Su Papata kanu manga Ulipen a 'Bpaginugut kanu Isa al-Masih
6
Na su langun nu ulipen a 'bpaginugut kanu Isa al-Masih na dait a pagadatan nilan sa mapia su mapulu nilan ka amaika enggulan nilan su entu na dala makadtalu sa sakutu kanu Kadenan enggu kanu ibpamandu tanu. 2 Na amaika su mapulu nilan ka 'bpaginugut bun na di dait a di nilan pagadatan sabap sa sia sa kanilan na pagidsan nilan bun a 'bpaginugut ka nia pan mula na makin nilan 'bpia-pianan i galebek'ilan lun kagina nia nilan bun 'gkadtabangan sa kapenggalebek'ilan na su pagidsan nilan bun a 'bpaginugut a ipegkalimu bun nu Kadenan.Su Mauli a Papata
Na ipamandu nengka kanilan su entu enggu isekat'engka i kanggulalan nilan lun. 3 Apia entain a taw i 'bpamandu sa ped a panduan a di pakaayun kanu tidtu a panduan nu Mapulu tanu a su Isa al-Masih enggu kanu panduan a nia nin unga na su kapagula-ula a kasuatan nu Kadenan 4 na su entu ba a taw na migkapulu den i muletad'in enggu dala sabut'in. Nia nin bu 'gkalilinian na kapendalawana pantag sa kangadtalu a nia nin bu 'gkaunga na kasekel sa mawag, kapagukag, kapanila-tila, kapangantap 5 enggu kadsakita sa ginawa. Migkalat den i itungan nin ka nakasibay den kanu bantang. Nia nin lun kataw ka su kapagula-ula a kasuatan nu Kadenan na mausal'in sa kapamantiali nin.
6 Su kabantang'in na masela man i kapantag'in kanu taw su kapagula-ula a kasuatan nu Kadenan enggu 'gkasukul kanu 'gkambebetad'in 7 kagina kanu kinagemaw tanu man sia sa dunia na dala nadtanggit tanu, na maitu bun ba, dala bun madtanggit tanu sia kanu kapatay tanu. 8 Tembu nia dait na masukul tanu den amaika aden makan tanu enggu mambalegkas tanu. 9 Ugaid'a su taw a miug a benal sa kagkawasa na malemu masasat taman sa kadulatan nu madakel a kiug'u ginawa nin a kababalan a makabinasa lun enggu makapaidtug lun sa naraka. 10 Kagina su subela a kakiug sa kuleta na 'gkabpunan nu langun na kadaluakan. Na sabap kanu kakiug'ilan sa kuleta na 'gkataligkudan nilan su salig'ilan enggu pakaumbal silan sa madakel a sabapan na kalidu nu ginawa nilan.
11 Ugaid'a seka Timuti, na ulipen ka nu Kadenan tembu tangkai ka su langun nu entu ba, nia ka paginapas na kanggula nengka sa ngin i matidtu, kapagula-ula sa kasuatan nu Kadenan, kasalig, kakalimu, kasabal enggu kananaw na kambitiala. 12 Su kapedsalig'engka na papanalus ka sa mapia a mana bun su taw a 'bpagamung sa kapedsigi a 'bpaginapasen nin i kapanaban nin. Paginapas ka i kakua nengka kanu uyag-uyag a da taman nin ka entu ba i inenggatan nu Kadenan sa leka enggu inipangimbenal'engka su entu sa mapia sia kanu kaadapan nu madakel a saksi. 13 Na sia kanu adapan nu Kadenan a 'bpangenggay sa uyag-uyag kanu langun-langun enggu kanu kaadapan nu Isa al-Masih a nangimbenal lu kani Pilatu na pedsugun ku seka 14 sa papanalus ka sa mapia su kabpaginugut'engka kanu inisugu sa leka sa di ka kapanila-tilan enggu di ka kasenditan sa mawag taman kanu kambalingan nu Mapulu tanu a su Isa al-Masih 15 sia kanu inadil lun a timpu. Na ipayag sekanin nu Kadenan a sangat a pebpugin enggu kaisa-isa nin bu a Barakat sa Langun, su Datu nu langun nu datu, Mapulu nu langun nu mapulu 16 enggu kaisa-isa nin bu a dala papatayan nin. Na apia sakataw na dala pan nakailay lun enggu di a benal mailay ka lu sekanin kanu sigay a di kasupegan. Su langun nu pugi na sa lekanin bu enggu su kapegkagaga taman sa taman. Amin.
17 Na edtalu ka kanu manga taw a kawasa sia sa dunia i di silan edsandag atawa ka semalig kanu kakawasan nilan a 'gkadadag bun ugaid'a lu silan semalig kanu Kadenan ka sekanin i 'bpagenggay sa lekitanu sa kanu langun-langun a pakagkagalaw sa lekitanu. 18 Pamandu ka silan sa kanggalebek sa kapianan. Dait a sia silan kawasa sa kanggalebek sa kapianan a mana su kapangenggay nilan sa maluwag sa atay kanu manga pakanasisita enggu dait a lalayun silan adil sa katabang kanu manga taw. 19 Na kanu kanggalebek'ilan sa maitu ba na pakalimud silan sa di 'gkadadag a kakawasan lu sa sulega taman sa matalima nilan su tidtu-tidtu a uyag-uyag.
20 Timuti, tiakapi ka sa mapia su inisalig sa leka. Tangkai ka su manga kababalan enggu su manga bitiala a dala katagan nin a sungkang kanu Kadenan a maya ta kun sa ilemu. 21 Kagina aden den san manga taw a pedtalu sa aden kanilan su entu a ilemu ugaid'a nakasibay silan kanu tidtu a salig.
San sa lekanu su da idsan nin a limu nu Kadenan.
Wassalam