Su Panduan nu Budtuden a Taw
4
Na maliwanag a benal a pedtalun nu Ruh nu Kadenan i sia kanu mangauli a timpu na aden temaligkud kanu salig'ilan ka nia nilan ipamamantag na su manga saitan taman sa unutan nilan su manga panduan nilan a di pakatidtu. 2 Na nia 'bpamandu kanu di a entu pakatidtu a panduan na su manga taw a tagakalen enggu da den sendit'ilan kanu kapenggula nilan sa dikena mapia. 3 Ipedsapal'ilan su kapangaluma enggu su kakan kanu ped a manga pegken inunta na pinangaden nu Kadenan su manga pegken asal'a makan enggu matalima nu 'bpamaginugut a nakasabut kanu bantang sa aden kadsukul-sukul lun. 4 Kagina langun man na pinangaden nu Kadenan na mapia enggu di dait a ikias ugaid'a dait a taliman su entu sa aden kadsukul-sukul lun 5 ka sinuti den man nu Kadenan su langun nu entu sia nakanggulalan kanu kadtalu nin enggu kanu pangeni-ngeni a ipedsukul-sukul sa entu.Su Matulanged a Panunugun nu Isa al-Masih
6 Na mabaluy ka a matulanged a panunugun nu Isa al-Masih amaika ipamandu nengka su entu a manga papata kanu manga lusud tanu sa tian sa paginugut, na apia seka na 'gkabagel su salig'engka sia kanu kanggulalan nengka kanu manga kadtalu a makapantag kanu salig tanu kanu Kadenan enggu su manga mapia a panduan a 'bpaginugutan tanu. 7 Na di ka a benal ibpamamantag su manga kababalan a tudtulan a sungkang kanu Kadenan ka makin ka layam i ginawa nengka sa kapagula-ula a 'gkasuatan nu Kadenan. 8 Ka amaika su kapaminteng a makagkabagel sa lawas ka aden 'gkakua lun a guna-guna na labi lawan den su kapagula-ula a kasuatan nu Kadenan ka matalima tanu su bagu a uyag-uyag a inibpasad'u Kadenan iganat saguna sampay sa akirat. 9 Na kasaligan su entu a kadtalu enggu dait a palitialan sa senep sa atay. 10 Na entu ba i sabap'in i kapedsamikal tanu enggu kapenggumalasayan tanu. Penggulan tanu su entu sabap kanu 'gkainam tanu kanu kaisa-isa nin a Kadenan a 'bpamelipuas kanu langun nu manusia labi lawan den kanu 'bpamaginugut.
11 Na ipamandu nengka kanilan su entu taman sa ipanggulalan nengka kanilan. 12 Di ka ibpamamantag su apia entain a edtakudi sa leka sabap kanu kanguda nengka ugaid'a makin nia ka enggula na baluy ka i ginawa nengka a upaman kanu 'bpamaginugut sia makanggulalan kanu kadtalu nengka enggu kanu kapagula-ula nengka, ipailay nengka su kakalimu, su kasalig kanu Kadenan enggu su dikena kaledsik'a itungan. 13 Na gagalu na di aku pan pakasan na edsamikali ka i kapamatia nengka kanilan kanu kitab, su kapangusiat'engka kanilan enggu su kapamandu nengka kanilan. 14 Di ka ipedtalipenda su kapegkagaga a inenggay nu Ruh nu Kadenan sa leka sia luyud kanu naalung pantag sa leka sa kanu kinadapenet sa leka nu 'gkangaunutan nu lumpukan nu 'bpamaginugut. 15 Enggula ka su langun nu entu a ipapenggula ku sa leka enggu inggulalan nengka sa senep sa atay asal'a mailay nu uman i isa su kabpagiseg sa mapia nu galebekan nengka. 16 Pangingati ka i ginawa nengka enggu su kabpamandu nengka. Papanalus ka i kanggula nengka sa entu kagina sia kanu kapapanalus'engka lun na makalipuas ka taman den kanu 'bpamakikineg sa leka.