Su Kapamili sa Mangulu kanu Lumpukan nu 'Bpamaginugut
3
Na benal man su kadtalu a “Apia entain a taw i pegkiug mangulu kanu lumpukan nu 'bpamaginugut na su 'gkadsingani nin na balapantag a galebek.” 2 Kagina ka maitu na nia dait kanu mangulu kanu lumpukan nu 'bpamaginugut na dala makatila lun, matulanged kanu kaluma nin,a makakumpen kanu ginawa nin, di masasaw, 'bpagadatan, masakaw kanu manga taw enggu mategel i kapamandu nin. 3 Nia dait na dikena sekanin palalangut,b dikena malemu malipunget ka aden katigkel'in enggu kananaw nin, dikena tagukagen enggu dikena subela i kakiug'in sa kuleta. 4 Nia dait na magaga nin temiakap sa mapia su sakatiwalayan nin enggu 'bpaginugutan sekanin nu manga wata nin taman sa 'bpagadatan nilan. 5 Kagina amaika di nin magaga temiakap su sakatiwalayan nin na nia nin pan a entu 'gkagaga pedtiakap su lumpukan nu 'bpamaginugut kanu Kadenan? 6 Na nia dait na dikena bun sekanin bagu 'bpaginugut kanu Kadenan ka basi 'gkapulu i muletad'in na masiksa sekanin a mana su nanggula nu Datu na Giadsal.c 7 Nasisita bun a 'bpagadatan sekanin nu dikena 'bpamaginugut ka enggu dala makatila sa lekanin enggu di sekanin makua nu padulat'u Datu na Giadsal.Su Kapamili sa Makatabang kanu Lumpukan nu 'Bpamaginugut
8 Na maitu bun su manga mama a mapamili a 'gkasaligan a makapananabangan kanu lumpukan nu 'bpamaginugut na nia dait na 'bpagadatan bun silan, senep sa atay i kambitiala nin, dikena palalangut enggu dikena subela i kakiug'in sa kuleta. 9 Nia dait na 'bpaginugutan nilan sa senep sa atay su ilemu a inipayag'u Kadenan makapantag kanu salig enggu dait a dala makasendit'ilan a mawag kanu ginawa nilan. 10 Nia dait na matepeng muna silan ka enggu maamad i dala makasendit kanilan a dikena mapia, entu pan ka sugutan silan sa kapananabangan nilan kanu lumpukan nu 'bpamaginugut. 11 Na nia dait kanu manga kaluma niland na 'bpagadatan bun, di lemibak kanu ped'in ka mataw kemumpen sa ginawa enggu kasaligan kanu apia ngin. 12 Na nia man dait kanu 'bpananabangan kanu lumpukan nu 'bpamaginugut na matulanged kanu kaluma nilan enggu magaga nilan temiakap sa mapia su manga wata nilan taman den kanu sakatiwalayan nilan. 13 Ka amaika su taw man a 'bpananabangan kanu lumpukan nu 'bpamaginugut ka inggulalan nin sa mapia su galebekan nin na pagadatan sekanin nu taw taman sa 'gkabagel a benal su salig'in kanu Isa al-Masih.
Su Kapedtiakap kanu Inipayag a Ilemu
14 Na apia 'gkapangingalap ku i makasan aku bun mangagan na inisulat ku bun su nia a manga papata 15 ka enggu apia di aku makasan semambut na katawan nengka u ngin i dait a kapagula-ula nu edsusuled sa paginugut sia kanu Kadenan a nalusud kanu kaisa-isa nin a Kadenan enggu sinaligan sa kakelung enggu katiakap kanu bantang.e 16 Benal a makagaip su ilemu a inipayag makapantag kanu salig tanu a
“Napayag a manusia su Masih, inipangimbenal'u Ruh i matidtu sekanin enggu nailay sekanin nu manga malaikat.
Inipangusiat sekanin kanu manga bangsa enggu pinaginugutan sekanin kanu pat a pisuk'u dunia taman sa pinabpapulu sekanin lu sa sulega.”