Su Ped a manga Palibasan nu Datu Sulaiman
25
Nia su ped a palibasan nu Sulaimana inisulat'u manga taw nu datu nu Yahuda a su Hisikaya.
2 Pembadtugen su Kadenan sabap kanu manga kahanda nin a nakapagena.
Ugaid'a su manga datu na pembadtugen silan kagina 'gkagaga nilan pedsinantal sia kanu manga taw su 'gkanganggula.
3 Na u ngin i kalambeg'u kawang-kawangan enggu kadalem'u kalupan
na maitu bun ba i di katengkad kanu pamikilan nu manga datu.
4 Su pilak na pedtunagen muna ka enggu 'gkaawa su simbul'in
entu pan ka 'bpandayan nu panday.
5 Na maitu bun ba, nasisita a iawa nu datu su entain i daluaka kanu 'gkangasaligan nin
ka enggu pakanggulalan su katidtu kanu pendatuan nin.
6 Di ka ipebpulu i ginawa nengka sia kanu adapan nu datu
atawa ka di ka ibpeluyud i ginawa nengka kanu balapantag a manga taw.
7 Ka nia mapia i su datu demun i mangenggat sa leka mayan lu kanu balapantag a manga taw
kumin sa makagkaya ka sa kapaawa sa leka kanu adapan nilan.
Apia ngin i mailay nengka
8 na da ka muna manudtul mamagayas sa walay na kukuman
ka aden a entu na sia sa ulianan nin na seka i makagkaya.
9 Amaika aden di nu 'bpagayunan kanu ped'engka na embitialai nu demun sa mapia
enggu di ka mayag sa ped a taw su ngin i ibpagena nu ped'engka.
10 Kagina u katawan nu ped a taw na makayaya ka,
na di den 'gkapia su migkalat a kailay nu taw sa leka taman sa taman.
11 Na amaika su kadtalu ka nakatimpu,
na mana i nia balapantag a bulawan a pibpalasan.
12 Su papata nu balaitungan na mana i entu bulawan a sising
atawa ka bulawan a balig kanu taw a 'bpakikineg lun.
13 Su kasaligan a panunugun na mana sekanin ig a matenggaw
a pakadenggaw kanu mapulu nin sa timpu na kabpanenang.
14 Na su taw a di nin inggay su inibpasad'in
na mana sekanin sambel enggu dadtem a dala ulan nin.
15 Su kasabal enggu su kananaw na kambitiala
na apia su manga mapasang a 'gkangaunutan na magaga mamitiala.
16 Amaika makatun ka sa teneb na nangasasangan bu i kakan nengka lun,
ka amaika subela i makan nengka na manguta ka.
17 Da ka makiwalayn sa malibpes ka aden a entu na masemu bu su pagubay nengka
na kabensian ka nin.
18 Su taw a edsaksi sa dikena bantang kanu ped'in
na mana sundang atawa ka ibpametay enggu busug a pakagkaid.
19 Su kasalig sa taw a dili kasaligan sa timpu na kasimuketan
na mana bun su ngipen a 'gkakunga atawa ka su ay a di pakalakaw.
20 Na su taw a edsengal sa madungas-dungas kanu 'gkalasay i pamusungan nin
na mana nin bun inawan sa tanggub sa timpu na matenggaw,
atawa ka mana nin bun binubusan sa madsem su pali nu entu a taw.
21 Amaika 'gkagutem su kuntela nengka na enggi ka sa makan,
amaika 'gkamalan na enggi ka sa mainem.
22 Ka kanu maya ba a ukit na kayan sekanin taman sa makadsendit,
na amaika maitu na balasan ka nu Kadenan a Mapulu.
23 Su sambel a pakaganat sa ilud na natatalanged a pakadtapik sa ulan,
na maitu bun ba su taw a tamelibaken na natatalanged a makasakit sa ginawa.
24 Nia pan mapia a pegkakalebenan su untul'u walay
kumin sa lu kanu ludep'u walay a nia nengka tagapeda na su kaluma a tagukagen.
25 Su mapia a katigan a ganat sa mawatan a dalepa,
na mana matenggaw a ig kanu taw a 'gkamalan.
26 Su matidtu a taw ka kaayunan nin su galebekan nu daluaka,
na mana bun sekanin maledsik a kalut enggu malebug a bualan.
27 Su kakan sa madakel a teneb na dikena mapia,
na maitu bun ba, dikena mapia su kapangilay sa ukit asal'a badtugen ka na taw.
28 Su taw a di nin magaga kemumpen su ginawa nin
na mana sekanin siudad a nageba i pagalad'in.