtalu nu Kadenan. Na sabap sa entu na binasan silan nu Kadenan. 17 Kagina ka maitu manga lusud ku sa tian a papedtayan, na kagina ka nakapaingat kanu den pantag kanu entu, na pangingati nu i madtatanggit kanu kanu kalimbanan nu manga taw a entu a sungkang kanu Kadenan a punan a makapaawa sa lekanu kanu mapia den a nan a 'gkatamanan nu. 18 Ugaid'a makin nia nu enggula na papangiseg'u su katuntay nu pantag kanu Mapulu tanu a su Isa al-Masih a 'bpamelipuas enggu su kabpaguyag-uyag'u sia kanu da idsan nin a limu nin.
Na lekanin su pugi iganat saguna taman sa taman. Amin.
Wassalam