Ika-isa a Sulat'i Bulus kani Timuti
Su Salam
1
Salam, saki si Bulus a pinamili nu Isa al-Masih a masugu nin sia luyud kanu kasuguan nu Kadenan a 'bpamelipuas sa lekitanu enggu su Isa al-Masih a inam tanu. 2 Su nia a sulat na san pakatumpa sa leka Timuti a tidtu a wata ku sia kanu salig kanu Kadenan. Na san sa leka su da idsan nin a limu enggu lat a nanam enggu kalilintad a ebpun kanu Ama tanu a su Kadenana enggu kanu Mapulu tanu a su Isa al-Masih.Su 'Bpamamandu sa di Pakatidtu lu sa Ipisu
3 Na 'bpangenin ku sa leka i san ka demun sa Ipisu a mana bun su pinangeni ku sa leka unan nu kinasia ku sa Masidunia ka enggu nengka 'gkasapalan su 'bpamamandu a nan sa di pakatidtu a panduan. 4 Edtalui ka bun silan sa di nilan den ipamamantag su pinangumbal bu a manga tudtulan enggu su da den kapegkapupus'in a kapedtarsilan nilan a nia nin bu 'gkaunga na kapebpapalawa sa da katagan nin. Dili i entu pakadtabang sa katuman kanu kahanda nu Kadenan a katuntayan bu sia makanggulalan kanu kasalig. 5 Nia ku tangga sa kinasugu ku sa kanggula nengka sa entu na asal'a makagkakalimua tanu. Na manggula bu su entu amaika aden sa lekitanu su ikelas a pamusungan a dala geda-geda nin enggu su senep sa atay a kapedsalig. 6 Kagina su ped san a manga taw na tinagak'ilan den su entu ka nia nilan den ibpamamantag na su dala katagan nin a manga bitiala. 7 Pegkiug a benal silan a mabaluy a gulu nu pangitaban apia nia nin kaaden i di nilan 'gkasabutan u ngin i ibpamandu nilan enggu pedtindegan nilan sa mabagel.
8 Katawan tanu i mapia su pangitaban nu Kadenan amaika wagib i kausal lun. 9 Na dait a katuntayan tanu sa mapia i dikena man pinangaden su pangitaban kanu matidtu a manga taw ka pinangaden su entu kanu manga taw a pedsungkang kanu pangitaban, kanu manga taw a di 'bpaginugut, kanu manga taw a daluaka enggu baladusa, kanu manga taw a pedsakutu kanu Kadenan enggu pedsungkang lun, kanu manga taw a minimatay sa ama nin atawa ka ina nin enggu talibunu a taw, 10 kanu manga taw a pedsisina enggu kanu pegkakaluma sa pagidsan nin bun a mama atawa ka babay, kanu manga taw a 'bpangagaw sa taw ka pebpasan nin, kanu manga taw a budtuden enggu pedsapa sa dikena benal taman den kanu manga taw a penggula sa apia ngin den a pakasungkang kanu tidtu a panduan 11 a mana su panduan a luyud kanu Mapia a Tutuma makapantag kanu kasigay nu Kadenan a sangat a pebpugin. Na su nia a Mapia a Tutuma na inisalig'u Kadenan sa laki sa kapayag lun.
12-13 Na 'bpanginsukulen aku kanu Mapulu tanu a su Isa al-Masih a napagkabagel sa laki kanu nia a galebekan kagina apia penggubasa aku paganay sa sakutu sa lekanin enggu 'bpamungkaidanan ku su 'bpamangunut lun taman sa papegkayan ku sekanin na initimbang aku nin bun a kasaligan kanu kinabetad'in sa laki kanu nia a galebekan. Benal a nalatan aku nin sa nanam kagina di ku 'gkatawan i malat besen su penggulan ku kanu timpu a di aku pan 'bpaginugut. 14 Na 'bpamelapay sa laki su dala idsan nin a kapegkalimu nu Mapulu tanu a su Isa al-Masih a unut su kakalimu enggu su salig kanu Kadenan a ibpagenggay nin kanu taw a nalusud sa lekanin. 15 Na nia su kadtalu a bantang enggu kasaligan a dait a palitialan sa senep sa atay sa “Su Isa al-Masih na sinemia sa dunia asal'a makalipuas'in su manga baladusa.” Na saki na baladusa sa langun. 16 Ugaid'a linatan aku sa nanam'u Isa al-Masih apia baladusa aku sa langun ka enggu nin makapailay sia makanggulalan sa laki su dala idsan nin a kasabal'in ka enggu aku mabaluy a upaman kanu manga taw a semalig sa lekanin a mamakatalima sa uyag-uyag a dala taman nin. 17 Pugin su kaisa-isa nin a Kadenan a 'bpagadatan taman sa taman, su kadatu nin na dala kapegkapupus'in enggu dala papatayan nin a Kadenan a di 'gkailay. Amin.
18 Seka Timuti a wata ku, na ipedsalig ku sa leka su entu a inisugu ku sa leka. Pakaayun i entu kanu manga inipaalung'u Kadenan makapantag sa leka, na di ka lemipatani su entu ka makagkabagel i entu sa leka sia kanu kabpaninindeg'engka kanu ngin i mapia. 19 Na sia kanu kabpaninindeg'engka sa entu na papanalus ka bun su kapedsalig'engka. Na sigulu ka i dala makasendit'engka a mawag kanu ginawa nengka a dikena mana su ped a taw a da nilan ipamamantag su entu taman sa nakageled su salig'ilan. 20 Isa den lu ba si Himinayus enggu si Anduk a pinadtaday ku den silan lu kanu Datu na Giadsalb asal'a kabulatan silan kanu kapedsakutu nilan.