Sulat'i Bulus kani Titus
Su Salam
1
Salam, saki si Bulus a ulipen nu Kadenan enggu sinugu nu Isa al-Masih asal'a makapagkabagel su salig'u manga pinamili nu Kadenan enggu kapatuntayan kanilan su bantanga a makaagak kanilan sa kapaguyag-uyag a kasuatan nu Kadenan. 2 Nia kinasugu sa laki na sabap kanu inam kanu uyag-uyag a da taman ninb a inibpasad'u Kadenan sa lekitanu. Inibpasad den i nia nu Kadenan unan pan nu kinapangaden kanu dunia enggu katawan tanu i su Kadenan na di embudtud. 3 Na sia kanu timpu a inadil'u Kadenan na inipayag'in su Kadtalu nin. Na inisalig sa laki su kabpangusiat kanu entu a Kadtalu nin sia luyud kanu inisugu nin a Kadenan a 'bpamelipuas sa lekitanu. 4 Su nia a sulat na san pakatumpa sa leka Titus a tidtu a wata ku sia kanu kinaisa ta sa salig. Na san sa leka su da idsan nin a limu enggu kalilintad a ebpun kanu Ama tanu a su Kadenan enggu kanu Isa al-Masih a 'bpamelipuas sa lekitanu.Su Mapia a 'Gkangaunutan nu 'Bpamaginugut enggu su 'Bpamamandu sa di Pakatidtu
5 Nia ku kahanda sa kinatabun ku sa leka san sa dalepa a Krita na asal'a makapatidtu nengka su manga galebek a di gaid pakasugat enggu pamili ka sa manga kaunutan nu 'bpamaginugut kanu uman i siudad a mana bun su inidtutuma ku sa leka. 6 Nia ka pamili na su dala makatila lun enggu matulanged kanu kaluma nin.c 'Bpamaginugut su manga wata nin enggu dala makasendit lun a kasamukan atawa ka kategas'a ulu. 7 Kagina nia dait kanu pedtiakap kanu 'bpamaginugut na dala makatila lun kagina sinaligan sekanin nu Kadenan kanu galebek'in. Tembu nia dait na dikena sekanin masandag udi na dikena malemu malipunget, dikena palalangut, dikena tagukagen atawa ka dikena salimbuten sa kapamantiali. 8 Ka nia pan mula na masakaw sekanin kanu manga taw, balapantag sa lekanin su ngin i mapia, di masasaw, matidtu, ikelas enggu mataw kemumpen kanu kiug'u ginawa nin. 9 Dait a edtindegan nin sa senep sa atay su kasaligan a kadtalu a inipamandu sa lekanin ka enggu nin makapagkabagel su ped sa ukit a kapamandu nin kanilan kanu entu a tidtu a panduan enggu makapatidtu nin su 'bpamedsungkang sa entu.
10 Ka madakel man i pedsungkang kanu entu, labi-labi den su 'bpamamandu sa dait a mapapaletak.d Manga tagakalen man silan a taw enggu mangategel embitiala sa dala katagan nin. 11 Na nia dait na kasapalan silan sa nan a penggulan nilan kagina sia kanu kabpamandu nilan sa dikena wagib na pakapasibay nilan su manga sakambinabatan. Penggulan nilan i entu asal'a makapamantiali silan sa ukit a kasalimbut. 12 Na nia pidtalu nu taw a balaitungan sa dalepa a Krita a saka-inged'ilan bun na “Su manga taw sa Krita na tatap silan pembudtud, mana silan palangay na mawag a binatang enggu mangapauk a di mapenu.” 13 Na su pidtalu nu entu a mama pantag kanilan na benal. Tembu ba iluti ka a benal su kapatidtu nengka kanilan ka enggu pakatidtu su paginugut'ilan, 14 telenan nilan su kapamamantag kanu pinangumbal bu a tudtulan nu manga Yahudi udi na kanu manga kasuguan nu manga taw a pedtaligkud kanu bantang. 15 Na su taw man a matilak i atay nin na matilak sa lekanin su langun-langun.e Ugaid'a su taw a nabudsengan i atay nin enggu dala salig'in na apia ngin na dala matilak lunf kagina magiabu den su itungan nilan enggu maledsik den i atay nilan taman sa da den sendit'ilan kanu kapenggula nilan sa mawag. 16 Nia nilan ipebpayag na katawan nilan su Kadenan ugaid'a sia kanu manga galebekan nilan na pakakias'ilan su entu. Na pakasemu-semu silan, manga sungkang enggu di den silan kapakayan kanu apia ngin a mapia a galebekan.