Su Kahanda na di Dait a Ipedsandag
27
Na di ka ipedsandag u ngin i kahanda nengka kanu temundug a gaykagina di nengka 'gkatawan u ngin i manggula kanu mangauma pan a gay.
2 Di ka ipembabadtug i ginawa nengka,
ugaid'a angati ka den i ped a taw i madtug sa leka.
3 Su pedtad enggu su watu na maugat,
ugaid'a su sakit'a ginawa a makaenggay nu babal a taw na minuna pan i kaugat'in kanu entu ba.
4 Su taw a malipunget na makabinasa
ugaid'a labi a makabinasa su taw u mangalikud.
5 Su mapayag a kapatidtu
na nia tinemu kumin kanu limu a di ipebpayag.
6 Su masakit a kadaway nu pakat na sabap sa senep sa atay i kabpakat'in,
ugaid'a su 'bpamagigiling bu i kabpakat'in na mategel manunugat.
7 Su taw a nausug den na apia teneb na di nin den kanen,
ugaid'a su taw a 'gkagutem na apia mapait pan i makan nin na mamis i kananam'in lun.
8 Su taw a mawatan kanu walay nin
na mana sekanin papanuk a inawan nin su salag'in.
9 Su lana enggu su kamutan na makagkapia sa manggiginawa,
na maitu bun ba su senep sa atay a panduan a makaenggay nu pakat.
10 Di ka lemipatani su pakat'engka enggu su pakat'u ama nengka,
ka amaika aden kamutuan nengka na di ka den makaangay lu kanu suled'engka,
kagina nia pan tinemu su pagubay nengka
kumin kanu lusud'engka sa tian ugaid'a lu sa mawatan a dalepa.
11 Dua na manga wata, pagitung ka sa mapia ka ikagalaw nu ginawa ku su entu,
ka enggu aden makasawal ku kanu papegkaya sa laki.
12 Su taw a aden tuntay nin na 'bpelidasan nin su pakauma a makagkaid,
ugaid'a su taw a paidu i tuntay nin na di nin 'bpelidasan su makagkaid tembu 'gkagkaidan sekanin.
13 Paenggay ka sa apia ngin a langun-taman su taw a 'bpangakun nin su nautang'u lapu a taw.
Na apas ka a benal i aden makaenggay nin a pamagel sa kabayad'u lapu a taw sa leka.
14 Amaika ilalis'engka i kasalam'engka kanu pagubay nengka kanu mapita-pita,
na timbang a sinakit'engka i ginawa nin.
15 Su tagukagen a kaluma na mana atep a aden bisay nin a 'bpagigisan na ulan,
16 na di sekanin magaga melen a mana su sambel a di magaga melen,
atawa ka mana su lana a di kakapetan ka malindeg.
17 Su putaw na makapagkagalang'u pagidsan nin bun a putaw,
na maitu bun ba su taw, makapapangiseg'in su katuntay nu pagidsan nin bun a manusia.
18 Su taw a edtulanen nin su pamulan nin a kayu a igus na aden makua nin lun a unga a makan nin,
na maitu bun ba, su taw a edtulanen nin sa mapia su mapulu nin na makatalima sa balas.
19 Maalung'u taw su beneng'in kanu ig;
na maitu bun ba, 'gkailay su palangay nu taw sia kanu ukit'u kapagitung'in.
20 Su manusia na di mataw mausug,
a mana bun su pakubulan a lalayun 'bpagangapa sa pakalebeng lun.
21 Su bulawan enggu su pilak na pebpagukiten sa apuy asal'a katawan u dala simbul'in,
ugaid'a su manusia na 'gkatembu sekanin sia kanu ngin i labitan lun.
22 Apia lupeten nengka pan mayu su taw a babal
na di bun maawa su kababal'in.
23 Edsusuliman nu sa mapia enggu edtulan nu sa mapia su pangangayamen nu,
24 kagina su kakawasan enggu su kadatu na aden bun edtamanan nin.
25 Su manga utan na 'bpanebpeden ka ipapegkan kanu manga ayam, na gagalu nu kaangat sa kaetu nin 'bpaluman,
na su manga utan menem lu kanu damapalaw i panebpeden.
26 Na su manga bumbul mambu nu manga bili-bili na 'gkaumbal menem a balegkas'u kigkuan lun,
maitu bun, su pasa nu manga kambing na makapamasa sa pangangawidan.
27 Su manga gatas'u kambing na pakaenggay sa kauyagan kanu sakambinabatan nengka taman den kanu manga panunugun nengka a babay.