Su Kinalu ni Bulus, Silas enggu Timuti sa Tisalunika
2
Manga lusud'ami sa tian na katawan nu man i dala kaawi na katagan su kinasan nami sa lekanu. 2 Na nasabutan nu bun i unan nu kinasan nami sa lekanu na tinemala kami sa kamalasayan taman sa pinagkaya kami pan lu sa dalepa a Pilipi. Ugaid'a apia ka maitu na pinagkabagel'u Kadenan i aki nami asal'a makapayag'ami sa lekanu su Mapia a Tutuma nin apia nia nin kaaden i madakel i pedsungkang sa lekami. 3 Ka dikena man pakasibay su kabpangusiat'ami atawa ka ebpun kanu maledsik a kahanda atawa ka kasalimbut 4 ka su kabpangusiat'ami na sabap sa pinamili kami nu Kadenan a dait a kasaligan nin kanu Mapia a Tutuma. Na su kapenggalebek'ami sa nia na dikena nami 'bpanunuaten su manusia ka nia nami 'bpanunuaten na su Kadenan a pakailay kanu atay nami. 5 Na katawan nu i dala nami sekanu ukita sa mamis a kangadtalu ka su Kadenan i saksi sa dikena nami sekanu pinamakutan mamantiali. 6 Dikena kami pakapangingalap sa pugi nu apia entain magidsan pan i ebpun sa lekanu atawa ka kanu ped a taw, 7 apia nia nin kaaden i aden kawagib'ami a manga sinugu nu Masiha sa kapamantun sa kapagadat'u sa lekami. Ugaid'a makin nia nami pinggula na pinagkalemek'ami i palangay nami sa lekanu a mana bun su ina a papedsusu kanu wata nin a manaut enggu pedtiakap lun. 8 Ka masupeg kanu man a benal kanu atay nami tembu dikena bu su Mapia a Tutuma nu Kadenan i inenggay nami sa lekanu ka apeg'u ginawa nami na inenggay nami sa lekanu ka sangat man a pinadtaya nami sekanu.9 Manga lusud'ami sa tian na natalatantu i 'gkatademan nu pamun su kinadsamikal'ami mamantiali kanu timpu na kabpangusiat'ami sa lekanu kanu Mapia a Tutuma nu Kadenan ka magidsan pan i magabi sa malamag na 'bpagapas kami 'bpamantiali asal'a di kami makaugat kanu apia entain sa lekanu.
10 Na sekanu enggu su Kadenan i saksi nami sa ikelas enggu matidtu kami taman sa dala makatila kanu ngin i pibpalangay nami sa lekanu a 'bpamaginugut. 11 Katawan nu bun i nia nami ula-ula kanu uman i isa sa lekanu na mana bun su ula-ula nu ama kanu wata nin 12 a papegkabagel kanu atay nu enggu pedsekat sa lekanu 'bpangeni sa maguyag-uyag kanu sa ukit a makadait kanu Kadenan a 'bpagenggat sa lekanu sa makaampit kanu kanu kapendatu nin enggu kanu sigay nin.
Su Kinapamungkaid kanu 'Bpamaginugut
13 Na di bun 'gkapinda su kapedsukul-sukul'ami kanu Kadenan kagina tinalima nu su kadtalu nu Kadenan a inipangusiat'ami sa lekanu sa dikena matag kadtalu bu nu manusia ka saben-sabenal a kadtalu demun nu Kadenan. Saleta na entu bun ba i benal na kadtalu i entu nu Kadenan enggu 'gkailay su kabarakat'u entu sia kanu uyag-uyag'u a 'bpamaginugut. 14 Ka sekanu a manga lusud'ami sa tian na nakapagidsan kanu man kanu manga lumpukan nu 'bpamaginugut kanu Kadenan a lusud kanu Isa al-Masih sa dalepa a Yudia ka u ngin i kinatala nu sa kamalasayan kanu manga pagidsan nub na maitu bun ba i kinatala nilan sa kamalasayan kanu manga pagidsan nilan a Yahudi. 15 Ka su Mapulu tanu a su Isa al-Masih na nia bun minimatay lun na su manga pagidsan nin bun a manga taw a Yahudi, na maitu bun ba su manga nangauna pan a nabi enggu apia sekami na pagidsan nami bun a Yahudi i namungkaid sa lekami. Di silan pakasuat kanu Kadenan enggu timbang a pegkuntelan nilan su langun nu taw 16 ka di nilan 'gkalilinian i kabpangusiat'ami kanu manga taw a dikena-Yahudi sa kalipuas'ilan. Na pedsusubela den su kapembaladusa nilan tembu su lipunget'u Kadenan na pakatingguma den kanilan.
Su Kabpagilaya ni Bulus 'Bpaluman kanu 'Bpamaginugut lu sa Tisalunika
17 Manga lusud'ami sa tian na apia bagu pamun i kinabpapitas sa lekitanu na nangilay kami den sa ukit sa kambalingan nami san sa lekanu ka sangat man a 'gkatademan nami sekanu. Na apia dala kami san na di kanu 'gkaawa kanu ginawa nami 18 ka pegkiug kami man a benal pembalingan san, labi aku den ka nakapila aku den pedtekaw pembalingan san ugaid'a tatap kami 'bpagungenen nu Datu na Giadsal. 19 Ka sekanu i 'bpagenggay sa lekami sa inam enggu papegkagalaw sa lekami, sekanu i balas'ami a makamamasela nami sia kanu kaadapan nu Mapulu a su Isa al-Masih sia kanu kambalingan nin. 20 Saben-sabenal a sekanu man i kabadtugan nami enggu papegkagalaw sa lekami.