Ika-isa a Sulat kanu Manga Taw sa Tisalunika
Su Salam
1
Salam sa lekanu. Su nia a sulat na ebpun kani Bulus, Silas enggu Timuti a san pakatumpa sa lekanu a lumpukan nu 'bpamaginugut sa Tisalunika a lusud kanu Ama tanu a su Kadenana enggu kanu Mapulu tanu a su Isa al-Masih. San sa lekanu su da idsan nin a limu enggu kalilintad.Su Kapedsukul-sukul kanu Salig'u 'Bpamaginugut sa Tisalunika
2 Na uman kami 'bpangeni-ngeni na tatap'ami sekanu ibpagamung enggu ipedsukul-sukul kanu Ama tanu a su Kadenan 3 kagina di nami a benal 'gkalipatanan su galebek'u a unga nu salig'u enggu su kapedsamikal'u penggalebek a unga nu limu nu taman kanu kapedsabal'u a unga nu inam'u kanu Mapulu tanu a su Isa al-Masih.
4 Manga lusud'ami sa tian a ipegkalimu nu Kadenan, katawan nami i pinamili kanu nu Kadenan 5 kagina su kinapangusiat'ami sa lekanu kanu Mapia a Tutumab na dikena bu matag manga kadtalu ka aden kabarakat'in a ebpun kanu Suti a Ruh enggu natatalanged'ami i benal su inipangusiat'ami sa lekanu. Na katawan nu bun man u ngin i manga ula-ula nami kanu san kami pan sa lekanu. Na su langun nu entu na pinggula nami sa lekanu a kapianan. 6 Na nakapagidsan kanu man sa lekami enggu kanu Mapulu a su Isa al-Masih ka apia pedtala kanu kanu sangat i kapasang'in a kabpamungkaid kanu kinatalima nu kanu kadtalu nu Kadenan na pinagkagalaw kanu bun nu Suti a Ruh. 7 Na sabap sa entu na nabaluy kanu a upaman a kailingan nu langun na 'bpamaginugut magidsan i san sa Masidunia enggu sia sa Akaya. 8 Ka nabadtug man su kadtalu nu Mapulu sia nakanggulalan sa lekanu, dikena bu san sa Masidunia enggu sia sa Akaya ka taman den kanu apia endaw a dalepa. Ka nakapayapat den man su pantag kanu kapedsalig'u kanu Kadenan tembu di den nasisita a panudtulen nami pan kanu ped a taw su pantag kanu entu. 9 Kagina silan demun i 'bpanudtul lun u panun i kinatalima nu sa lekami enggu panun i kinataligkud'u kanu manga pegkakadenanen ka enggu kanu makasimba kanu kaisa-isa nin bu a tidtu a Kadenan. 10 Pinanudtul'ilan bun u panun i kabpagingapa nu kanu Tunggal'u Kadenan a ebpun sa sulega a su Isa al-Masih a pinambibiag'in 'bpaluman. Sekanin i 'bpamelipuas sa lekitanu kanu pakatingguma a lipunget'u Kadenan.