Su Kapaguyag-uyag a Kasuatan nu Kadenan
4
Manga lusud'ami sa tian na napamandu nami den sekanu sa kapaguyag-uyag a pakasuat kanu Kadenan taman sa ipenggulalan nu den su entu. Na sabap sa lusud tanu kanu Mapulu a su Isa al-Masih na 'bpangenin nami sa lekanu i papangiseg'u pan su entu a kabpaguyag-uyag'u. 2 Ka 'gkatawan nu bun man u ngin i inisugu nu Mapulu tanu a su Isa al-Masih a inipamandu nami sa lekanu. 3 Ka nia man kahanda nu Kadenan sa lekanu na mabaluy kanu a ikelas tembu nia dait na tangkai nu su kapedsina 4 enggu kumpen nu su ginawaa nu sa ikelas a ukit asal'a kapagadatan kanu, 5 dikena sa ukit a kaduduniay a kiug'a ginawa a mana bun su penggulan nu manga taw a da sabut'in kanu Kadenan. 6 Ka amaika maitu na dala a benal makanggula sa lekanu sa kanggiabu sa kaluma nu ped'in ka apia entain i enggula sa maitu ba na siksan nu Mapulu a mana bun su pinaingatan nami den sa lekanu. 7 Kagina dikena nia kinapamili nu Kadenan sa lekitanu i kanggula tanu sa maledsik a galebek ka kabaluy tanu sa ikelas. 8 Na apia entain i semungkang kanu nia a panduan na dikena su manusia i sinungkang'in ka nia nin sinungkang na su Kadenan a 'bpagenggay sa lekanu kanu Suti a Ruh nin.9 Na pantag menem kanu kagkakalimua nu a edsusuled sa paginugut na di den nasisita a isulat ku pan sa lekanu su makapantag sa entu ka su Kadenan demun i namandu sa lekanu sa kagkakalimua 10 taman sa penggulan nu su entu kanu langun nu manga suled'u sa paginugut sa lusud'a Masidunia. Ugaid'a apia ka maitu na 'bpangenin nami pamun sa lekanu a manga lusud'ami sa tian i makin nu papangiseg su entu a kagkakalimua nu. 11 Nia nu 'bpapangilay na panun i kabpaguyag-uyag'u sa malilintad, di nu lemusudi su uyag-uyag'u ped'u enggu pamantiali kanu sa mana bun su inipapata nami sa lekanu 12 asal'a di kanu makasalig kanu kauyagan nu apia entain enggu kapagadatan kanu nu apia entain a dikena 'bpaginugut kanu Isa al-Masih.
Su Pantag kanu Kambalingan nu Isa al-Masih
13 Manga lusud'ami sa tian na nia nami kalilinian na kasabutan nu su pantag kanu manganggula nu namamatay den a 'bpamaginugut kanu Isa al-Masih ka enggu di malidu i ginawa nu a dikena pagidsan kanu manga taw a dala inam'in sia kanu Mauli a Gay. 14 Na kagina ka 'bpaginugut tanu sa minatay su Isa al-Masih enggu mimbibiag sekanin 'bpaluman na 'bpaginugut tanu bun sa pambibiagen bun nu Kadenan su namamatay a lusud kanu Isa al-Masih enggu paunuten nin silan kanu Isa al-Masih kanu kambalingan nin.
15 Na nia su katigan nu Mapulu a su Isa al-Masih a ipebpayag'ami sa lekanu: Su sekitanu a bibiag pan kanu kambalingan nu Mapulu na natalatantu i di tanu kaunanan su namamatay den kanu kaalaw kanu Mapulu. 16 Ka kanu kutika a entu na sekanin demun i embaba ebpun sa sulega a salenganen nu matanug a suala a pedsugu, suala nu mapulu nu malaikat enggu su uni nu tambuli nu Kadenan. Na su namamatay a lusud kanu Isa al-Masih na pambibiagen 17 entu pan ka su sekitanu a manga bibiag pamun na munut tanu kanilan sa kabpapulu lu sa gabun ka enggu tanu maalaw su Mapulu lu sa kawang-kawangan taman sa madtagapeda tanu sekanin taman sa taman. 18 Kagina ka maitu na sia makanggulalan kanu nia a panduan na pagkabagelen nu uman i isa su ginawa nu ped'in.