Ika-isa a Sulat'i Bulus kani Timuti
Bismillah Hir-Rahman Nir-Raheem
Assalamu Alaikum Warahmatullahi Ta'ala Wabarakatuh
Su nia a sulat na inisulat'u mama a bedtuan sa Bulus a lu pakatumpa kanu mama a bedtuan sa Timuti. Si Timuti a nia na manguda pamun a mama a lalayun a kaped'i Bulus kanu kapendadalaug'in sa kapebpayapat'in kanu Mapia a Tutuma pantag kanu Isa al-Masih. Mabatia tanu i nia sia kanu Manga Pinggalebek'u Manga Sinugu nu Isa al-Masih 16 ayat 3 enggu 17 ayat 14 taman sa 15 enggu 18 ayat 5 enggu 19 ayat 22 enggu 20 ayat 1 taman sa 6.
Na lu natabu si Timuti sa dalepa a Ipisu kanu timpu a kinasulat'i Bulus lun ka pinagkalidtabun sekanin ni Bulus lu ka enggu nin 'gkapanguluan su lumpukan nu 'bpamaginugut kanu Isa al-Masih lu kagina masela a benal i lidu na ginawa nin kanu 'bpamaginugut kanu entu a dalepa sabap sa kapegkasibay nu salig'ilan kanu Kadenan. Su dalepa a nia a Ipisu na lusud kanu dalepa a bedtuan saguna sa Turkey.
Na nia kahanda ni Bulus kanu kinasulat'in sa nia na asal'a makapamandu ni Timuti su tidtu a lalan taman sa kasapalan nin su 'bpamamandu sa panduan a di pakatidtu. Na nakadalem bun kanu sulat'in su makapantag kanu ukit'u kapendidilimudan nilan sa kapangadap kanu Kadenan enggu su kapamili nilan kanu dait a mangulu kanilan apeg den nu pantag kanu mapia a ukit a katuganul kanu manga balu. Na nakadalem bun sia su kinapagkabagel'i Bulus kanu salig'i Timuti kanu Kadenan asal'a di sekanin katilan nu apia entain.