5
Na di ka demaway sa mapasang su mangatua a mama ugaid'a patidtu ka silan a mana bun ama nengka. Patidtu ka bun su manganguda a mama a mana bun manga suled'engka. 2 Na su mangatua menem a babay na patidtu ka bun silan a mana bun ina nengka, maitu bun su manganguda a babay na patidtu ka bun silan a di kaunutan na kaledsik'a itungan a mana manga suled'engka.Su Papata pantag kanu manga Balu a Babay
3 Na pagadati ka enggu tabangi ka su manga babay a balu a dala den pakatiakap lun. 4 Ugaid'a amaika su babay a balu ka aden manga wata nin atawa ka manga apu nin na silan i dait a temiakap lun ka sia kanu kanggula nilan sa entu na pakapailay nilan i aden gilek'ilan kanu Kadenan enggu kabalasan nilan su manga lukes'ilan. Kagina su entu na pakasuat kanu Kadenan. 5 Na su balu a dala den sakambinabatan nin na su Kadenan bu i pedsaligan nin. Na magabi sa malamag na tatap sekanin 'bpangeni-ngeni kanu Kadenan ka ipebpalad'in su manga nasisita nin. 6 Ugaid'a su balu a nia nin bu kalilinian na su kaduduniay na timbang a minatay den sekanin apia bibiag pamun. 7 Na isugu nengka su entu a manga papata ku kanu lumpukan nu 'bpamaginugut ka enggu dala makatila kanilan. 8 Kagina apia entain i dili temabang kanu manga pagali nin, labi lawan den kanu sakambinabatan nin na inikias'in den su salig'in enggu labi pan i kawag'in su entu a taw kumin kanu dikena 'bpaginugut.
9 Na nia nengka bu iamung kanu lumpukan nu manga balu a pedtabangan na su balu a dili embaba i umul'in sa nempulu lagun enggu matulanged kanu kaluma nin. 10 Nia dait na kilala bun sekanin kanu pinggula nin a kapianan a mana su kinapagkasela nin sa mapia kanu manga wata nin, su kinadsakaw-sakaw nin sa mapia kanu ped a taw, su kinapamuanaw nin kanu manga aya nu 'bpamaginugut, su kinapananabangan nin kanu 'gkangapasangan enggu su kinadsamikal'in enggalebek sa langun na mapia a galebek.
11-12 Na su manga balu menem a manganguda pamun na di ka den ibpagamung kanu lumpukan nu manga balu a pedtabangan kagina kataligkudanan nilan bun su Masih amaika mauma silan na kakiug'ilan 'gkaluma 'bpamaluman sa apia sungkang pan kanu salig'ilan.b Na sabap sa entu na masugat silan na kawagib. 13 Liu pan sa entu na 'gkataw pan silan sa kapanakupu sa lima, kapangingkawalayn, kambitiala sa dala katagan nin, kalusud sa uyag-uyag'u ped a taw enggu kambitiala sa apia di dait a pembitialan. 14 Tembu nia ku madtalu kanu manganguda pamun a manga balu na 'gkakaluma den silan ka enggu silan makamuliataw taman sa matuganul'ilan su sakatiwalayan nilan. Na amaika maitu na dala den ukit'u kuntelac sa kapanila-tila sa lekitanu. 15 Kagina aden den man manga balu a namakasibay den sabap sa nia nilan den inunutan na su Datu na Giadsal.
16 Na su manga babay a 'bpamaginugut na amaika aden kanu sakambinabatan nilan i balu na dait a edtabangan nilan su entu ka enggu di den makaugat kanu lumpukan nu 'bpamaginugut. Na amaika maitu na kadtabangan nu lumpukan nu 'bpamaginugut su manga balu a dala den a benal sakambinabatan nin.
Su Papata pantag kanu 'Gkangaunutan nu Lumpukan nu 'Bpamaginugut
17 Na su 'gkangaunutan a mapia i kapananggit'in na wagib a pagadatan silan sa mapia enggu edtabangan kanu manga nasisita nilan, labi den su manga pedsamikal sa kabpangusiat enggu kabpamandu. 18 Kagina nia man nakadalem kanu kitab na “Di ka pedsukuba su ngali nu sapid gay nin penggunu” enggu nakadalem bun i “Su gumagalebek na wagib a sukayan.”e 19 Di ka ibpamamantag su ipedsendit kanu 'gkangaunutan, nia tabia na aden dua kataw atawa ka telu kataw i makapangimbenal sa entu. 20 Ugaid'a amaika aden menem 'gkaunutan a di pedtelen kanu kapembaladusa nin na patidtu ka sekanin sia kanu kaadapan nu lumpukan nu 'bpamaginugut ka enggu kangagilekan su ped sa kanggalebek'ilan sa kabaladusan. 21 Na sia kanu adapan nu Kadenan enggu kanu Isa al-Masih taman den kanu manga pinamili nin a malaikat na ipebpaliugat ku sa leka i inggulalan nengka su langun nu entu a papata sa di ka makapambidaya enggu dala kalamigan nengka. 22 Da ka pedtagad-tagad sa kapamili nengka sa kaunutanf nu lumpukan nu 'bpamaginugut ka nia nin kaliuwan na makalalagit ka amaika embaladusa silan. Palalayun ka su kaikelas'u ginawa nengka. 23 Di ka penggula i nia nengka bu 'bpaginemen na ig ka inem ka bun sa apia paidu bu a alak a ig'a ubas asal'a makagamut kanu tian nengka a tatap'engka pedsakiten. 24 Na su kabantang'in na aden ped a taw a mapayag den a benal i kapembaladusa nin unan pan nu kakukum lun. Ugaid'a su ped menem na sia pan sa kaulianan i kapegkapayag'u kapembaladusa nilan. 25 Na maitu bun ba su kapenggalebek sa kapianan, aden mapayag den a benal enggu su di menem 'gkapayag na makapayag bun sa kaulianan.