23
Amaika nia nengka makapagadapa keman na su balapantag a tawna edsusuliman ka sa mapia su sia kanu kaadapan nengka.
2 Ka amaika seka su taw a malilini a benal keman
na tigkeli ka su kapegkalilini nengka pegkan.
3 Di ka pedsekeli pegkan su initalagad sa leka
kagina aden a entu na 'bpagilayanan ka nilan bu.
4 Di ka papegkapasangi i ginawa nengka sa kagkawasa nengka,
nia dait na mataw ka bun mangintelenen.
5 Kagina su kakawasan na sakelap mata bu na 'gkadadag
a mana su lumalagit a pakatekaw demun 'bpeledtu lu kanu kawang-kawangan.
6 Da ka pegkan kanu pegken nu taw a masingit;
di ka pedsekeli su mapia i nanam'in a initalagad'in sa leka a makan.
7 Kagina su maya ba a taw na mategel magitunga
sa nia nin edtalun na “Edtantu kanu keman!”
Ugaid'a sia kanu pamusungan nin na dikena besen i entu bantang.
8 Na makauta nengka su nakan nengka
enggu da bun natagan nu kinapamedta nengka lun.
9 Di ka ipembitiala su taw a babal
kagina di nin bun enggan sa kapantag su mangapia a panduan nengka lun.
10 Di ka malin su tanda nu dulunan a inibetad pan nu kalukesan,
atawa ka di ka kemua su lupa nu manga ilu
11 kagina mabagel su Kadenan a 'bpaninindeg kanilan.
Na sekanin i magkuntela nengka kanu kapapegkabulug kanilan.
12 Ipamula nengka kanu pamusungan nengka su manga panduan sa leka
enggu pakikineg ka sa mapia su manga pamandu sa leka.
13 Patidtu ka su manga wata nengka,
ka di nin bun ipatay su kabetay nengka lun.
14 Amaika betayn nengka silan sa kapatidtu lun,
na inilipuas'engka silan kanu nanget a kapatay.
15 Dua na manga wata, amaika endatu den sa leka su ilemu,
na ikagalaw i entu nu pamusungan ku.
16 Amaika nia den lemiu kanu ngali nengka su katidtu,
na ikagalaw i entu nu manggiginawa ku.
17 Di ka a benal pedsekeli su manga baladusa,
ka nia pan mula na makin ka papanalus su uman-uman gay a gilek'engka kanu Kadenan a Mapulu
18 ka kanu maya ba a ukit na nanget a mapia i katamanan nengka
enggu su inam'engka na di madadag.
19 Dua na manga wata, pakikineg ka enggu pagitung ka sa mapia,
papanalus ka su kabpelalakaw nengka kanu lalan a matidtu.
20 Da ka magigiamung kanu manga palalangut,
atawa ka kanu manga taw a mamegkan a benal sa subela-subela.
21 Kagina su manga palalangut enggu su mamegkan a benal
na nia nilan kabpawangan na mamiskin ka malilini a benal silan temulug
taman sa nia nin bun den mambalegkas na ibpamunas.
22 Pakikineg ka su ama nengka a minuyag sa leka
enggu di ka mawai sa kapantag su ina nengka amaika matua den.
23 Paginapasi ka temuntut su ilemu, su katidtu, su katuntay enggu su mangapia a pamandu;
di ka a benal i entu mawai sa katagan.
24 Sangat a magalaw su ama nu matidtu a wata;
na magalaw su entain i aden wata nin a balaitungan.
25 Na enggi ka sa kagalaw su dua a lukes'engka;
enggi ka sa kagalaw su mimbata sa leka.
26 Dua na manga wata, pakikineg aku nengka sa mapia,
ilingi ka su ukit'u kabpaguyag-uyag ku.
27 Kagina su sundal a babay na mana sekanin kalut a madalem enggu masimpit,
28 mana sekanin dupang a 'bpagayan sa kapanegkawan nin.
Sekanin i sabapan nu kapegkadakel'u manga mama a pegkiuga.
29 Na entain ba i aden lidu na ginawa nin enggu maugat i 'bpagitungen nin?
Entain ba i nakaaden sa ukag enggu madakel i buku na ginawa nin?
Entain ba i napalian sa dala kapantag'in? Entain ba i migkaliga i mata nin?
30 Na entain pan u dikena su manga taw a mauget a gay na 'bpaginem bu sa makalangut
enggu su malilini sa langun na pinadsisimbul a makalangut.
31 Na tembu di ka pedsekeli su makalangut u mailay nengka den su kaliga nin lu kanu basu
a mana mapia a benal sa bakelengan.
32 Kagina nia mauli sa entu na mana ka tinuka na nipay a bisa
33 taman sa madakel den i mailay nengka a dikena den kadsalilidan
enggu madakel den i mapagitung'engka enggu madtalu nengka a sakalebu.
34 Nia nengka lun kalagidan na mana ka lu pedtulug kanu pulu nu layag a lu kanu luk'u lagat.
35 Daka nia nengka madtalu na “Aden minetay sa laki ugaid'a da ku kasakiti.
Aden minadas sa laki ugaid'a da ku magedam.
Nia ba ka maawa den i langut ku a nia ka minem aku menem 'bpaluman.”