Ikadua a Sulat kanu Manga Taw sa Tisalunika
Su Salam
1
Su nia a sulat na ebpun kani Bulus, Silas enggu Timuti a san pakatumpa sa lekanu a lumpukan nu 'bpamaginugut sa Tisalunika a nalusud kanu Ama tanu a su Kadenana enggu kanu Mapulu a su Isa al-Masih. 2 Na san sa lekanu su da idsan nin a limu enggu kalilintad a ebpun kanu Ama tanu a su Kadenan enggu kanu Mapulu a su Isa al-Masih.Su Kukuman nu Kadenan na Matidtu
3 Manga lusud'ami sa tian na dait man a benal a tatap'ami sekanu idsukul-sukul kanu Kadenan kagina pegkabagel-pegkabagel bun su salig'u enggu 'bpagiseg-'bpagiseg bun su kapegkakalimua nu. 4 Tembu ibpemamasela nami sekanu kanu manga lumpukan nu 'bpamaginugut kanu Kadenan sabap kanu salig'u enggu su kapedtigkel'u kanu langun na kamalasayan enggu kabpamungkaid sa lekanu. 5 Na su langun nu entu na amadan sa matidtu su kukuman nu Kadenan kagina sia kanu 'gkangatala nu a kamalasayan sabap kanu kabpaginugut'u kanu Kadenan na amadan sa dait a malusud kanu kanu kapendatu nin. 6 Na benal man a matidtu su Kadenan ka pakapasangan nin su papegkapasang sa lekanu 7-8 enggu papangintelenen nin menem su pedtala sa kabpamungkaid taman den sa lekami sia kanu kauma nu Mapulu a su Isa al-Masih a ebpun sa sulega sia kanu luk'u 'bpangalaw-kalaw a apuyb a kaped'in su manga barakat a malaikat'in. Na siksan nin su di pedtalima kanu Kadenan enggu su di 'bpaginugut kanu Mapia a Tutuma pantag sa lekanin a Mapulu tanu a su Isa al-Masih. 9 Na siksan silan kanu da taman nin a kabinasan, makapitas den silan kanu kaadapan nu Mapulu enggu kanu sigay nin a tanda nu kabarakat'in. 10 Na manggula su entu kanu gay a kauma nu Mapulu asal'a mapugi sekanin sabap kanu pinggula nin kanu manga taw a sinuti nin. Na kagaipan sekanin nu langun nu 'bpamaginugut lun enggu lusud kanu den lu ba kagina pinaginugutan nu su inipayag'ami sa lekanu.
11 Kagina ka maitu na tatap'ami sekanu ibpangeni-ngeni sa tabangan kanu nu Kadenan sa makapaguyag-uyag kanu sa makadait kanu kinapamili nu Kadenan sa lekanu. Na ibpangeni-ngeni nami bun i su langun na mapia a kahanda nu na tumanen nu Kadenan enggu talutupen nin su galebek'u a unga nu salig'u sia makanggulalan kanu kabarakat'in 12 ka enggu sabap sa lekanu na makapulu su ingala nu Mapulu tanu a su Isa al-Masih enggu sekanu menem na makapulu sabap kanu dala idsan nin a limu nu Kadenan enggu kanu Mapulu a su Isa al-Masih.