Su Kakawasan enggu su Kabadtugan
22
Su ingala a mapia i badtugan lun na minuna pan i kapia nin kanu kakawasan,kagina su kabpagadat'u taw na minuna pan i kabalapantag'in kanu pilak enggu bulawan.
2 Su miskinan enggu su kawasa na dala kambidayan nilan
kagina su Kadenan bun a Mapulu i nangaden kanilan.
3 Su taw a aden tuntay nin na 'bpelidasan nin su pakauma a makagkaid,
ugaid'a su manga dala tuntay nin na di nilan 'bpelidasan su makagkaid tembu 'gkagkaidan silan.
4 Nia tidtu-tidtu a balas'u senep sa atay a gilek kanu Kadenan a Mapulu enggu kababa na muletad
na kakawasan, kabadtugan enggu malendu a kapagumul.
5 Su lalan a 'bpelalakawan nu daluaka a taw na napenu na sudang enggu litag,
tembu lidasan su entu nu apia entain a 'bpagulaman nin i ginawa nin.
6 Pamandu nu su manga wata nu sa matidtu a kapaguyag-uyag,
ka madtapik'ilan su entu taman sa kanu kagkatua nilan.
7 Su manga miskinan na pegkiug-kiugan nu manga kawasa,
na mapangungulipen nu sinembayan su sinemembay.
8 Su taw a namula sa kadaluakan na nia nin bun masabpet na kabinasan;
su taw a usalen nin su kapegkagaga nin sa kapakapasang sa ped'in na di embantas.
9 Su taw a mangalimuan na kapalihalan,
kagina 'bpangumunan nin kanu makan nin su manga miskinan.
10 Paawan su masudi a taw ka enggu madala su kapamagukag
taman sa katelenan su di kabpamagayun enggu su kapagkaya.
11 Su taw a ikelas i pamusungan nin enggu mananaw i kadtalu nin
na apia su datu na mabpakat'in.
12 Su Kadenan a Mapulu na pedtiakapan nin su tidtu a ilemu,
ugaid'a ipebpagilay nin i su kadtalu nu di kangasaligan a taw na kabudtud.
13 Nia kadtalu nu mangapauk a taw na maya ta kun
sa imatayan silan na alimaw amaika mameliu silan.
14 Su kadtalu nu talakiuga a babay na mana kalut a madalem,
na apia entain i kalipungetan nu Kadenan a Mapulu na maulug lu ba.
15 Su kadaluakan na nakaukil den kanu pamusungan nu manga wata,
ugaid'a maawa i entu sa lekanin sa ukit'a kabetay lun sa kapatidtu lun.
16 Su apia entain i pakapasangan nin su manga miskinan asal'a kaumanan su kakawasan nin,
atawa ka nia nin pangenggan na su manga kawasa bun ka aden 'gkaalap'in lun
na nia nin kabpawangan na kamiskin.
Su Telupulu a Palibasan nu manga Alim
17 Na pakikineg ka sa mapia enggu itagu nengka sa ginawa su kangadtalu nu balaitungan,
ipamula nengka kanu pamusungan nengka su ibpamandu ku a nia sa leka.
18 Ka sangat man i kapia nin amaika itagu nengka i nia kanu pamusungan nengka
enggu su langun nu nia na magaga nengka edtalu.
19 Na ipamandu ku sa leka saguna su nia,
ka enggu di madadag su salig'engka kanu Kadenan a Mapulu.
20 Na saguna na ipedsulat ku den sa leka su telupulu a nia
a palibasan enggu ilemu nu manga balaitungan.
21 Na nia ba i mamandu sa leka sa u ngin i kasaligan enggu bantang a kangadtalu,
ka enggu nengka masawal sa mapia su sinemugu sa leka.
22 Di ka mangagawi su manga miskinan
atawa ka di ka mawai sa kawagib kanu walay na kukuman su pamakanasisita sabap sa manga miskinan silan,
23 kagina su Kadenan a Mapulu i maninindeg kanilan,
na binasan nin su apia entain a mapakabulug kanilan.
24 Na di ka pebpakat su taw a mayaw i ulu nin
atawa ka di ka pedtagapeda su taw a malemu malipunget
25 asal'a di ka makailing sa lekanin
ka enggu di ka kagkaidan.
26 Di ka pedtalegkebi su utang'u ped a taw,
atawa ka da ka mangaku sa kabayad'u lun.
27 Ka amaika dala makabayad'engka lun,
na apia su 'bpagigan nengka na kuan nilan.
28 Di ka malin su tanda nu dulunan
a inibetad pan nu manga kalukesan nengka.
29 Na ilay nu ba su taw a mategel i kanggalebek'in
ka lu sekanin pakanggalebek kanu manga datu,
dikena lu kanu kadsalilidan a manga taw.