Su Kapedtigkel'u Sundalu nu Isa al-Masih sa kanu manga Kamalasayan
2
Kagina ka maitu na seka a pinadtaya ku a wata na pakabagel ka i tindeg'engka sia makanggulalan kanu tabang a ibpagenggay nu Isa al-Masih sa kanu taw a nalusud sa lekanin. 2 Na su nangakineg'engka sa laki a nadsaksian nu madakel a taw na isalig'engka su entu kanu manga taw a kasaligan nengka a kapakayan a makapamandu bun kanu ped. 3 Na amung ka kanu manga kamalasayan a mana bun su 'gkatala nu mapia a sundalu nu Isa al-Masih. 4 Na dala man sundalu i magigiamung kanu galebekan nu manga taw a dikena sundalu kagina nia nin kahanda na kasuatan sekanin nu mapulu nin. 5 Na maitu bun ba, amaika su 'bpagamung menem kanu kapedsigi ka di nin paginugutan su atulan nu kapendalemet na di sekanin kabalasan. 6 Na mana bun su mategel mangangawid na sekanin i dait a muna-muna a makatalima kanu unga nu sabpet'in. 7 Na pagitung ka sa mapia su kadtalu ku a nia ka tabangan ka nu Mapulu sa katuntay nengka kanu langun nu entu.8 Na nia ka 'gkakalendem na su Isa al-Masih a pinambibiag 'bpaluman a ebpun kanu tupu nu Nabi Daud. Na entu ba i dalem'u Mapia a Tutuma a ipebpayag ku 9 a sabapan na kapegkalasay ku taman sa sinangkalian aku sia sa bilangguan a mana daluaka a taw. Ugaid'a su kadtalu nu Kadenan na di man kasangkalian. 10 Tembu ba pedtigkelan ku su langun na kamalasayan ka enggu matalima nu manga taw a pinamili nu Kadenan su kalipuasan a sia bu kanu Isa al-Masih, unut den su da taman nin a kabadtugan nin. 11 Na benal man su nia a kangadtalu a
“Amaika nalusud tanu kanu kinapatay nu Isa al-Masih,a
na mauyag tanu bun a kaped'in.
12 Amaika temigkel tanu,
na makandatu tanu bun a kaped'in.
Amaika ikias tanu sekanin,
na ikias tanu nin bun.
13 Amaika di tanu kasaligan,
na kasaligan sekanin taman sa taman,
ka di man edsalin su ula-ula nin.”
Su Dait a 'Bpalangayn ni Timuti enggu su manga Palangay a 'Bpagabungan nin
14 Na ipagkalendem'engka san kanu 'bpamaginugut su langun nu pidtalu ku a entu enggu ibpaliugat'engka kanilan sia kanu adapan nu Kadenan i abungan nilan su kapebpapalawa pantag kanu manga kadtalu kagina da unga nin i entu a mapia ka kabinasa nin bu kanu 'bpamakikineg lun. 15 Na pamikali ka i kasuatan ka nu Kadenan a mana bun su gumagalebek a dala dait a ikaya nin kanu galebekan nin. Na ipamandu nengka sa matidtu su bantang a kadtalu nu Kadenan. 16 Abungi ka su da katagan nin a manga bitiala a sungkang kanu Kadenan kagina su manga maitu ba a penggulan na makin pakapangiseg kanu taw sa di nin kabpaginugut kanu Kadenan. 17 Na su manga panduan nilan na 'bpelapat a mana sakit a pegkaket kanu sapu nu taw. Na isa den lu ba si Himinayus enggu si Pilitus 18 a namakasibay den kanu bantang. Pakapasibay nilan bun su salig'u manga ped a taw kagina nia nilan pedtalun na nanggula den su kambibiag 'bpaluman nu namamatay. 19 Ugaid'a apia ka maitu, na su udsadan nu walay a pinatindeg'u Kadenanb na di magkeleng-keleng a nia lun nakaukil na “Katawan nu Mapulu u entain i lusud sa lekanin,”c enggu “Apia entain i semimba kanu Mapulu na dait a taligkudan nin su galebek a kadaluakan.”
20 Na sia kanu masela a walay nu kawasa na dikena langun nu langun-taman nin na ebpun sa bulawan enggu pilak ka aden bun inumbal a ebpun sa kayu enggu malumiket a budta. Na 'bpagusalen kanu balapantag a pakalagian su manga langun-taman a ebpun sa bulawan enggu pilak enggu 'bpagusalen menem kanu uman-uman gay su manga langun-taman a ebpun sa kayu enggu malumiket a budta. 21 Kagina ka maitu na apia entain i ikelasen nin su ginawa nin na mabaluy sekanin a mana su langun-taman a 'bpagusalen kanu balapantag a pakalagian, inisenggay sekanin nu Kadenan enggu balapantag sekanin kanu Mapulu taman sa adil sekanin kanu apia ngin a mapia a galebek. 22 Tembu tangkai ka su dikena mapia a kiug'a ginawa nu manganguda ka nia ka paginapas na su kanggula nengka sa ngin i matidtu, kasalig kanu Kadenan, kakalimu enggu kapaguyag-uyag sa malilintad kaped'u manga taw a 'bpangadap kanu Mapulu sa ikelas i pamusungan nin. 23 Na di ka ibpamamantag su dala katagan nin a kapendalawana sa kababalan ka katawan nengka bun i nia nin bu i entu kabpawangan na kapamagukag. 24 Na nia man dait kanu ulipen nu Mapulu na dikena tagukagen ka nia pan mula na mapia i ukit'in kanu apia entain a taw, mataw mamandu enggu masabal. 25 Dait bun a mananaw i kambitiala nin kanu kapapedtidtu nin kanu 'bpamedsungkang sa lekanin ka kalu-kalu silan enggan nu Kadenan sa kutika a kadtaubat'ilan taman sa katuntayan nilan su bantang. 26 Na amaika maitu na makaimaman silan taman sa makalipuas silan kanu padulat'u Datu na Giadsal a linemigken kanilan asal'a manggula nin kanilan su pegkiugan nin a penggula kanilan.