Su Kabpangeni-ngeni kanu Langun nu manga Taw
2
Kagina ka maitu na nia muna-muna sa langun na 'bpangenin ku sa lekanu i ipangeni-ngeni nu su langun nu taw taman den kanu manga nasisita nilan. Ipalad'u kanu Kadenan su pangeni-ngeni nu a entu kanilan sa aden kadsukul-sukul'in. 2 Ipangeni-ngeni nu bun su manga sultan enggu su 'gkangaunutan nu dalepa asal'a makapaguyag-uyag tanu sa malilintad enggu da samuk'in taman sa kapagadatan tanu enggu makapagula-ula tanu sa kasuatan nu Kadenan. 3 Na su maitu ba a pangeni-ngeni na pakasuat kanu Kadenan a 'bpamelipuas sa lekitanu enggu pakikinegen nin su entu 4 kagina nia nin pegkiugan na langun nu taw na makalipuas enggu makatuntay kanu bantang. 5 Kagina saben-sabenal a kaisa-isa nin bu su Kadenan enggu kaisa-isa nin bu su makapambalingan kanu manusia sia kanu Kadenan. Na su entu ba a taw na su Isa al-Masih 6 a ininggihad'in su umul'in asal'a maauna su langun nu taw. Na su pinggula nin a entu na nakapayag su kahanda nu Kadenan kanu inadil'in a timpu. 7 Na entu bun ba i sabapan na kinapamili sa laki sa masugu a makapangusiat enggu makapamandu kanu manga taw a dikena-Yahudi makapantag kanu bantang enggu kanu salig kanu Kadenan. Na saben-sabenal a benal su pedtalun ku a nia, dikena aku pembudtud.Su Dait a Ula-ula nu 'Bpamaginugut sia kanu Kapendidilimudan nilan
8 Kagina ka maitu na nia ku pegkiugan na kanu apia endaw a kapendidilimudan nu lumpukan nu 'bpamaginugut na mangeni-ngeni su manga mama enggu sia kanu kabpangeni-ngeni nilan na dait a ikelas su atay nilan, dala sakit'a ginawa nilan enggu dala ukag'ilan. 9 Na su manga babay menem na dait a kapagadatan su kambabalegkasan nilan enggu di makabimban sa mata taman sa makapailay sa kapia na ula-ula nin. Di dait a edsubela i kapakaid'ilan kanu manga buk'ilan, kambulawan nilan enggu kapedsangan nilan sa manga balaaga a watu udi na su kambalegkas sa lawan i kapulu na alaga nin. 10 Ugaid'a nia dait a enggulan nilan na enggalebek silan sa kapianan ka entu ba i wagib kanu manga babay a aden gilek'in kanu Kadenan.
11 Na amaika aden 'bpangusiat na dait a lemenek demun su manga babay enggu makikineg a unut su kapangalimbaba kanu ginawa nilan. 12 Dikena ku pedsugutan a mamandu su babay atawa ka mangulu kanu manga mama ka nia dait kanilan na lemenek demun. 13 Ka nia nu 'gkakalendem na nia nauna a linimbag'u Kadenan na su Adam entu pan ka su Siti Hawa, 14 enggu dikena su Adam i napagakalan nu Saitan ka su Siti Hawa, sekanin i nakasungkang kanu inisugu nu Kadenan. 15 Ugaid'a apia ka maitu na amaika papanalusen nu babay su kapedsalig'in, su kakalimu nin, su kaikelas'in enggu su kapia na ula-ula nin na malipuas sia kanu kapembabata nin.