Ikadua a Sulat'i Bulus kani Timuti
Su Salam
1
Salam, saki si Bulus a sinugu nu Isa al-Masih sia luyud kanu kahanda nu Kadenan asal'a makapayag ku su uyag-uyag a inibpasad'u Kadenan a 'gkatalima tanu a manga taw a nalusud kanu Isa al-Masih. 2 Su nia a sulat na san pakatumpa sa leka Timuti a pinadtaya ku a wata. Na san sa leka su da idsan nin a limu enggu lat a nanam enggu kalilintad a ebpun kanu Ama tanu a su Kadenana enggu kanu Mapulu tanu a su Isa al-Masih.Su Kinadsukul-sukul kanu Kadenan enggu su Kinasekat'i Bulus kani Timuti
3 Na uman aku 'bpangeni-ngeni sa magabi sa malamag na di ku seka 'gkalipatanan ipedsukul-sukul kanu Kadenan a penggihadan ku kanu ginawa ku sa ikelas a mana bun su pinggula nu manga kaapuan ku. 4 'Gkatademan ku su kinaigis'u lu nengka kanu kinabpitas ta tembu pegkiugan ku a benal seka 'bpagilay ka sangat man a makagalaw sa laki su entu. 5 Na di maawa sa ginawa ku su senep sa atay a kapedsalig'engka a mana su kinasalig'u tua nengka a babay a si Luida enggu su ina nengka a si Yunis. Na natalatantu ku i maitu pamun ba i kapedsalig'engka sampay saguna.
6 Na sabap sa entu na papedtademan ku sa leka i makin ka papangiseg su kausal'engka kanu kapegkagaga a inenggay nu Kadenan sa leka sa kanu timpu a kinadapenet ku sa leka, 7 kagina dikena nia kinaenggay nu Kadenan sa lekitanu kanu Ruh nin i asal'a 'gkatalaw tanu ka nia nin kinaenggay lun na asal'a 'gkabagel tanu, maaden sa lekitanu su kakalimu enggu makumpen tanu su ginawa tanu.
8 Tembu di ka ipegkaya su kapedsaksi nengka pantag kanu Mapulu enggu di aku bun ipegkaya a nabilanggu sabap sa lekanin. Ugaid'a sia kanu kabarakat'u Kadenan na makin ka amung kanu kamalasayan ku sabap kanu kapebpayapat kanu Mapia a Tutuma. 9 Na sekanin a Kadenan i linemipuas enggu minenggat sa lekitanu sa kapaguyag-uyag a ikelas. Na dikena i entu sabap sa kanu galebek tanu ka sabap kanu kahanda nin enggu kanu da idsan nin a limu nin a inenggay nin sa lekitanu sia nakanggulalan kanu Isa al-Masih unan pan nu kinapangaden. 10 Ugaid'a saguna na nakapayag den su limu nin sia kanu kinauma nu Isa al-Masih a 'bpelipuas sa lekitanu a tinemaban kanu bagel'u kapatayb ka inipayag'in sa lekitanu su uyag-uyag a da taman nin sia nakanggulalan kanu Mapia a Tutuma. 11 Na pinamili aku nu Kadenan a masugu nin a makapangusiat enggu makapamandu kanu nia a Mapia a Tutuma. 12 Na nan bun ba i sabapan na kapegkalasay ku saguna ugaid'a dikena ku i entu ipegkaya kagina katawan ku u entain i pedsaligan ku enggu natalatantu ku i katiakapan nin su ngin i inisaligc ku lun taman kanu gay a kambalingan nin.
13 Na su tidtu a panduan a nangakineg'engka sa laki na umbal ka a tuladan kanu kabpamandu nengka sa aden salig kanu Kadenan enggu kakalimu a san sa leka sabap sa nalusud ka kanu Isa al-Masih. 14 Na sia kanu tabang'u Suti a Ruh a sia sa lekitanu na tiakapi ka su mapia a inisalig sa leka.d
15 Katawan nengka bun man i timbang a langun nu tagapeda ku sa prubinsia a Asia na tinemaligkud sa laki kaped den lu ba si Pigilus enggu si Hirmuginis. 16 Ugaid'a si Unisipurus na ibpangeni-ngeni ku su sakatiwalayan nin sa ikalimu silan nu Mapulu kagina tatap'in papegkabagelen su ginawa ku enggu da nin ikaya su kinabilanggu ku 17 ka nia pan mula na guna sekanin makadalepa sia sa Ruma na pinangilay aku nin mamikal taman sa natun aku nin mambu. 18 Na ibpangeni-ngeni ku i ikalimu sekanin nu Mapulu sa kanu gay a kambalingan nin sa dunia. Na katawan nengka bun a benal u panun i kinatabang'in sa laki kanu paganay san sa dalepa a Ipisu.