Su Sabapan na Kapaguyag-uyag a Kasuatan nu Kadenan
3
Patademi ka bun kanilan i mapakatulanged silan enggu maginugut silan kanu langun nu 'gkangaunutan nu dalepa. Nia dait na adil silan sa kanggalebek'ilan sa apia ngin a kapianan, 2 di nilan edtaluan sa mawag su apia entain enggu abungan nilan su kapamagukag. Nia pan mula na ipailay nilan kanu langun nu manga taw su senep sa atay a kababa na muletad enggu su kapaminda.3 Kagina kanu paganay na da pan sabut tanu enggu pasusungkang tanu, nakasibay tanu sa lalan, naulipen tanu nu manga kamustakilan a kiug'a ginawa tanu enggu kalilini sa kaduduniay. Mindatu sa lekitanu su kawag'a palangay enggu kasekel sa dikena mapia. Na nabensian tanu nu manga taw enggu nabensian tanu bun silan. 4 Ugaid'a guna den makapayag'u Kadenan a 'bpamelipuas sa lekitanu su kakalimu nin enggu su kapianan nin kanu manusia 5 na inilipuas tanu nin sa dikena sabap kanu katidtu nu galebek tanu ugaid'a sabap kanu kapegkalimua nin sa lekitanu. Inilipuas tanu nin sia nakanggulalan kanu kinagagas'in kanu dusa tanu sa ukit a kinapangaden nin sa lekitanu 'bpaluman enggu sia kanu kinabagu nu Suti a Ruh kanu atay tanu. 6 Ka su Suti a Ruh na mana su ig a namelapay i kinabubus lun nu Kadenan sia sa lekitanu a sia nakanggulalan kanu Isa al-Masih a 'bpamelipuas sa lekitanu. 7 Na sabap kanu kapegkalimu a entu nu Kadenan na initimbang tanu nin den a ikelas asal'a mabaluy tanu a pebpusakan a su aden inam'in kanu uyag-uyag a da taman nin.
8 Na su langun nu entu a kadtalu na kasaligan tembu nia ku pegkiugan na ipamandu nengka sa mapia su entu kanu 'bpamedsalig kanu Kadenan ka enggu di maawa kanu ginawa nilan su kategel enggalebek sa kapianan. Ka su langun nu nia ba na mapia enggu aden guna-guna nin kanu langun na taw. 9 Ugaid'a abungi ka su kapendalawana a dala katagan nin, su kapedsisinantal kanu tarsilan, su kabpamagukag enggu su kapebpalawa pantag kanu pangitaban kanu agama kagina su nia a manga galebek na dala guna-guna nin enggu dala katagan nin. 10 Amaika nasapalan nengka den sa nakaisa atawa ka nakadua su taw a 'gkadsabapan nu kabpipitas na ikias'engka sekanin 11 ka katawan nengka den i maitu ba a taw na sinemibay den kanu bantang. Su kadusan nin i pakapaamad sa nawagiban sekanin.
Su Mauli a Papata
12 Na pedsugun ku san sa leka si Artimas atawa ka si Tikiku, na endaw i kauma nin san na pagapas ka a benal i makapagilaya ta lu sa dalepa a Nikupulis ka nia ku kahanda na lu aku matabu kanu timpu na kapembalat.b 13 Na enggula ka i endaw i taman a magaga nengka sa kadtabang'engka kani Sinas a abugadu enggu kani Apulus kanu kabpelalakaw nilan ka enggu dala kulang'ilan sa kanu apia ngin a nasisita nilan. 14 Pamandu ka bun su manga suled tanu sa kabpaginugut sa kadsamikal'ilan sa kanggula sa kapianan ka enggu nilan kadtabangan su pakanasisita, ka kanu maya ba a ukit na aden guna-guna nu uyag-uyag'ilan kanu ped a taw.
15 Na pedsalamen ka nu manga tagapeda ku sia. Isalam kami nengka bun kanu mangalimu sa lekami san a manga suled tanu sa paginugut.
San sa lekanu langun su da idsan nin a limu.
Wassalam