Su di Kambabal-babal
26
Amaika su kaulan sa timpu na kapedsabpet atawa ka kapanenggaw sa timpu na kapanenang ka di 'gkawagib,na maitu bun ba, di bun mawagib su kabadtugan kanu taw a babal.
2 Su pinta na dili mangasi kanu taw a dala kadupangan nin
ka mana i entu papanuk a matag bu pendadalayang na di pakadudsuk.
3 Su taw a babal na nasisita pan a betayn asal'a makapaginugut
a mana bun su kuda enggu kimar a nasisita pan a betayn enggu taguan sa kakang asal'a maginugut.
4 Di ka semumpati su kabunegan a bitiala nu taw a babal
ka enggu di ka makailing sa lekanin.
5 Ugaid'a sumpati ka sekanin sa u ngin i pakadait lun
ka enggu di nin mapagitung i balaitungan sekanin.
6 Amaika nia nengka pinapaitan sa katigan su taw a babal
na mana ka bun tinebpedan sa ay atawa ka mininem sa duti.
7 Su manga palibasan a 'bpeliu kanu ngali nu taw a babal
na mana su sadil a ay a dala katagan nin ka di pakalakaw.
8 Su kabadtug kanu taw a babal na masela a kabunegan
ka mana bun su watu a matag bu iniasad kanu sampuyut'u bitik ugaid'a dala nin ibitik.
9 Su manga palibasan a 'bpeliu kanu ngali nu taw a babal na makagkaid
a mana bun su teneken a kayu a ipedtapes-tapes'u taw a palalangut.
10 Su taw a mapanggalebek sa taw a babal atawa ka apia entain den a pedsagad bu
na mana sekanin talinganup a pembusug a nia nin 'gkasugat na apia entain.
11 Su taw a babal a pembabalinganan nin su kabunegan nin
na mana bun sekanin asu a pembalinganan nin pegkan su inuta nin.
12 Ngintu, nakailay kanu sa taw a nia nin kapegkailay sa ginawa nin na balaitungan?
Su maitu ba a taw na nia pan aden inam'in su taw a babal kumin sa lekanin.
13 Nia kadtalu nu mangapauk a taw na maya ta kun
sa imatayan silan na alimaw amaika mameliu silan.
14 Su taw a mapauk na pegkelid-kelid bu kanu 'bpagigan nin,
a mana su pintuan a pedtalinggi bu kanu bisagra.a
15 Aden taw a pupus den i kapauk'in ka makagaga den kemuit sa pegken nin,
ugaid'a di nin den magaga semungit.
16 Nia kataw nu taw a mapauk na sekanin i labi a balaitungan
kanu pitu kataw a pakasugat i kapamapata nin.
17 Makagkaid su kapagigiamung sa ukag'a ped a taw
ka mana ka bun ginemansing sa tangila na asu a pedsagad.
18-19 Su taw a 'bpagakalan nin su ped'in
sa nia nin pedtalun na pendadamangias bu sekanin sa entu,
na mana sekanin buneg a taw a pembusug sa apia endaw den apia pakapatay pan.
20 Amaika mapupus den su laleg na matay den su apuy,
na maitu bun ba, temelen bun su kapamagukag amaika dala den mapandalakita.
21 Su uling na papembaga sa apuy enggu su ibpelaleg a kayu na papegkaleg sa apuy,
na maitu bun ba su taw a tagukagen, na pembiag sa di kapamagayun.
22 Su kadtalu nu tamelibaken a taw na kalinian makikineg
a mana pegken a mapia i nanam'in a 'bpananalusan kanu didalem'u tian.
23 Na su mawag a niat'u pamusungan na 'gkadapengan nu mapia a kangadtalu
a mana su binangga a linumbus i liu nin sa mana suga na pedtinang a pilak.
24 Su taw a 'gkabensian nin su ped'in na pebpia-pianan nin i sanad a kapembitiala nin lun,
ugaid'a sia kanu pamusungan nin na napenu na katagakal.
25 Na apia ngin pan i kapia na sanad'a kadtalu nin na di ka maginuguti
kagina su pamikilan nin na napenu na kadaluakan.
26 Na apia man mamagigiling sekanin asal'a makapagena nin su lipunget'in
ugaid'a su kadaluakan nin na apia ngin na makapayag bun kanu madakel.
27 Su kemalut sa padulat kanu pagidsan nin na sekanin bun i maulug kanu entu,
enggu su pulidan nin sa watu su pagidsan nin na sekanin bun i kapulidan nu entu.
28 Su budtuden a taw na 'gkabensian nin su nanggulan nin sa mawag,
enggu su mamis a kanggudila na makabinasa.