Su manga Papata a makapantag kanu Mapia a Ula-ula
2
Ugaid'a seka Titus, na nia nengka ipamamandu na su makaayun sia kanu tidtu a panduan.2 Pamapatai ka su mangatua a mama sa kapia na ula-ula enggu kategkes'ilan kanu ginawa nilan asal'a kapagadatan silan. Maginugut silan kanu tidtu a salig, kakalimu a senep sa atay enggu su kasabal a senep sa atay.
3 Maitu bun su mangatua a babay, na dait bun a maguyag-uyag silan sa aden gilek'in kanu Kadenan. Di silan mamelibak, di silan mabaluy a palalangut enggu dait a ipamandu nilan u ngin i mapia 4 ka enggu nilan kapamituan su manganguda a babay sa kakalimu nilan kanu manga kaluma nilan enggu kanu manga wata nilan. 5 Pamituan nilan bun silan sa kapia na ula-ula, di kaledsik'a itungan, kategel sa kanggalebek sia sa walay, kakalimu enggu kapaginugut kanu kaluma nilan. Amaika maitu su ula-ula nilan na di masakutu nu apia entain su kadtalu nu Kadenan a inipamandu sa kanilan.
6 Maitu bun su manganguda a mama na sekaten bun asal'a 'gkapia i ula-ula nilan. 7 Na kanu langun na penggulan nengka na ipailay nengka a upaman su ginawa nengka sia kanu mangapia a galebekan nengka. Pamandu ka sa ukit a kapagadatan ka nu ped enggu pamandu ka bun sa da mawag a kahanda nengka. 8 Talanged ka i tidtu su ibpamandu nengka sa dala makadaway lun ka enggu kayan su pedsungkang sa lekitanu kagina dala madtalu nilan a mawag pantag sa lekitanu.
9 Pamapatai ka bun su manga ulipen sa maginugut kanu manga mapulu nilan sa kanu langun nu galebek'ilan taman sa kasuatan silan nu manga mapulu nilan, di silan manunumpatan 10 enggu di silan mangua-ngua. Ugaid'a nia nilan ipailay na su talutup a katidtu asal'a makapailay nilan sia kanu langun na galebek'ilan su kapianan nu ibpamandu tanu pantag kanu Kadenan a 'bpamelipuas sa lekitanu.
11 Na nia ba i dait a kapaguyag-uyag tanu kagina inipayag den nu Kadenan su da idsan nin a kapegkalimua nin a pakalipuas kanu langun nu taw. 12 Na su nia ba a kapegkalimu nu Kadenan i pedtutulu sa lekitanu sa kataligkud tanu kanu kapaguyag-uyag a di nin kasuatan enggu su kiug'u ginawa a kaduduniay. Pedtutulu bun sa kapia na ula-ula, katidtu enggu kapaguyag-uyag tanu a kasuatan nu Kadenan sia sa dunia 13 gagalu nu kabpagingapa kanu 'gkainam tanu a makagkapia a benal sa ginawa a mana su kapayag kanu sigay nu barakat a Kadenan enggu 'bpamelipuas sa lekitanu a su Isa al-Masih. 14 Na ininggihad'in su umul'in ka enggu tanu nin maaun sa kanu langun na kadaluakan a galebek tanu enggu maawa kanu kabaladusan tanu ka pinamili tanu nin a taw nin a pedsamikal penggalebek sa kapianan.
15 Na ipamamandu nengka kanu 'bpamaginugut su langun nu nia enggu isekat'engka sa kanggula nilan lun. Usal ka su langun na kawagib'engka sa kapatidtu nengka kanilan enggu di ka pedsuguti su apia entain sa di ka nilan ipamamantag.