Su Kambuat'u Taw a Pedsungkang unan nu Kambalingan nu Isa al-Masih
2
Manga lusud'ami sa tian na pantag kanu kambalingan nu Mapulu tanu a su Isa al-Masih enggu su kapapendidilimudan sa lekitanu sa kaalaw tanu lun na nia nami 'bpangenin sa lekanu na 2 di nu mapandua-dua i itungan nu atawa ka ginawa nu apia aden pan edtalu sa lekanu sa maya ta kun sa nauma den su gay a kambalingan nu Mapulu. Da kanu maginugut sa apia nia nilan pan edtalun i inipayag kun i entu nu ruh sa lekami atawa ka inipangusiat'ami kun i entu kanilan atawa ka nakadalem kanu sulat a ebpun sa lekami. 3 Na da kanu mapapagakal sa apia ngin a ukit kagina di pan babaya manggula su kambalingan nu Mapulu taman a di pan manggula su masela a kapedsungkang kanu Kadenan enggu taman a di pan makambuat su taw a pedsungkang kanu kitaban nu Kadenan.a Na su entu ba a pedsungkang a inidtatalama den sa lekanin su kanarakan, 4 na sungkangen nin su apia ngin a pedsimban nu manga taw enggu su langun na pegkakadenanen taman sa ibpapulu nin su ginawa nin kanu langun nu entu. Na lu sekanin mayan kanu Suti a 'Bpagagaman kanu Kadenan ka ipayag'in su ginawa nin sa sekanin kun su Kadenan.5 Na ngintu, di nu 'gkagkalendem su entu? Ka nakapamandu ku den i entu sa lekanu kanu san aku pan sa lekanu. 6 Na 'gkatawan nu bun man u ngin i pakaungen sa kambuat'u pedsungkang a entu ugaid'a natatalanged man a embuat sekanin kanu kauma nu inidtatalama lun a kutika. 7 Apia ka maitu na su kapedsungkang na pakapayapat den sa di 'gkatekawan ugaid'a su pedsungkang a entu na di pan makambuat taman a di pan makaawa su 'bpagungen lun. 8 Na endaw i kaawa nu 'bpagungen lun a entu na embuat sekanin ugaid'a kanu kauma nu Mapulu a su Isa al-Masih na ipayag'in su kabarakat'in taman sa imatayan nin su pedsungkang a entu sa ukit a kayup'in lun. 9 Na sia kanu kambuat'u pedsungkang a entu na lu sa lekanin su bagel a ebpun kanu Datu na Giadsal asal'a manggalebek'in su langun na embalangan na kabarakatan enggu manga tanda a kangagaipan sa kanu kapagakal'in kanu manga taw. 10 Na usalen nin su langun nu kadaluakan a ukit'u kapagakal'in kanu manga taw a makaidtug sa naraka kagina da nilan talima enggu da nilan bun itagu sa ginawa su bantang a makapalipuas kanilan. 11 Kagina ka maitu na makin silan bulibugen nu Kadenan ka enggu nilan kapaginugutan su manga kalebutan a entu 12 ka enggu masiksa su langun nu silan a entu a dala paginugut kanu bantang ka nia nilan linamig na su kadaluakan.
Su Kapapanalus'u 'Bpamaginugut kanu Inipamandu kanilan
13 Manga lusud'ami sa tian a ipegkalimu nu Mapulu na wagib i tatap'ami sekanu idsukul-sukul kanu Kadenan kagina iganat pan sa ganatan na pinamili kanu den nu Kadenanb sa makalipuas sia makanggulalan kanu kinaikelas'u Suti a Ruh sa lekanu enggu sia kanu kinasalig'u kanu bantang. 14 Na inenggat kanu nu Kadenan kanu kalipuas'u sia nakanggulalan kanu Mapia a Tutuma a inipayag'ami sa lekanu ka enggu kanu makaampit kanu kabadtugan nu Mapulu tanu a su Isa al-Masih. 15 Kagina ka maitu manga lusud'ami sa tian na makin nu patalus su mabagel a kapedtindeg'u kanu salig'u enggu itagu nu sa ginawa su langun na panduan a inipamandu nami sa lekanu magidsan pan i sia kanu kadtalu atawa ka sia kanu sulat.
16-17 Na su Isa al-Masih a Mapulu tanu enggu su Ama tanu a su Kadenan a malimu sa lekitanu a papegkabagel kanu ginawa tanu taman sa taman enggu minenggay sa lekitanu sa mapia a inam sia nakanggulalan kanu da idsan nin a kapegkalimu nin na pangeni-ngenin nami i pagkabagelen nin su ginawa nu sa kapapanalus'u kanu langun nu manga mapia a galebek'u enggu su manga mapia a kangadtalu nu.