Su Kinambalingan ni Bulus sa Ipisu
19
Na gagalu nu lu pan sa Kurintua si Apulus na minukit si Bulus lu kanu kapuluan a dalepa ka mimbalingan sa Ipisu. Na guna den sekanin makauma lu na nakadtalabuka nin su ped a 'bpamaginugut. 2 Nia nin inidsa kanilan na “Natalima nu bun su Suti a Ruh kanu kinapaginugut'u?” Na nia nilan inisawal na “Dala! Da nami pamun makineg i aden besen Suti a Ruh.” 3 Inidsan nin menem silan sa “Amaika maitu na ngin i salawat a inunutan nu?” Na nia nilan menem inisawal na “Su salawat'u Yahiya.” 4 Na nia pidtalu ni Bulus na “Su salawat'u Yahiya, na salawat a tanda sa midtaubat den su taw. Na pidtalu nu Yahiya kanu manga taw i aden pakatundug sa lekanin a dait a paginugutan nilan. Na su entu na su Isa.” 5 Na guna nilan makineg i entu na napasalawat silan sia kanu ingala nu Mapulu a su Isa. 6 Na kanu kinadapenet'i Bulus kanilan na linangkapan silan nu Suti a Ruh. Na nakadtalu silan sa embalang-balang a basa enggu pebpayag bun silan kanu kadtalu nu Kadenan. 7 Na su napasalawat na manga sapulu enggu dua kataw silan langun.8 Na kanu dalem'u telu ulan na tatap 'bpeludep si Bulus kanu walay a pedsambayangan nu manga Yahudi ka ipedsinantala nin sa da den gilek'in su manga taw lu ka enggu nin maakat silan sia kanu kapendatu nu Kadenan. 9 Ugaid'a su ped na mangategas i ulu nilan ka di bun silan 'bpamaginugut enggu pedtalu-talu pan silan sa mawag kanu panduan pantag kanu Mapulu lu kanu kaadapan nu madakel a taw. Daka ginanatan silan ni Bulus a kaped'in bun su 'bpamaginugut ka lu sekanin midsinantal sa uman gay kanu 'bpamanduan ni Tiranus. 10 Na nakagaus sa dua lagun i kinanggalebek'i Bulus sa entu. Kagina ka maitu na su langun nu manga taw kanu embala-bala sa prubinsia a Asia magidsan i Yahudi enggu dikena-Yahudi na nakakineg kanu kadtalu nu Mapulu.
Su manga Wata a Mama ni Iskiba
11 Na napailay sa madakel a kangagaipan su Kadenan a sia nin ininggulalan kani Bulus. 12 Apia su musala atawa ka su balegkas a nausal den ni Bulus na pakapagkapia den kanu pendalu amaika 'gkakembil'ilan enggu pakapaawa bun kanu saitan a minasuk. 13 Na aden bun ped a manga Yahudi a pedsugud-sugud kanu manga dalepa ka 'bpamugaw silan sa saitan kanu manga taw a inasukan nin. Na binatalu nilan musal su ingala nu Mapulu a su Isa al-Masih sa nia nilan pedtalun na “Kanu ingala nu Isa a ibpangusiat'i Bulus na awa kanu san.” 14 Na maitu bun ba i penggalebeken nu pitu kataw a wata a mama ni Iskiba a mapulu nu 'bpamangurban nu manga Yahudi. 15 Ugaid'a sia kanu kabpamugaw nilan kanu saitan na sinumpatan silan nu saitan sa “Katawan ku si Isa enggu si Bulus ugaid'a sekanu na entain kanu?” 16 Daka su mama a inasukan nu saitan na sinugkuban nin silan taman sa tinalaw nin silan. Na pinakapasangan nin silan taman sa naluwasan na balegkas enggu nangapalian pan a sabapan na kinapalalaguy nilan lemiu kanu walay.
17 Na su nia a nanggula na napayag kanu langun nu taw sa Ipisu magidsan i Yahudi enggu dikena-Yahudi. Daka naadenan silan na gilek enggu sangat a pinagadatan nilan su ingala nu Mapulu a su Isa. 18 Sabap sa entu na madakel a 'bpamaginugut lu i inipangumpaya nilan i minggalebek bun silan sa kabpangalintaw. 19 Na su ped kanilan na linimud'ilan su manga libelu a ilayan nilan sa kabpangalintaw ka tinutung'ilan sia kanu kaadapan nu madakel a taw. Na su alaga nu manga libelu a entu na nakagaus sa limapulu ngibu a kuleta a pilak. 20 Na sabap kanu entu a nanganggula na su kadtalu pantag kanu Mapulu na makin bun pakapayapat enggu pegkabagel.
Su Kasamukan sa Ipisu
21 Na ulian nu entu a nanganggula, na napagitung'i Bulus i lemu sekanin sa Awrusalim a lu sekanin mukit sa Masidunia enggu Akaya sa nia nin pidtalu na “U makalu aku den na dait a temalus aku sa Ruma.” 22 Na gagalu nu kinadtangen nin lu sa prubinsia a Asia na pinauna nin lu sa Masidunia su dua kataw a 'bpananabangan lun a si Timuti enggu si Irastu.
23 Na kanu entu a timpu na naaden su masela a guligaw lu sa Ipisu sabap kanu panduan pantag kanu Mapulu. 24 Aden isa a panday na pilak a bedtuan sa Dimitriu a 'bpangumbal sa manganaut a walay a pilak a inilimbang sa pedsimban kanu pegkakadenanen nilan a si Artimis. Na sabap sa entu na madakel a kuleta i 'gkapantiali nin apeg'u manga gumagalebek lun. 25 Na linimud'in su manga gumagalebek lun enggu su manga taw a maya bun ba i galebek'in ka nia nin pidtalu kanilan na “Manga tagapeda ku, katawan nu i pakatalima tanu sa mapia a pantiali kanu nia a galebekan. 26 Na 'gkailay nu enggu 'gkakineg'u u ngin i penggulan ni Bulus a nia. Pedtalun nin i dikena tidtu a kadenan su manga kadenan a pinangumbal bu. Madakel i nakua nin mamitiala sa kapasibay nin kanu manga taw, dikena bu sia sa Ipisu ka paidu sama makataneb kanu embala-bala sa Asia. 27 Kagina ka maitu na dikena bu nia kagkaidan su nia a pantialian tanu ka kaawan pan na katagan su walay a pedsimban tanu kanu badtug a kadenan tanu a su Artimis a pedsimban bun nu langun na taw kanu lusud'u Asia taman den kanu embala-bala sa dunia enggu su kabadtugan nin na maawa bun.”
28 Na guna nilan makineg i entu na nalipunget a benal silan enggu 'bpamelalis sa “Badtug su Artimis a kadenan nu manga taw sa Ipisu!” 29 Daka nangaguligaw su manga taw kanu siudad. Sinigkem'ilan su manga tagapeda ni Bulus sa kapendadalaug'in a si Gayus enggu si Aristarkus a manga taw sa Masidunia ka pinamagayasan nilan gemuyud lu kanu pembatunan sa pakalagian. 30 Na kiugan ni Bulus a makambitiala nin su manga taw lu ugaid'a da sekanin suguti nu 'bpamaginugut. 31 Na su ped a 'gkangaunutan kanu inged a manga pakat'i Bulus na napapait bun sa lekanin sa katigan sa di sekanin lemu kanu pembatunan sa pakalagian. 32 Saleta na 'gkangaguligaw su manga taw a nangalimud lu. Su ped na salakaw i ibpelalis'in, su ped menem na salakaw bun. Kadakelan kanu manga taw na di nilan 'gkatawan u ngin i 'gkangalimudan nilan. 33 Su ped kanu manga 'gkangalimud na nia nilan sabut na si Anduk i napunan nu guligaw kagina sekanin i pinalu nu manga Yahudi kanu kasangulan.b Daka ginulinganan nin su manga taw sa di silan edsasaw ka enggu nin kapatuntayan kanilan su entu a 'gkanggula. 34 Ugaid'a guna nilan makilala si Anduk a isa bun a Yahudi na kanu dalem'u dua kauras na mindadaledsang silan lemalis sa “Badtug su Artimis a kadenan nu manga taw sa Ipisu!”
35 Ulian nu entu na nakapalenek bun nu isa kanu 'gkangasaligan kanu siudad su manga taw sa nia nin pidtalu na “Manga taw sa Ipisu! Na katawan nu uman i isa i su siudad a Ipisu i pedtuganul kanu pedsimban kanu badtug a su Artimis enggu su watu a makalimbang sa lekanin a naulug ebpun sa langit. 36 Na da man i nia makabpalaw lun tembu tuludu kanu! Da kanu edsasaw enggula sa apia ngin. 37 Na su manga mama a nia a pinananggit'u sia na dikena silan nanegkaw lu kanu pedsimban enggu da bun silan makadtalu sa sakutu kanu kadenan tanu. 38 Na amaika si Dimitriu enggu su manga tagapeda nin a gumagalebek ka aden ipedsendit'ilan kanu manga mama a nia, na aden walay na kukuman enggu 'gkangaunutan tanu. Mapakay a iadap'ilan lu su ipedsendit'ilan kanilan. 39 Ugaid'a amaika aden pan ped a ipembuku nu, na sia kanu mauma a kandidilimudan tanu na lu ba dait a mambibitiala su nia. 40 Sabap sa nia a nanggula na basi makasendit sa lekitanu su nia a guligaw ka dala makadalin tanu a mapia kanu langun nu nia a 'gkanggula.” 41 Guna nin madtalu i nia na pinauli nin su manga taw.