24
Na di nu pedsekeli su daluaka a manga tawenggu di nu a benal mangingalap i kabpakat'u kanilan.
2 Kagina nia nilan bu 'bpagitungen na kadaluakan
enggu nia nilan bu pembitialan na makagkaid sa ped a taw.
3 Na sia makanggulalan kanu ilemu enggu katuntay
na makapatindeg su walay enggu mapasad sa mapia.
4 Na sia makanggulalan kanu kabalaitungan na mapenu na mangapulu i alaga nin a langun-taman
enggu mangapia i palas'in a tamuk su manga bilik'u entu.
5 Su taw a balaitungan na lawan pan i kabagel'in kumin kanu mabagel a taw
enggu su taw a aden tuntay nin na makin mangiseg su kabagel'in.
6 Ka sabap kanu mangapia a papata nu manga balaitungan na magaga nengka enggulalan su kambunua
enggu sabap kanu kadakel'u 'bpamitua na manaban ka.
7 Su ilemu na di kasabutan nu taw a babal
tembu sia kanu bitiala nu 'gkangaunutan na dala madtalu nin.
8 Su taw a nia nin bu pegkahandan na kadaluakan
na mabadtug sekanin sa kapangaden sa kasamukan.
9 Nia bu pegkahandan nu manga babal na kadusan
enggu su manga masudi na 'gkabensian nu manga taw.
10 Amaika kaawan ka na inam sa timpu na kamasengetan,
na nia nin maena na saben-sabenal a malubay ka.
11 Na edtabangi ka su manga taw a 'bpagimatayan sa dala kadupangan nin
enggu ilipuas'engka silan.
12 Ugaid'a u nia nengka idawa i dala sabut'engka sa nan a nanggula,
na su Kadenan man a Mapulu i pakataw kanu dalem'u pamusungan nengka.
Katawan nu Kadenan i entu kagina sekanin i pakailay
enggu sekanin i pembalas kanu ngin i penggalebeken nengka.
13 Dua na manga wata, kan kanu sa teneb ka mapia i nanam'in,
mamis man su teneb a 'bpagigis kanu walay nu batiukan.
14 Na maya bun ba su ilemu, makagkapia sa manggiginawa.
Amaika matuntut'engka su entu na 'gkapia su katamanan nengka
enggu su inam'engka na di madadag.
15 Di nu lemusudi su walay nu matidtu a taw a mana su penggulan nu daluaka a manga taw,
di nu pendupangi su pegkalebenan nilan.
16 Ka apia makapitu pan man makadadsang su matidtu a taw na makambangun bun,
ugaid'a su daluaka a manga taw na mabina-binasa na tiuba.
17 Di ka ipegkagalaw amaika kagkaidan su kuntela nengka.
Di ka ipegkapia na ginawa su kinagebpa nin
18 kagina amaika mailay nu Kadenan a Mapulu su entu na di nin kalilinian su entu.
Na amaika maitu na di nin den silan siksan.
19 Di ka 'bpelidua i ginawa nengka sabap kanu daluaka a manga taw.
Di ka a benal silan pedsekeli,
20 kagina dala mapia a kabpawangan nu uyag-uyag'u daluaka a manga taw,
ka mana silan palitan a pebpenus-penus.
21 Dua na manga wata, ikagilek'engka su Kadenan a Mapulu, maitu bun su datu;
da ka a benal magigiamung kanu manga taw a pedsungkang kanilan.
22 Kagina su kabinasan kanu manga daluaka na makatingguma sa apia ngin a kutika;
dala mataw lun u ngin i kabinasan a ipatingguma sa kanilan nu Kadenan a Mapulu enggu su datu.
Su Ped a manga Palibasan
23 Nia su ped a palibasan nu balaitungan a manga taw.
Su kasulamig a kapangukum na dikena mapia.
24 Kabensian enggu idsinta nu manga taw kanu apia endaw a bangsa
su apia entain a di semugat sa kawagib kanu daluaka.
25 Ugaid'a apia entain i semugat sa kawagib kanu daluaka,
na mapia i kapaguyag-uyag'in enggu kapalihalan sekanin.
26 Su bantang a kasawal na mana sium a tanda nu ikelas a kabpakat.
27 Pagadil ka muna su kauyagan nengka
enggu su 'bpangangawidan nengka,
entu pan ka patindeg ka sa walay.a
28 Na da ka pedsaksi sungkang kanu pagubay nengka sa dala amadan nin
enggu da ka pembudtud.
29 Di ka pedtalua i “Sulian ku sekanin,
imbalingan ku sa lekanin su pinakaidan nin sa laki.”
30 Minukit aku kanu 'bpangangawidan enggu pamumulanen nu taw a mapauk enggu dala akal'in,
31 na nailay ku i entu a napenu na utan a sagiket enggu sampinit,
na su pagalad'in na nangageba den.
32 Na initagu ku kanu pamikilan ku su nailay ku a entu
enggu masela i natuntayan ku kanu entu a nasipatan ku.
33 Na su kadtulug-tulug, kabpapangintelenen
enggu kadsasakupu sa lima,
34 na di ta 'gkatekawan na pakatingguma su mapasang a 'gkatamanan a mana su kapegkauma nu tanegkawn a minggumatalem.