Su Kinapangeni ni Bulus kanu 'Bpamaginugut sa Ipangeni-ngeni silan
3
Nia pan liu sa entu manga lusud'ami sa tian na ipangeni-ngeni kami nu sa kagkalengkas'u kapayapat'u kadtalu nu Mapulu taman sa enggan nilan sa katagan su entu sa mana bun su kinaenggay nu lun sa katagan. 2 Ipangeni-ngeni nu bun i malepas kami kanu manga taw a mawag i galebek'in enggu daluaka a manga taw kagina dikena langun na manga taw na semalig kanu Mapulu. 3 Ugaid'a matidtu man su Mapulu a papegkabagel enggu pegkelung sa lekanu kanu Datu na Giadsal.a 4 Na pedsalig kami kanu Mapulu sa penggalebeken nu su manga ipedsugu nami sa lekanu taman sa ipedtalus'u su kapenggalebek'u sa entu. 5 Na ipangeni-ngeni nami kanu Mapulu i ipamula nin kanu atay nu su kasabal'in enggu su kakalimu nu Kadenan.Su Kabpamapata kanu Pebpauk-pauk
6 Manga lusud'ami sa tian, na sia kanu bagel a inenggay sa lekami nu Mapulu tanu a su Isa al-Masih na ipedsugu nami sa lekanu i tangkai nu su apia entain a manga suled'u sa paginugut a pebpauk-pauk enggu di 'bpaguyag-uyag sia luyud kanu panduan a inipamandu nami sa lekanu. 7 Ka katawan nu bun man i dait a sekami i ilingi nu kagina kanu timpu a san kami pan sa lekanu na da kami 'bpauk-pauk. 8 Dala nakan nami a dala nami kabayadi. Ugaid'a nia pan mula na magabi sa malamag na 'bpagapas kami bun 'bpamantiali asal'a di kami makaugat kanu apia entain sa lekanu. 9 Na dikena nia nin sabap i dala kawagib'ami sa katalima sa tabang ebpun sa lekanu ugaid'a pinggula nami i nia ka enggu nami sekanu kaenggan sa upaman a kailingan nu. 10 Apia kanu timpu a san kami pan sa lekanu na nia nami inisugu sa lekanu na “Apia entain i di miug enggalebek na di pakanen.”
11 Na linabit'ami su entu kagina 'gkakineg'ami i su ped sa lekanu na pebpauk-pauk enggu di miug enggalebek ka nia nilan bu galebek na 'bpelusudan nilan su uyag-uyag'u ped'ilan. 12 Na sia kanu bagel a inenggay sa lekami nu Mapulu tanu a su Isa al-Masih na ipedsugu nami enggu ipedsekat'ami kanu manga taw a entu i mamantiali silan sa malilintad ka enggu aden kauyagan nilan.
13 Na sekanu menem a manga lusud'ami sa tian na da kanu pedsangkup kanu kapenggalebek'u sa mapia. 14 Na apia entain i di mamantag kanu nakadalem kanu sulat'ami a nia na tanudi nu sekanin ka di nu lemumbuki ka enggu sekanin kayan. 15 Ugaid'a di nu menem sekanin ipedtimbang sa kuntela nu, ka makin nu patidtu ka suled'u bun sekanin sa paginugut.
Su Kapupusan nu Sulat
16 Na su Mapulu tanu a 'gkabpunan nu kalilintad na pangeni-ngenin nami lun i palilintaden kanu nin kanu langun na timpu sa kanu apia ngin a ukit taman sa tapiden kanu nin langun.
17 Pedsalamen ku sekanu langun. Saki demun a si Bulus i sinemulat kanu nia a salam. Na nia ba i tusb sa kanu langun na manga sulat ku. 18 San sa lekanu su da idsan nin a limu nu Mapulu tanu a su Isa al-Masih.
Wassalam