3
Tembu guna su di kami den pakatigkel sa kapegkatadem'ami sa lekanu na nia nami napamagayunan na gagalu na lu kami sa dalepa a Atinas 2 na nia nami paunan embalingan san na si Timuti a lusud tanu bun sa tian a tagapeda nami kanu galebekan kanu Kadenan sia kanu kapebpayag kanu Mapia a Tutuma pantag kanu Masih ka enggu nin makapagkabagel su atay nu enggu su salig'u 3 asal'a di kanu makasangkup kanu 'gkangatala nu a kabpamungkaid. Na katawan nu bun man i sekitanu a 'bpamaginugut na unut kanu kabpaginugut tanu i makatala tanu sa kabpamungkaid 4 a mana bun su tatap'ami pedtalun sa lekanu kanu timpu a san kami pan sa lekanu ka 'gkanggula den ba a nia saguna enggu dikena i entu bagu sa lekanu. 5 Tembu ba guna su di aku den pakatigkel na pinasan ku si Timuti ka enggu nami 'gkatawan u ngin i betad'u salig'u ka 'gkagilekan aku sa basi nasasat kanu den nu Datu na Giadsal na kaawan na katagan su pinggalebek'ami sa lekanu.6 Ugaid'a saguna na nakambalingan si Timuti sa lekami a nakadtapik sa mapia a katigan pantag kanu salig'u enggu kanu limu nu. Na napanudtul'in bun sa lekami i mapia i labitan nu sa lekami enggu su kapegkiug'u a benal 'bpagilaya sa lekami a mana bun su kapegkiug'ami 'bpagilaya sa lekanu pebpaluman. 7 Na namba i sabap'in manga lusud'ami sa tian, sa apia pedtala kami sa kamalasayan enggu kabpamungkaid na pegkabagel bun i manggiginawa nami sabap kanu salig'u. 8 Na kagina ka maitu sa mabagel bun i tindeg'u kanu Mapulu na makasesengaw den i manggiginawa nami. 9 Na sabap kanu da idsan nin a nia a kapegkagalaw nami sia kanu adapan nu Kadenan sabap sa lekanu na kulang pan i kadsukul-sukul'ami kanu Kadenan a sambi sa entu. 10 Na magabi sa malamag na 'bpangeni-ngeni kami sa senep sa atay sa mamakapagilaya tanu pamun 'bpaluman ka enggu nami matalutup su ngin i kulang kanu salig'u.
11 Na 'bpangeni-ngenin nami kanu Ama tanu a su Kadenan enggu kanu Mapulu tanu a su Isa al-Masih i tutulun kami nin sa panun i kambalingan nami san sa lekanu. 12 Na ibpangeni-ngeni nami bun kanu Mapulu i isegan nin pan su kagkakalimua nu taman sa mamelapay su entu kanu uman i isa sa lekanu taman den kanu langun nu taw a mana bun su kabpamelapay nu limu nami sa lekanu. 13 Na amaika maitu na pagkabagelen kanu nu Mapulu asal'a di mapalin su kaikelas'u enggu di kanu katilan sia kanu adapan nu Ama tanu a su Kadenan sa kanu gay a kambalingan nu Mapulu tanu a su Isa al-Masih a ped'in su manga sinuti nin.a