Su manga Palibasan ni Agur
30
Nia su kangadtalu ni Agur a wata a mama ni Yaki, su kadtalu a initulun lun nu Kadenan.Inipayag'i Agur i nia kani Itil enggu kani Akula sa nia nin pidtalu na
2 “Sangat den i kababal ku kanu langun na taw sa dunia,
ka su itungan ku na mana dikena itungan na manusia.
3 Da aku tuntut sa ilemu,
enggu dala a benal sabut ku kanu kaisa-isa nin a Suti a Kadenan.
4 Ngintu, aden den taw a nakabpapulu sa sulega enggu nakapangalimbaba sia sa dunia?
Ngintu, aden den taw a nakakemel sa sambel kanu palad'a lima nin?
Ngintu, aden den taw a nakapuyu sa lagat kanu balegkas'in?
Ngintu, aden den taw a nakagaga mapatindeg kanu pat a pisuk'u dunia?
Amaika aden katawan nu, na edtalu nu u entain i ngala nin
enggu ngin i ngala na manga wata nin.
5 Saben-sabenal a kasaligan su langun nu kadtalu nu Kadenan;
sekanin i kelung kanu langun nu papendalinding sa lekanin.
6 Di nu 'bpangumani su kadtalu nu Kadenan
ka u dawayn kanu nin na mapayangas su kangabudtud'u.
7 Hu Kadenan a Mapulu, aden bu dua timan a ibpamagayuk ku sa leka,
na 'bpangenin ku i inggay nengka i entu sa laki gagalu na di aku pan matay.
8 Muna-muna a 'bpangenin ku na tabangi aku sa di aku makambudtud,
ikadua na di aku nengka mapagkawasa enggu di aku nengka bun menem mapagkamiskin,
ka nia nengka bu inggay sa laki na endaw bu i nasisita ku.
9 Kagina amaika 'gkawasa aku na aden a entu na di ku den seka kilalan
enggu amaika menem ka miskinan aku na aden a entu na makapanegkaw aku,
na masela i entu a kayayan kanu ingala nengka a Kadenan ku.
10 Di ka pedtetebui sa bitiala su panunugun lu kanu mapulu nin,
ka amaika idsinta ka nin na aden a entu na makatala kanu sa mapasang.
11 Aden manga taw a di nilan 'bpagadatan su dua a lukes'ilan,
taman sa 'gkatika nilan pedsinta.
12 Aden bun manga taw a nia nilan kapegkailay sa ginawa nilan na dala manga tila nin,
ugaid'a nia nin kabantang na maledsik su manga pamusungan nilan.
13 Aden menem manga taw a mapulu i muletad'in,
amaika edtulik silan sa ped'ilan na nia nengka kataw lun na entain sekanin.
14 Aden bun manga taw a mana manga buaya ka su manga ngipen nilan
na ipembusaw nilan 'bpagebut kanu manga miskinan enggu kanu 'gkangabulugan sia sa liwawaw na dunia.
15 Su limatek na 'bpanusup sa lugu, dala kapedtelen nin 'bpangeni ka di mataw mausug.
Aden pat timan a di a benal mataw mausug
enggu dala kapegkasukul'in.
16 Na entu ba su lebengan, su babay a di pembata,
su mamala a lupa a pakanasisita sa ulan enggu su apuy a lalayun 'bpelalegan.
17 Na apia entain i edsudi kanu ama nin enggu di maginugut kanu ina nin,
na panukan nu manga uwak su bangkay nin
enggu kanen na mangasela a papanuk su entu.
18 Aden a nia pat timan a sangat a pakasabalang sa laki
enggu di ku 'gkasabutan.
19 Panun ba guna i kabpeledtu nu masela a lumalagit lu kanu kawang-kawangan
enggu su kabpananap'u nipay kanu mangasela a watu?
Panun ba guna i kapenggampung'u layag lu kanu luk'u lagat
enggu su kapembalagiuma nu mama kanu pinakawingan nin a laga pamun?
20 Na maya ba su ukit'u talakiuga a babay:
na endaw i kapasad'in embalagiuma sa salakaw a mama
na nia nin edtalun na dala kun pinggula nin a mawag.
21 Aden a nia pat timan a di 'gkatalima na ginawa nu taw,
22 na entu ba, na su ulipen a mama a mabaluy a datu,
su taw a babal a madakel i kauyagan nin,
23 su 'gkabensian a babay a nakagkaluma
enggu su ulipen a babay a nasambian nin su 'bpangungulipen lun.
24 Aden a nia pat timan a manganaut a benal sia sa liwawaw na dunia,
ugaid'a sangat i kabalaitungan nilan.
25 Su entu na: su manga puliga a dikena mangabagel,
ugaid'a 'bpelimud silan sa kauyagan sa timpu na panenang.
26 Su manga badyirb na dikena bun mangabagel,
ugaid'a pakagaga 'bpagumbal sa kagkalebenan nilan lu kanu damawatu.
27 Na su manga tapudi na dala 'bpangulu kanilan,
ugaid'a mapia i kapedtundug-tundug'ilan 'bpeledtu.
28 Su manga taletek na malemu gaid pedsigkemen,
ugaid'a lu silan kanu tulugan nu manga datu.
29 Aden a nia pat timan a binatang a mangasandag i kalakaw nin.
30 Na su entu na su alimaw a mabagel sa langun kanu manga binatang
enggu dala ipegkagilek'in,
31 su kalasan a manuk, su mandangan a kambing enggu su datu a 'bpangunanan kanu manga pabubunua nin.
32 Amaika penggula ka sa kabunegan asal'a mabadtug ka
atawa ka 'gkahanda ka sa kadaluakan,
na teleni ka den.
33 Ka pidsan pan su gatas ka kalukalen mamikal na mabaluy a madsem a gatasc
enggu su ngilung ka suntuken na 'bpulugu,
na maitu bun ba, su sakit'a ginawa ka kalalegan mamikal na maaden su kalimbul.