Su Matidtu a 'Bpangulu enggu su Mabagel a Siudad
29
Su taw a di embagu apia makapila den madawayna makatekaw demun sekanin mabinasa taman sa di den makambangun.
2 Amaika nia den mangulu kanu dalepa su daluaka a taw na mamakadegeng sa kapasang su manga taw,
ugaid'a amaika nia den mangulu kanu dalepa su matidtu a taw na makadsisigalaw silan.
3 Su taw a 'bpagenggan nin sa kapantag su ilemu na ikagalaw nu lukes'in,
ugaid'a su edtagapeda sa sundal a babay na kaibpedan na kakawasan.
4 Pakapagkabagel'u datu su pendatuan nin sa ukit'a kanggulalan nin kanu kawagib,
ugaid'a su datu a mapapamayad sa masela a buwis na pembinasan nin su pendatuan nin.
5 Su taw a 'bpamedtan nin sa dikena benal su pagidsan nin
na mana nin bun tinanan sa puket i ginawa nin.
6 Su taw a matidtu na makadsengal sa kagalaw nin,
ugaid'a su taw a daluaka na nia bun makagkaid lun na su kadaluakan nin.
7 Su matidtu a taw na ipenggulalan nin su kawagib'u manga miskinan,
ugaid'a su daluaka a manga taw na dala tuntay nilan sa maitu a ukit.
8 Su masudi a manga taw i pengguligaw kanu siudad,
ugaid'a su balaitungan a manga taw na pebpalilintaden nilan su siudad.
9 Amaika igkukum'u balaitungan su babal a taw na da bun kabputusan nin,
ka edsudian bu sekanin nu taw a babal a 'bpangaliputeng enggu di bun sekanin temelen.
10 Su taw a 'bpaguyag-uyag sa matidtu
na kabensian sekanin nu taw a talibunu enggu kiugan nin mimatay.
11 Su taw a babal na di nin magaga kemumpen su lipunget'in,
ugaid'a su taw a aden tuntay nin na 'gkagaga nin pegkumpen su ginawa nin.
12 Amaika su 'gkaunutan ka maginugut sa kabudtud,
na maibped endaluaka su langun nu pedsaligan nin.
13 Su miskinan enggu su papegkapasang lun na magidsan bun silan,
ka isa bu silan a inenggan nu Kadenan a Mapulu sa uyag-uyag.
14 Amaika su datu ka kukumen nin sa wagib su manga miskinan
na mapalalayun su kandatu nin taman sa taman.
15 Su kabetay kanu wata sa kapatidtu lun enggu su kadaway lun na makaenggay i entu sa lekanin sa ilemu,
ugaid'a su wata a dala pangindawa na kayayan i makaenggay nin kanu dua a lukes'in.
16 Amaika nia endatu su manga daluaka na mangiseg su kadaluakan,
ugaid'a apia ka maitu na kadsaksian nu manga matidtu a taw su kadadsang'ilan.
17 Na pangindaw ka sa kapatidtu lun su manga wata nengka
ka makapalilintad i entu sa leka enggu makaenggay silan sa kagalaw sa leka.
18 Sangat man i kapia nin kanu taw u maginugut kanu kasuguan nu Kadenan a Mapulu
ka amaika dala den man makapayag a kadtalu a makatutulu kanu manga taw na makandaya den su manga taw.
19 Su panunugun na di magaga mapatidtu sa ukit'a indawan bu,
ka apia 'gkasabutan nin bun na di nin bun ipamamantag.
20 Ngintu, nakailay kanu sa taw a masasaw i kasawal'in?
Su maitu ba a taw na nia pan aden inam'in su taw a babal kumin sa lekanin.
21 Amaika inggay kanu panunugun su langun nu kiug'in iganat pan kanu wata sekanin,
na sia kanu kaulianan nin na maumbal i entu ba a lidu na ginawa.
22 Su taw a malemu malipunget
na lalayun makatun sa ukag enggu makanggula sa kadaluakan.
23 Su kababa na muletad na makapabadtug kanu taw,
ugaid'a su kapulu na muletad na makapalusak kanu taw.
24 Su taw a mamung kanu galebekan nu tanegkawn na timbang a bininasa nin su ginawa nin,
ka amaika padsapan sekanin sa kapadsaksi lun kanu walay na kukuman na di nin edtalun su bantang.
25 Su taw a ikagilek'in su pagidsan nin na mana sekanin binatang a nakua na litag,
ugaid'a apia entain i semalig kanu Kadenan a Mapulu na dala manggula nin a mawag.
26 Madakel a taw i pedsupeg kanu datu ka 'bpanunugat,
ugaid'a nia nin kabantang na su Kadenan a Mapulu bu i makaenggay sa tidtu-tidtu a kawagib.
27 'Gkabensian nu matidtu a taw su daluaka,
na maitu bun mambu, 'gkabensian nu daluaka a taw su matidtu a taw.