Su Kinalu ni Bulus sa Dalepa a Kurintu
18
Ulian nu entu na ginemanat menem si Bulus sa Atinas ka linemu sa Kurintu. 2 Na nakadtalabuka nin lu su Yahudi a bedtuan sa Akila a taw sa Puntus. Bagu pamun i kinauma nin ebpun sa Italia a ped'in su kaluma nin a si Prisila. Nakaawa silan lu ka inisugu nu Sultan Klaudius i paawan su langun na manga Yahudi sa Ruma. Na pibpawangan silan ni Bulus 3 taman sa lu pan sekanin migkakaleben kanilan ka pedtabangan nin silan kanu galebekan nilan, kagina isa bu silan sa pantialian a kabpangumbal sa balung-balung a tuleda. 4 Na uman Gay nu Kabpangintelenen na pedsinantala sekanin lu kanu walay a pedsambayangan ka enggu nin maakat su manga taw lu magidsan i Yahudi enggu dikena-Yahudi sia kanu ibpamandu nin.5 Guna den makauma si Silas enggu Timuti ebpun sa Masidunia na nia bu penggalebeken ni Bulus na kabpangusiat kanu manga Yahudi sa su Masih na su Isa. 6 Ugaid'a guna sekanin sungkanga enggu edsudi nu manga Yahudi a entu na inipubpug'in su libubuk'u balegkas'ina sa nia nin pidtalu na “Apia makanaraka kanu na kadupangan nu den, di ku den mandusa su entu. Iganat saguna na nia ku den mambu pangusiatan na su manga taw a dikena-Yahudi.” 7 Daka tinagak'in silan lu kanu walay a pedsambayangan nu manga Yahudi ka linemu kanu walay nu mama a dikena-Yahudi a bedtuan sa Titus Yustus a pedsimba bun kanu Kadenan. Na su walay a entu na lu bun kanu tapid'u walay a pedsambayangan. 8 Na su 'gkaunutan nu walay a pedsambayangan a si Krispu apeg'u sakatiwalayan nin na naginugut kanu Mapulu a su Isa. Na madakel bun a manga taw sa Kurintu i namakikineg kani Bulus enggu naginugut taman sa napasalawat silan.
9 Na aden magabi a pibpayagan nu Mapulu a su Isa al-Masih si Bulus sa nia nin lun pidtalu na “Da ka 'gkagilek! Da ka pedsangkup ka makin ka patalus su kabpangusiat'engka 10 kagina pedtapiden ku seka. Na da man makapamungkaid sa leka ka madakel i manga taw ku kanu nia a siudad.” 11 Daka midtangen pan lu sa Kurintu si Bulus kanu dalem'u nakasalagun enggu tenga ka 'bpamandun nin silan kanu kadtalu nu Kadenan.
12 Ugaid'a guna den makanggubilnadul si Galiu sa Akaya na sinigkem'u manga Yahudi si Bulus ka iniadap'ilan lu kanu 'bpangukuman 13 sa nia nilan pidtalu na “Su nia a mama na 'bpagakaten nin su manga taw sa semimba kanu Kadenan sa ukit a sungkang kanu pangitaban.” 14 Na nia kabpaguka ni Bulus kanu ngali nin na midtalu si Galiu kanu manga Yahudi sa “Amaika su nia a manga bitiala na kadupangan a galebek atawa ka sungkang kanu pangitaban na dait a pakikinegen ku sekanu. 15 Ugaid'a kagina ka su nia a 'gkabpapalawan na pantag bu kanu manga kadtalu, kanu manga ngala enggu kanu manga kasuguan nu a manga Yahudi na sekanu demun i mataw lun i nan embibitiala. Di ku kiugan a makukum ku su manga maya ba.” 16 Daka pinaawa nin silan kanu 'bpangukuman. 17 Guna su maitu na sinigkem'u manga taw si Sustinas a 'gkaunutan nu walay a pedsambayangan ka pinametay nilan lu kanu kaadapan nu 'bpamangukum. Ugaid'a da i entu ipamamantag'i Galiu.
Su Kinambalingan ni Bulus sa Antiuk
18 Ulian nu entu na midtangen pan si Bulus lu sa Kurintu entu pan ka nagetaw sekanin kanu 'bpamaginugut lu ka linemu sekanin sa dalepa a Kinkiria a kaped'in si Prisila enggu si Akila. Na su kinauma nilan lu na napatabungaw sekanin sa tanda a tinuman nin su pasad'in kanu Kadenan. Entu pan ka linemayag silan 'bpawang sa Syria. 19-21 Na guna silan makaaut sa Ipisu na linemu si Bulus kanu walay a pedsambayangan ka inidsinantala nin su manga Yahudi lu pantag kanu Isa al-Masih. Na pinangeni nu manga taw i edtangen pan lu si Bulus ugaid'a da sekanin kiug. Na nia nin pidtalu kanilan kanu kapengganat'in na “Amaika miug su Kadenan na embalingan aku bun sia.” Entu pan ka tinemalus sekanin lemayag ganat sa Ipisu. Na initabun nin lu si Prisila enggu si Akila.
22 Na guna sekanin makadunggu sa Kaisaria na linemu sekanin sa Awrusalim ka pibpawangan nin lu su lumpukan nu 'bpamaginugut, entu pan ka tinemalus sekanin lu sa Antiuk. 23 Ulian nu kinadtangen ni Bulus lu na ginemanat menem sekanin ka linemu kanu manga dalepa sa Galasia enggu Prigia ka pinagkabagel'in su salig'u 'bpamaginugut lu.
Su Kinapangusiat'i Apulus lu sa Ipisu enggu Kurintu
24 Na kanu entu a timpu na aden Yahudi a nakauma lu sa Ipisu a bedtuan sa Apulus a taw sa Aliksandria. Mapia i kadtalu-talu nin enggu masela i sabut'in kanu kitab. 25 Na napamandu sekanin pantag kanu Mapulu a su Isa. Maselsel i ginawa nin sa kapangusiat enggu pakasugat su ibpamandu nin pantag kanu Isa. Ugaid'a nia nin bu natawan a salawat na su salawatb a inipamandu nu Yahiya. 26 Na linemudsu sekanin mangusiat sa da den gilek'in lu kanu walay a pedsambayangan. Ugaid'a guna sekanin makineg'u 'gkalumaya a si Prisila enggu si Akila na inenggat'ilan ka pinasabutan nilan sa mapia su kahanda nu Kadenan pantag kanu kalipuasan. 27 Ulian nu entu na nagkahanda ni Apulus i lemu sa prubinsia a Akaya. Na tinabangan sekanin nu 'bpamaginugut sa Ipisu ka pidsulatan nilan su 'bpamaginugut lu sa Akaya sa taliman nilan sekanin sa mapia. Na guna den sekanin makauma lu na masela a benal i nakadtabang'in kanu manga taw lu a namaginugut sabap kanu limu nu Kadenan. 28 Na su manga Yahudi lu na dala makagaga sa lekanin endalawana sia kanu kaadapan nu madakel a taw sa kapebpagamad'in sia kanu kitab sa su Isa na sekanin su Masih.