Su Kapaginugut kanu Kasuguan
28
Su taw a matidtu na mana manga alimaw a dili matiagka,ugaid'a su taw a daluaka na pedtatalaguy sa apia dala 'bpaneled lun.
2 Amaika aden ilemu enggu tuntay nu taw a 'bpangulu kanu dalepa na mabagel su dalepa sa mauget a timpu,
ugaid'a amaika madakel kanu dalepa i pedsungkang na 'gkasambi-sambian su 'bpangulu lun.
3 Su taw a miskinan ka pakapasangan nin su pagidsan nin a miskinan
na mana sekanin maleges a ulan a pembinasa kanu pinamumula.
4 Su manga taw a pedtaligkud kanu kasuguan na 'bpamedtan nilan su daluaka,
ugaid'a su 'bpaginugut kanu kasuguan na pedsungkangen nilan su manga taw a daluaka.
5 'Gkasabutan sa mapia nu manga taw a aden gilek'in kanu Kadenan a Mapulu su pidtalu a kawagib,
ugaid'a su manga taw a daluaka na di nilan 'gkasabutan su entu.
6 Nia tinemu i miskinan a taw a 'bpaguyag-uyag sa matidtu
kumin kanu kawasa a taw a 'bpaguyag-uyag sa bigkug.
7 Su wata a balaitungan na 'bpaginugut kanu kasuguan,
ugaid'a su wata a pedtatanggunut sa manga makisapalen a taw na kayayan i makaenggay nin kanu dua a lukes'in.
8 Su migkawasa sa ukit'a kinapaiseg sa masela,
na su entu a kakawasan nin na makua nu taw a malimu sa miskinan.
9 Su taw a di maginugut kanu kasuguan
na apia su pangeni-ngeni nin na kabensian nu Kadenan.
10 Makatalima sa mapia a pusaka su taw a maguyag-uyag sa matidtu ,
ugaid'a su taw a agaken nin sa kadaluakan su taw a matidtu
na sekanin bun i maulug kanu lekanin a padulat.
11 Nia kapegkailay nu kawasa a manga taw kanu ginawa nilan na balaitungan,
ugaid'a 'gkadsusuliman i entu nu aden tuntay nin a miskinan.
12 Amaika nia den makandatu kanu dalepa su matidtu a taw na edsisigalaw su madakel,
ugaid'a amaika nia den makandatu kanu dalepa su daluaka a taw na mamagena silan.
13 Su taw a ipamagena nin su kadupangan nin na di embantas
ugaid'a su taw a imbantang'in su kadupangan nin taman sa taligkudan nin su entu na latan sekanin sa nanam'u Kadenan.
14 Sangat i kapia nin kanu taw a lalayun nin ikagilek su kandusa nin,
ugaid'a kabinasan i kabpawangan nu taw a mategas i pamusungan nin.
15 Su taw a daluaka a mangulu kanu manga miskinan
na mana sekanin 'bpaginggel a alimaw atawa ka talaw a binatang a 'bpangilay sa masakab'in.
16 Su 'bpangulu a dala tuntay nin na pangumisen nin su taw nin,
ugaid'a su mabensi sa kapagkawasa sa dikena mapia a ukit, na makapaguyag-uyag sa mauget.
17 Su taw a mangimatay sa pagidsan nin
na 'bpapagena bu taman sa kapatay nin.
Na di dait a edtabangan na apia entain.
18 Su taw a 'bpaguyag-uyag sa matidtu na makalipuas sa makagkaid,
ugaid'a su taw a 'bpaguyag-uyag sa ukit'a kasalimbut na mabinasa.
19 Su taw a lantek i kapangangawid'in na madakel i kauyagan nin,
ugaid'a su taw a ibpeden nin i kutika nin sa dala katagan nin na mamiskin.
20 Su taw a kasaligan na di mapinda i palihala lun,
ugaid'a su taw a malini a benal 'gkawasa sa dikena mapia a ukit na di makalipuas sa kasiksan.
21 Dikena mapia su kadsulamig,
ugaid'a aden manga taw a 'gkabayadan sa paidu bu na pedsulamig den.
22 Su masingit a taw na 'bpaginapas a benal sa kakawasan,
ugaid'a dala a benal sinabut-sabut'in kanu pakatingguma lun a kamiskin.
23 Sia sa kaulianan, na nia bun kapanginsukulan na su taw a mapatidtu sa pagidsan nin,
kumin kanu taw a 'bpamedtan nin su pagidsan nin inunta na dikena entu i benal.
24 Su taw a panegkawan nin i dua a lukes'in
ka sia sa pagitung'in na dikena i entu kadusan,
na naluyud sekanin kanu manga taw a 'bpaminasakan.
25 Su taw a semalig kanu Kadenan a Mapulu na embantas,
ugaid'a su taw a di masukul na 'bpangaden sa guligaw.
26 Su taw a 'bpaguyag-uyag sia luyud kanu ilemu na dili kagkaidan,
ugaid'a su taw a nia nin pedsaligan na ginawa nin na babal.
27 Su taw a mangalimuan sa miskinan na di 'gkulang kanu manga nasisita nin,
ugaid'a su taw a di nin ipamamantag su pakanasisita na madakel i matalima nin a pinta.
28 Amaika nia den makandatu kanu dalepa su daluaka a taw na mamagena su manga taw,
ugaid'a amaika mangadala den su manga daluaka a entu na 'gkadakel su manga taw a matidtu.