5
Manga lusud'ami sa tian, na di den nasisita a edsulatan kanu pan makapantag kanu ngin i kutika enggu gay a kanggula kanu langun nu entu. 2 Na 'gkatawan nu bun man i su gay a kambalingan nu Mapulu na di 'gkatawan a mana bun su tanegkawn a pakatekaw demun pakauma sa magabi. 3 Na manggula su entu kanu timpu a nia kataw nu manga taw na malilintad enggu dala makagkaid ugaid'a dikena besen ka kanu entu demun ba na makatekaw makatingguma kanilan su tiuba a mana su kapegkatekaw 'bpelumpak'u masakit kanu babay a pembata. Na nanget a di nilan kalidasan su entu.4 Ugaid'a sekanu a manga lusud'ami sa tian na dikena kanu man 'bpaguyag-uyag sia kanu kalibutengan tembu di makakedu i ginawa nu sa kanu gay a kambalingan nu Mapulu, dikena mana su kapegkauma nu tanegkawn a pakakedu i ginawa nu. 5 Kagina langun nu na sia kanu 'bpaguyag-uyag kanu kaliwanagan dikena sia kanu kalibutengan. Na nalusud tanu man sia kanu malamag dikena sia kanu magabi 6 tembu di tanu miling kanu ped a taw a pedtulug ka makin nia tanu enggulan na mimaman tanu enggu kumpenen tanu su ginawa tanu. 7 Kagina nia kadsalilidan a kapedtulug'u manga taw na magabi enggu magabi bun i katatapan a kapendalangutan nilan. 8 Ugaid'a sabap sa sekitanu na nalusud tanu kanu malamag na dait a kumpenen tanu su ginawa tanu enggu isangan tanu su kelung'u laleb a su limu enggu su salig. Isangan tanu bun su kelung'u ulu a su inam tanu a su kalipuasan. 9 Ka dikena man nia kinapamili nu Kadenan sa lekitanu i siksan tanu nin ka nia nin kinapamili sa lekitanu na asal'a matalima tanu su kalipuasan a sia makanggulalan kanu Mapulu tanu a su Isa al-Masih 10 a minatay sabap sa lekitanu asal'a madtagapeda tanu sekanin taman sa taman, magidsan pan i bibiag tanu atawa ka minatay tanu den sia kanu kambalingan nin. 11 Kagina ka maitu na papanalus'u su kapagkabagel'u kanu ginawa nu ped'u taman sa edtatabanga kanu sa kagkabagel'u salig'u uman i isa sa lekanu a mana bun su penggulan nu den a nan.
Su Mauli a Tutuma
12 Manga lusud'ami sa tian na 'bpangenin nami sa lekanu i enggi nu sa alaga su manga taw a pedsamikal penggalebek san sa lekanu a 'bpangulu sa lekanu sia kanu Mapulu enggu 'bpamapata sa lekanu. 13 Pagadati nu a benal silan enggu ikalimu nu silan sa senep sa atay sabap kanu galebek'ilan a entu. Paguyag-uyag kanu sa malilintad kanu uman i isa.
14 Manga lusud'ami sa tian na 'bpangenin nami bun sa lekanu i pangindaw nu su manga pebpauk-pauk, pagkabagel'u su manga matalaw i aki nin enggu tabangi nu su manga malubay taman sa edsabali nu su uman i isa. 15 Na sigulu nu i di nu kasulian sa mawag su penggula sa lekanu sa mawag ugaid'a tatap'u paginapas su kanggula nu sa mapia kanu uman i isa sa lekanu taman den kanu langun na taw.
16 Tatap'u pagkagalaw su manggiginawa nu, 17 di nu pebpinda su kabpangeni-ngeni nu 18 enggu apia ngin i manggula na edsukul-sukul kanu kagina nia ba i pegkiugan nu Kadenan a enggulan nu a manga nalusud kanu Isa al-Masih.
19 Di nu 'bpagungena su galebek'u Suti a Ruh 20 enggu di nu 'bpagawi sa katagan su manga ipebpayag a kadtalu nu Kadenan, 21 ka makin nu edsima-sima su langun nu entu ka u ngin i mailay nu lun a mapia na entu ba i kua nu. 22 Na lidasi nu su langun nu embalangan a kadaluakan.
23 Na 'bpangenin nami kanu Kadenan a 'gkabpunan nu kalilintad i ikelasen kanu nin sa tidtu-tidtu taman sa tiakapan nin su itungan nu, su ngiawa nu enggu su badan nu asal'a di kanu katilan kanu kambalingan nu Mapulu tanu a su Isa al-Masih. 24 Na tumanen nu Kadenan su entu a namili sa lekanu kagina matidtu man sekanin.
25 Manga lusud'ami sa tian na ipangeni-ngeni kami nu bun.
26 Salam'u su manga suled'u sa paginugut sia luyud kanu kinasuti sa lekanu nu Kadenan.
27 Sia kanu ingala nu Mapulu na ipebpaliugat ku sa lekanu i batia nu su nia a sulat sa kanu langun nu manga suled tanu sa paginugut.
28 San sa lekanu su da idsan nin a limu nu Mapulu tanu a su Isa al-Masih.
Wassalam