Su Ula-ula nu Taw sia kanu Mangauli den a Timpu
3
Timuti, nia dait na katuntayan nengka i sia kanu mangauli den a timpu na maaden su sangat i kapasang'in a manga gay. 2 Kagina su manga taw na nia nilan bun den kalilinian na su ginawa nilan enggu kuleta, mangasandag silan enggu emamasela taman sa panila-tilan nilan su kaped'ilan. Sungkangen nilan su manga lukes'ilan, di den silan mataw manginsukulen enggu da den gilek'ilan kanu Kadenan. 3 Dala den kanilan su lat a nanam enggu di den silan miug mangampun taman sa pamelibaken nilan su kaped'ilan. Di nilan den kumpenen su ginawa nilan, su palangay nilan na mana daluaka a binatang taman sa di den silan malilini sa u ngin i mapia. 4 Tipun nilan i ped'ilan enggu di nilan den pagitungen su kadadsangan nu galebek'ilan. Mapulu den a benal i muletad'ilan enggu nia nilan den kalilinian na su kiug'u ginawa nilan kumin kanu Kadenan. 5 Nia 'gkailay kanilan na balaagama silan ugaid'a nia nin kabantangan na dikena silan balaagama ka pakakias'ilan su kabarakat'u Kadenan kanu uyag-uyag'ilan. Na tangkai ka su maitu ba a manga taw. 6 Kagina su ped kanilan na 'bpameludep kanu manga walay sa maya ta kun sa 'bpamamandu silan sa mapia asal'a kapagakalan nilan su manga babay a malemu mabintiana a 'gkaugatan den nu manga kabaladusan nilan. Na nia den pegkumpen kanilan na su embalang-balang den a manga kiug'u ginawa nilan. 7 Tatap 'bpamakikineg su manga babay a nia sa kanu panduan nu apia entain ugaid'a di nilan a benal 'gkatuntayan su bantang. 8 Na mana bun si Yanis enggu si Yambris a sinemungkang kanu Nabi Musa na maitu bun ba su manga mama a entu a 'bpamamandu ka pedsungkangen nilan bun su bantang. Na nabinasa den su itungan nilan enggu dala katagan nu kapedsalig'ilan kanu Kadenan ka dikena nilan 'bpaginugutan su bantang. 9 Ugaid'a apia ka maitu na di bun mananalusan su entu a galebek'ilan kagina makapayag bun kanu langun nu taw su entu a kababalan nilan a mana su kinapayag'u kababalan a pinggula ni Yanis enggu Yambris.Su manga Papata ni Bulus kani Timuti
10 Ugaid'a seka Timuti na 'gkatuntayan nengka a benal sa mapia su ibpamamandu ku, su ukit'u kabpaguyag-uyag ku enggu su kahanda ku. 'Gkatuntayan nengka bun su kapedsalig ku, su kapedsabal ku, su kapegkalimu ku enggu su kapedtigkel ku kanu manga kamalasayan 11 taman den kanu manga kabpamungkaid sa laki enggu su kamalasayan a nangatala ku lu sa dalepa a Antiuk, Ikunium enggu Listra. Na madakel man i natala ku a kinapamungkaid a tinigkelan ku ugaid'a kanu langun nu entu na inilipuas aku nu Mapulu. 12 Na nia nin kabantang na apia entain man i pegkiug 'bpaguyag-uyag sa kasuatan nu Kadenan sabap sa nalusud silan kanu Isa al-Masih na makatala sa kapamungkaid. 13 Na su manga taw menem a daluaka enggu su 'bpamagakal na makin mangiseg su kadaluakan nilan. Pakapasibay nilan su ped a manga taw taman den kanu ginawa nilan.
14 Ugaid'a mana i seka Timuti na papanalus ka su natuntayan nengka a manga panduan a 'bpaginugutan nengka kagina katawan nengka i su manga taw a namamandu sa leka sa entu na kasaligan 15 enggu iganat pan sa kawawatay nengka na katawan nengka den su manga suti a kitab a pedtutulu sa leka sa kalipuasan sia makanggulalan kanu salig kanu Isa al-Masih. 16 Na langun na nakadalem kanu kitab na ebpun demun kanu Kadenan. Masela i katagan nin sa kabpamandu, kabpangindaw, kapatidtu enggu katutulu sa u ngin i matidtu 17 ka enggu su langun nu panunugun nu Kadenan na adil sa tidtu-tidtu sa kanggalebek sa kanu ngin i mapia a galebek.