4
Na sia kanu adapan nu Kadenan enggu kanu Isa al-Masih a kemukum kanu langun nu taw magidsan i bibiag atawa ka minatay, na sabap sa embalingan sekanin taman sa endatu na pedsekaten ku seka sa 2 ipangusiat'engka su kadtalu nu Kadenan magidsan pan i katitimpuan atawa ka dikena katitimpuan. Patidtu ka su manga taw, daway ka silan, pagkabagel ka su ginawa nilan sia makanggulalan kanu kabpamandu nengka kanilan enggu dait a edsabal ka kanu kanggula nengka sa entu. 3 Kagina aden kutika a di den pakikinegen nu taw su tidtu a panduan ka mangilay den silan sa madakel a makapamandu kanilan sa mapia kanu tangila nilan a makaayun kanu kiug'u ginawa nilan. 4 Na taligkudanan nilan den su kapakikineg kanu bantang ka nia nilan den edsangulen na su pinangumbal bu a tudtulan. 5 Ugaid'a seka Timuti, na dait a kumpen ka su ginawa nengka kanu langun na kutika enggu tigkeli ka su kamalasayan, nia ka enggalebek na su kapayag kanu Mapia a Tutuma enggu inggulalan nengka su galebekan a inisangan nu Kadenan sa leka.6 Kagina saki na mangagan den makanggihad su umul ku kanu Kadenan ka mangagan den mapupus su kutika ku sia. 7 Na napasad ku den man su galebekan a inisangan nu Kadenan sa laki. Na iling-iling'u kapedsigi na nakalumpak aku den kanu lumpakan a dala magkeleng-keleng su salig ku kanu Kadenan. 8 Na saguna na aden den nakadtatalama sa laki a balas a inggay nu Mapulu a 'bpangukum sa wagib sabap kanu kinapaguyag-uyag ku sa matidtu. Na ibalas'in sa laki su entu kanu entu ba a gay enggu dikena saki bu i kabalasan ka apeg den nu langun nu pakapangingalap kanu kambalingan nin.
Su Mauli a Tutuma
9 Na paginapas ka i makasia ka sa mangagan 10 kagina tinagak aku den ni Dimas ka linemu sa Tisalunika ka nia nin linamig na su kaduduniay. Na si Krisinti menem na dala sia ka lu sa dalepa a Galasia enggu si Titus menem na lu sa dalepa a Dalmasia. 11 Na nia ku bu kaped sia na si Luk. Paunut ka bun sia si Markus kagina masela a benal i tabang'in sa laki sa kanu manga galebekan ku. 12 Na si Tikiku menem na pinaangay ku lu sa dalepa a Ipisu. 13 Na kanu kasia nengka na aut ka bu su balegkas ku a makapal a initabun ku kani Karpus lu sa dalepa a Truas maitu bun su manga libelu ku, labi-labi den su namakasulat sia kanu manga upis'u binatang. 14 Na mapasang man a benal i kinapakaid sa laki ni Anduk a panday na putaw. Su Mapulu bu i mataw sa lekanin mapapamayad kanu entu a pinggula nin. 15 Na pangingati ka a benal sekanin ka sangat man a sinungkang'in su manga ibpamandu tanu.
16 Na kanu nauna a kinapaadap sa laki kanu kukuman na apia sakataw na da demun tinemabang sa laki ka tinagak aku nilan langun. Na pangeni-ngenin ku i di nilan den mandusa su entu. 17 Ugaid'a da aku padtadaya nu Mapulu enggu inenggan aku nin sa bagel asal'a matalutup ku su kapebpayag ku kanu Mapia a Tutuma ka enggu makineg'u langun nu dikena-Yahudi su entu. Inilipuas aku nin kanu natatalanged a kapatay.a 18 Katawan ku i ilipuas aku nu Mapulu kanu langun na galebek'u saitan taman sa pananggiten aku nin sa dala baya-baya nin lu kanu pendatuan nin a sulega. Pugin su Kadenan taman sa taman. Amin.
Su Mauli a Salam
19 Na isalam aku nengka bu kani Prisila enggu Akila taman den kanu sakatiwalayan ni Unisipurus. 20 Si Irastus na migkalidtabun sekanin lu sa Kurintu enggu si Trupimus menem na initabun ku lu sa Militus ka di 'gkapia i ginawa nin. 21 Pagapas ka a benal i makauma ka sia sa dikena pan timpu na kapembalat.
Pedsalamen ka bun ni Yubulus, Pudin, Linus enggu Klaudia taman den kanu langun na lusud tanu sa tian sia sa kabpaginugut. 22 Na san sa lekanu su da idsan nin a limu nu Mapulu taman sa tapiden ka nin.
Wassalam