Ikadua a Sulat'i Bulus kani Timuti
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Na kanu kinasulat'i Bulus kanu Ikadua a nia a Sulat'in kani Timuti na lu natabu si Bulus sa dalepa a Ruma ka nabilanggu sekanin lu. Na nia kahanda ni Bulus kanu kinasulat'in sa nia na asal'a makapamandu ni Timuti su bantang a salig ka enggu nin makapatidtu su 'bpamamandu sa panduan a di pakasugat. Saleta mambu na katawan den ni Bulus i mangagan den sekanin imatayan sabap kanu kabpangusiat'in pantag kanu Isa al-Masih. Na pegkiugan nin a benal i makalu si Timuti sa lekanin sabap sa pinadtaya nin a benal sekanin. Na nia pan ped a kahanda nin sa kinasulat'in sa nia na asal'a makapagkabagel'in su salig'i Timuti enggu kapapatan nin sa italus'in su inisalig'in lun a galebekan pantag kanu Isa al-Masih. Pidtalu bun ni Bulus kani Timuti i di nin ikaya su kabpangusiat'in pantag kanu Mapulu a su Isa al-Masih enggu taliman nin su kamalasayan a matala nin a mana bun su napagukit-ukitan nin. Di sekanin temelen kanu kabpamandu nin kanu tidtu a panduan. Na pinaingatan nin bun kani Timuti i di dait a mamung kanu kapebpapalawa kanu manga bitiala a dala katagan nin.